ງານບຸນວິຫານ ຮູ່ງ
(ພາບປະກອບ)
(vovworld) - ພິທີເຊີດຊູ, ຮັບໃບຢັ້ງຢືນ “ການເຫຼື້ອມໃສບູຊາເຈົ້າຊີວິດ ຮູ່ງ ຢູ່ ຟູ່ທໍ້” ແມ່ນມໍລະດົກວັດທະນະທຳບໍ່ມີຮູບຮ່າງ ຕາງໜ້າຂອງມວນມະນຸດ ຈະໄດ້ຮັບການຈັດຕັ້ງຂຶ້ນກົງກັບໂອກາດໄຫວ້ບູຊາເຈົ້າຊີວິດ ຮູ່ງ - ງານບຸນວິຫານ ຮູ່ງ ປີ 2013 (ຄາດວ່າຈະດຳເນີນໃນວັນທີ 13/4, ກົງກັບວັນທີ 4/3 ໄລ່ຕາມຈັນທະປະຕິທິນ). ເພື່ອກະກຽມຢ່າງລອບຄອບຖີ່ຖ້ວນໃຫ້ແຫ່ພິທີຮັບໃບຢັ້ງຢືນມໍລະດົກໂລກ ແລະ ງານບຸນວິຫານຮູ່ງ ປີ 2013, ເຂດປູຊະນີຍະສະຖານປະຫວັດສາດ ວິຫານ ຮູ່ງ ສົມທົບກັບພະແນກວັດທະນະທຳ, ກິລາ ແລະ ການທ່ອງທ່ຽວ ແຂວງ ຟູ່ທໍ້ ໄດ້ຈັດບັນດາລາຍການ ເຄື່ອນໄຫວວັດທະນະທຳ ສິລະປະ, ກິລາກາຍຍະກຳຮັບໃຊ້ງານບຸນ, ພ້ອມທັງເປັນເຈົ້າການສົມທົບກັບບັນດາຂັ້ນ, ຂະແໜງການທີ່ກ່ຽວຂ້ອງສ້າງແຜນການ ແລະ ຜັນຂະຫຍາຍບັນດາວິທີຮັບປະກັນຄວາມປອດໄພ, ຄວາມເປັນລະບຽບຮຽບຮ້ອຍ, ໄດ້ແບ່ງກຳລັງແນະນຳໃຫ້ແຂກທ່ອງທ່ຽວປະຕິບັດພິທີເຫຼື້ອມໃສບູຊາ ເຈົ້າຊີວິດຮູ່ງ ຕາມປະເພນີ, ເພື່ອແນໃສ່ສ້າງເງື່ອນໄຂດີທີ່ສຸດໃຫ້ແກ່ປະຊາຊົນມາຢ້ຽມຢາມ ວິຫານ ຮູ່ງ ແລະ ຕອບບຸນແທນຄຸນບັນພະບຸລຸດ. ທ່ານ ຫງວຽນຊວນກາກ, ຜູ້ອຳນວຍການເຂດປູຊະນີຍະສະຖານປະຫວັດສາດ ວິຫານ ຮູ່ງ ໃຫ້ຮູ້ວ່າ: ມາຮອດປະຈຸບັນ, ບັນດາວິຫານບູຊາເທິງໃນພູ ເຫງຍຫຼີງ (Nghia Linh) ຄື: ວິຫານ ຮ້າ, ວິຫານ ຈູງ, ວິຫານ ເທື້ອງ, ສຸສານເຈົ້າຊີວິດ ຮູ່ງ, ວິຫານ ຢ໋ຽງ ໄດ້ຮັບການບູລະນະປະຕິສັງຂອນ ເພື່ອຕ້ອນຮັບປະຊາຊົນໃນທ່ົວປະເທດ ມາຕອບບຸນແທນຄຸນບັນພະບຸລຸດຜູ້ທີ່ມີຄຸນງາມຄວາມດີໃນການສ້າງສາປະເທດຊາດ.