(vovworld) - ໃນຊຸມມື້ຕົ້ນປີໃໝ່, ຈຳນວນແຂກທ່ອງທ່ຽວໄປຢ້ຽມຢາມ, ທ່ອງຊົມຢູ່ເຂດທ່ອງທ່ຽວ, ປູຊະນີຍະສາຖານ ແລະ ສວນສາທາລະນະແຫ່ງຕ່າງໆ ຢູ່ບັນດາແຂວງ, ນະຄອນພາກກາງໄດ້ເພີ່ມຂຶ້ນຫຼາຍພໍສົມຄວນ. ຢູ່ນະຄອນ ໂຫ້ຍອານ, ແຂວງ ກວາງນາມ, ໄດ້ດຳເນີນການເຄື່ອນໄຫວຕ່າງໆ ເພື່ອຕ້ອນຮັບບຸນປີໃໝ່, ໃນ 3 ວັນຂອງບຸນເຕັດ ແຕ່ລະມື້ຄຸ້ມຖະໜົນ ໂຫ້ຍອານ ໄດ້ຕ້ອນຮັບແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດປະມານ 4.000 ເທື່ອຄົນ. ທ່ານ ຫວໍຟູ່ງ, ຜູ້ອຳນວຍການສູນວັດທະນະທຳທ່ອງທ່ຽວນະຄອນ ໂຫ້ຍອານ ໃຫ້ຮູ້ວ່າ:
“ອາກາດປີນີ້ສະດວກສະບາຍໃຫ້ແກ່ການເຄື່ອນໄຫວຕ່າງໆ. ການລະຫຼີ້ນພື້ນເມືອງກໍ່ໄດ້ດຶງດູດແຂກທ່ອງທ່ຽວເປັນຈຳນວນຫຼວງຫຼາຍ. ແຜນນະໂຍບາຍຂອງນະຄອນແມ່ນບໍ່ຂາຍປີ້ທ່ອງທ່ຽວ, ແຕ່ພວກເຮົາສະເໜີໃຫ້ບັນດາປູຊະນີຍະສາຖານເປີດປະຕູເພື່ອຮັບໃຊ້ປະຊາຊົນ, ພິເສດແມ່ນບັນດາປູຊະນີຍະສະຖານກ່ຽວກັບການເຫຼື້ອມໃສ, ວັດຂົວ... ໃນຊຸມມື້ຜ່ານມາ, ຈຳນວນແຂກທ່ອງທ່ຽວມາຢ້ຽມຢາມ ໂຫ້ຍອານ ເປັນຈຳນວນຫຼວງຫຼາຍ”
ໃນຂະນະນັ້ນ, ງານບຸນດອກໄມ້ລະດູບານໃໝ່ຢູ່ນະຄອນ ດ່າໜັງ ໄດ້ດຶງດູດແຂກຮັບຊົມ ແລະ ເຂົ້າຮ່ວມບັນດາການລະຫຼີ້ນພື້ນເມືອງກ່ວາ 80.000 ເທື່ອຄົນ. ທ່ານນາງ ເຈີນທິເຄືອງວີ, ຮອງຫົວໜ້າຫ້ອງການວັດທະນະທຳ ບໍລິສັດສວນສາທາລະນະຕົ້ນໄມ້ຂຽວ ດ່າໜັງ ໃຫ້ຮູ້ວ່າ:
“ງານບຸນແຂ່ງຂັນນົກຮ້ອງ ໄດ້ດຶງດູດແຂກເຂົ້າຊົມເປັນຈຳນວນຫຼວງຫຼາຍ. ປີນີ້, ຕຸກກະຕານ້ຳກໍ່ດຶງດູດແຂກເຂົ້າຮ່ວມເປັນຈຳນວນຫຼວງຫຼາຍ. ນອກຈາກນັ້ນແລ້ວ, ງານບຸນດອກໄມ້ລະດູບານໃໝ່ໄດ້ມອບເງິນ 70 ລ້ານດົ່ງ ໃຫ້ແກ່ສະມາຄົມຜູ້ປະສົບເຄາະຮ້າຍຈາກທາດຜິດສີສົ້ມ/ ດີໂອຊິນ ນະຄອນ ດ່າໜັງ ”
ຢູ່ເທື່ອທຽນເຫ້ວ, ໃນຊຸມມື້ຜ່ານມາ, ມີປະຊາຊົນ ແລະ ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດໄດ້ເລືອກເຟັ້ນບັນດາປູສະນີຍະສະຖານ ເຫ້ວ ແມ່ນສະຖານທີ່ທ່ອງທ່ຽວໃນຕົ້ນປີ. ທ່ານ ຟານແທງຫາຍ, ຜູ້ອຳນວຍການສູນປົກປັກຮັກສາປູຊະນີຍະສະຖານກຸ້ງເກົ່າເຫ້ວ ໃຫ້ຮູ້ວ່າ:
“ໃນ 3 ວັນຂອງບຸນເຕັດ, ພວກຂ້າພະເຈົ້າໄດ້ເປີດປະຕູບັນດາປູຊະນີຍະສະຖານ ເພື່ອຮັບໃຊ້ປະຊາຊົນ, ຮັບໃຊ້ແຂກທ່ອງທ່ຽວ. ໃນໂອກາດນີ້, ໃນແຕ່ລະມື້, ມີແຂກທ່ອງທ່ຽວມາຢ້ຽມຢາມບັນດາເຂດປູຊະນີຍະສະຖານ 4.000 – 5.000 ເທ່ືອຄົນ. ພວກຂ້າພະເຈົ້າກໍ່ໄດ້ຈັດຕັ້ງການເຄື່ອນໄຫວຕ່າງໆ ເພື່ອຮັບໃຊ້ແຂກທ່ອງທ່ຽວແຕ່ວັນທີ 1 ຫາ ວັນທີ 8 ຂອງບຸນເຕັດ”