(vovworld) - Carnaval ຮ້າລອງ ແມ່ນການເຄື່ອນໄຫວຖືກຈັດຂຶ້ນໃນແຕ່ລະປີ ເພື່ອເປີດສາກໃຫ້ລະດູທ່ອງທ່ຽວປີ 2013. ດ້ວຍຫົວຂໍ້ວ່າ “ສີສັນ ກວາງນິນ - ເຕົ້າໂຮມ ແລະ ແຜ່ຂະຫຍາຍ”, Carnaval ຮ້າລອງ ປີ 2013 ຖືກຈັດຂຶ້ນໃນເວລາ 20 ໂມງ ວັນທີ 27/4. Carnaval ຮ້າລອງ ແມ່ນວັນບຸນຂອງປະຊາຊົນແຂວງ ກວາງນິນ ເພື່ອແນໃສ່ແນະນຳ, ເຊື້ອເຊີນເພື່ອນມິດ, ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ ມາຮັບຊົມ, ຊອກຫາມໍລະດົກແຫ່ງທຳມະຊາດຂອງໂລກ ອ່າວຮ້າລອງ ແລະ ບັນດາມໍລະດົກວັດທະນະທຳທີ່ມີຫຼາຍຮູບຫຼາຍສີຂອງ 22 ຊົນເຜົ່າຢູ່ແຂວງ ກວາງນິນ. ທີ່ການປະຊຸມຂ່າວເມື່ອວັນທີ 23/4 ຢູ່ແຂວງກວາງນິນ, ທ່ານ ຈິ້ງດັງແທງ, ຮອງຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງ ກວາງນິນ ໃຫ້ຮູ້ວ່າ: Carnaval ຮ້າລອງ ປີ 2013 ຈະລະດົມແຫຼ່ງກຳລັງຂອງທົ່ວສັງຄົມ:
“ບັນດາການເຄື່ອນໄຫວໂດຍປະຊາຊົນ ກວາງນິນ ປະຕິບັດ ແລະ ມີການເຂົ້າຮ່ວມຂອງ 22 ຊົນເຜົ່າອ້າຍນ້ອງ, ທີ່ສະແດງສີສັນວັດທະນະທຳຂອງປະຊາຊົນ ກວາງນິນໃນຫົວຂໍ້ ສີສັນ ກວາງນິນ - ເຕົ້າໂຮມ ແລະ ແຜ່ຂະຫຍາຍ. 7 ປີກ່ອນ, ລາຍການ Carnaval ເຄີຍຈັດຂຶ້ນຢູ່ທີ່ທ່າເຮືອເກົ່າ, ປີນີ້ຈະຍ້າຍໄປເມືອງ ຮົ່ງຖັ໋ງ, ເຊິ່ງແມ່ນສະຖານທີ່ມີຄວາມສະດວກກ່ວາ. ສະຖານທີ່ໃໝ່ນີ້ສາມາດຮັບໃຊ້ຜູ້ແທນ, ກໍ່ຄືປະຊາຊົນມາຮ່ວມໄດ້ຫຼາຍກ່ວາເກົ່າ.”
ເຂົ້າຮ່ວມລາຍການສິລະປະ Carnaval ຮ້າລອງ ປີ 2013 ມີນັກສະແດງສິລະປະປະມານ 3.500 ຄົນທີ່ສັງກັດຄະນະສິລະປະກອນຕ່າງໆໃນທ່ົວປະເທດ. ນອກຈາກນັ້ນຍັງມີນັກສະແດງສິລະປະຂອງແຂວງ ກວາງຕຸງ - ປະເທດ ຈີນ ແລະ ຫລວງພະບາງ ຂອງ ລາວ ເຂົ້າຮ່ວມອີກດ້ວຍ.