(ພາບປະກອບຈາກ vnexpress.net)
|
(vovworld) - ຕອນຄຳ່ວັນທີ 19/3, ຢູ່ຫຼາຍແຂວງ, ນະຄອນໃນທົ່ວປະເທດໄດ້ດຳເນີນເຫດການມອດໄຟ 1 ຊົ່ວໂມງເພື່ອໜ່ວຍໂລກປີ 2016 ດ້ວຍຫົວຂໍ້ “ການກະທຳນ້ອຍແຕ່ຄວາມໝາຍໃຫຍ່“. ຢູ່ ຮ່າໂນ້ຍ, ເຫດການນີ້ໄດ້ດຶງດູດນັກຮຽນ, ນັກສຶກສາ ແລະ ບັນດານັກອາສາສະໝັກໃນບໍລິເວນນະຄອນນັບພັນຄົນເຂົ້າຮ່ວມ. ເວລາ 20 ໂມງ 30 ນາທີ, ຜູ້ຕາງໜ້າກະຊວງອຸດສາຫະກຳ ການຄ້າ, ຄະນະກຳມະການປະຊາຊົນນະຄອນ ຮ່າໂນ້ຍ, ກຸ່ມບໍລິສັດພະລັງໄຟຟ້າ ຫວຽດນາມ, ເອກອັກຄະລັດຖະທູດ ແດນມາກ ປະຈຳຫວຽດນາມ ໄດ້ພ້ອມກັນກົດປຸ່ມປະຕິບັດພິທີການມອດໄຟ, ຕອບສະໜອງເຫດການມອດໄຟ 1 ຊົ່ວໂມງເພື່ອໜ່ວຍໂລກປີ 2016. ກ່າວຄວາມເຫັນທີ່ພິທີ, ທ່ານ ຫງວຽນຢວານຕວານ, ຮອງປະທານຄະນະກຳມະການປະຊາຊົນນະຄອນ ຮ່າໂນ້ຍ, ເນັ້ນໜັກວ່າ:
“ຕອບສະໜອງເຫດການມອດໄຟ 1 ຊົ່ວໂມງເພື່ອໜ່ວຍໂລກປີ 2016, ນະຄອນ ຮ່າໂນ້ຍພ້ອມກັບບັນດາແຂວງ, ນະຄອນໃນທົ່ວປະເທດໄດ້ມອດໄຟ ແລະ ບັນດາອຸປະກອນໄຟຟ້າທີ່ບໍ່ຈຳເປັນໃນເວລາ 1 ຊົ່ວໂມງ. ຕາງໜ້າການນຳນະຄອນ ຮ່າໂນ້ຍ, ຂ້າພະເຈົ້າຮຽກຮ້ອງປະຊາຊົນທຸກຊັ້ນວັນນະ, ປະຊາຄົມວິສາຫະກິດ, ບັນດາອົງການຈັດຕັ້ງ, ສ່ວນບຸກຄົນໃນບໍລິເວນນະຄອນຫຼວງເຂົ້າຮ່ວມຕອບສະໜອງລາຍການ ດ້ວຍບັນດາການກະທຳທີ່ແທດຈິງ, ມີຄວາມໝາຍ, ດ້ວຍຈຸດໝາຍນຳໃຊ້ຊັບພະຍາກອນຢ່າງເໝາະສົມ ແລະ ມີປະສິດທິຜົນ, ປົກປັກຮັກສາສິ່ງແວດລ້ອມ ແລະ ເປັນເຈົ້າການຮັບມືກັບການປ່ຽນແປງຂອງດິນຟ້າອາກາດ“.
ແລະກໍ່ໃນຕອນຄຳ່ວັນທີ 19/3, ບັນດາສະຖານທີ່ລືຊື່ນັບຮ້ອນແຫ່ງຢູ່ໃນໂລກເຊັ່ນ ຕົວ Eiffel, ໂຮງລະຄອນ Opera Sydney, ຕຶກອາຄານ Empire State ຢູ່ ນິວຢອກ, ອາເມລິກາ… ກໍ່ລ້ອນແຕ່ມອດໄຟເພື່ອຕອບສະໜອງເຫດການນີ້. ບັນດານັກຈັດຕັ້ງ ເຫດການມອດໄຟ 1 ຊົ່ວໂມງເພື່ອໜ່ວຍໂລກປີ 2016 ຫວັງວ່າ, ບັນດາການເຄື່ອນໄຫວໃນປີນີ້ຈະຊຸກຍູ້ກຳລັງໜູນໃໝ່ໃນຄວາມມານະພະຍາຍາມປົກປັກຮັກສາສິ່ງແວດລ້ອມ, ປະຢັດພະລັງງານ, ພາຍຫຼັງທີ່ບັນດາການນຳໂລກບັນລຸໄດ້ຂໍ້ຕົກລົງກ່ຽວກັບການຕ້ານການປ່ຽນແປງຂອງດິນຟ້າອາກາດຢູ່ ປາຣີ ເມື່ອປີກາຍນີ້.