ເສີມຂະຫຍາຍບົດບາດຊາວກະສິກອນໃນການສ້າງໂຄງປະກອບພື້ນຖານກະສິກຳຄືນໃໝ່
ທ່ານ ຫງວຽນທ້ຽນເຍີນ ທີ່ກອງປະຊຸມສຳມະນາ
|
(vovworld) – ຕອນເຊົ້າວັນທີ 28/11, ຢູ່ຮ່າໂນ້ຍ, ສະມາຄົມຊາວກະສິກອນ ຫວຽດນາມ ໄດ້ສົມທົບກັບວາລະສານກອມມູນິດ ຈັດຕັ້ງກອງປະຊຸມສຳມະນາວິທະຍາສາດດ້ວຍຫົວຂໍ້ວ່າ: “ເສີມຂະຫຍາຍບົດບາດເປັນເຈົ້າຂອງຊົນຊັ້ນຊາວກະສິກອນ ໃນການສ້າງໂຄງປະກອບຂະແໜງກະສິກຳຄືນໃໝ່ຕິດພັນກັບການກໍ່ສ້າງຊົນນະບົດໃໝ່ໃນໄລຍະເຊື່ອມໂຍງ”. ກ່າວຄຳເຫັນທີ່ກອງປະຊຸມສຳມະນາ, ທ່ານ ຫງວຽນທ້ຽນເຍີນ, ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ, ໄດ້ຊີ້ແຈ້ງວ່າ: ຊາວກະສິກອນຮ່ວມສຳພັນຜ່ານສະຫະກອນແມ່ນຮູບແບບພື້ນຖານທີ່ສຸດເພື່ອຮັບປະກັນສິດຜົນປະໂຫຍດ, ສິດເປັນເຈົ້າຂອງຊາວກະສິກອນ. ຜ່ານແບບວິທີການຜະລິດສະຫະກອນ ແລະ ສະຫະພັນສະຫະກອນ, ທີ່ຕັ້ງບົດບາດຂອງຊາວກະສິກອນໃນການເຈລະຈາຊື້ - ຂາຍ ໃນທ້ອງຕະຫຼາດໄດ້ຮັບການປ່ຽນໃໝ່ໂດຍພື້ນຖານ, ເປັນປະຖົມປັດໄຈເພື່ອຈຳໜ່າຍຄືນມູນຄ່າເພີ່ມຂອງການຜະລິດກະສິກຳ.
ກ່າວຄຳເຫັນທີ່ກອງປະຊຸມສຳມະນາ, ບັນດາຜູ້ແທນໄດ້ຢັ້ງຢືນບົດບາດ, ທີ່ຕັ້ງຂອງຊົນຊັ້ນຊາວນາ ແລະ ຊາວກະສິກອນໃນວິວັດການຜະລິດກະສິກຳ, ກໍ່ສ້າງຊົນນະບົດໃໝ່, ຜ່ານນັ້ນ ປະກອບສ່ວນເຂົ້າໃນວິວັດການຫັນປະເທດຊາດເປັນປະເທດອຸດສາຫະກຳ, ທັນສະໄໝ. ປອ ດັ້ງກິມເຊີນ, ອະດີດຫົວໜ້າສະຖານບັນນະໂຍບາຍຍຸດທະສາດ, ກະຊວງກະສິກຳ ແລະ ພັດທະນາຊົນນະບົດ, ສະເໜີວ່າ:
“ສະມາຄົມຊາວກະສິກອນສວມບົດບາດເປັນຜູ້ຕາງໜ້າໃຫ້ຊາວກະສິກອນ ໃນບັນດານະໂຍບາຍສຳຄັນຄື: ທີ່ດິນ, ກໍ່ສ້າງກິດຈະກຳໃຫຍ່, ສ້າງສະພາບແວດລ້ອມ, ສ້າງວຽກເຮັດງານທຳ. ສະມາຄົມຊາວກະສິກອນ ກໍ່ຕ້ອງສວມບົດບາດເປັນລູກຄ້າຕ່າງໜ້າໃຫ້ແກ່ຊາວກະສິກອນເພື່ອເລືອກເຟັ້ນບັນດາຫົວເລື່ອງຄົ້ນຄ້ວາ, ໂຄງການສົ່ງເສີມກະສິກຳ, ຕີລາຄາລາຍການນັ້ນ, ມີການກຳນົດທິດຢ່າງຖືກຕ້ອງ.”