ແຂວງ ຮ່ວາບິ່ງ ຕ້ອງສືບຕໍ່ເສີມຂະຫຍາຍຄວາມສາມາດບົ່ມຊ້ອນທີ່ມີຢູ່ແລ້ວເພື່ອພັດທະນາ
(ທ່ານປະທານປະເທດເຈືອງເຕີນຊາງ
ມອບຂອງຂວັນໃຫ້ປະຊາຊົນຕາແສງຕ່ຽນຟອງ)
(vovworld) – ວັນທີ 18/01, ທ່ານປະທານປະເທດເຈືອງເຕີນຊາງ ແລະ ຄະນະປະຕິບັດງານໄດ້ໄປຢ້ຽມຢາມ ແລະ ເຮັດວຽກຢູ່ແຂວງຮ່ວາງບິ່ງ ກ່ຽວກັບສະພາບປະຕິບັດເສດຖະກິດ, ສັງຄົມ ແລະ ຮັບປະກັນການປ້ອງກັນຊາດ, ປ້ອງກັນຄວາມສະຫງົບໃນບໍລິເວນແຂວງ. ຢູ່ເມືອງ ກາວຟອງ, ທ່ານປະທານປະເທດ ໄດ້ຕີລາຄາສູງບໍລິສັດຈຳກັດ ກາວຟອງ ທີ່ໄດ້ຈັດຕັ້ງການຜະລິດ, ດຳເນີນທຸລະກິດຢ່າງມີປະສິດທິຜົນ, ຍົກສູງສະມັດຕະພາບ, ປະລິມານຕົ້ນໄມ້, ຢືນຢັນໄດ້ເຄື່ອງໝາຍໝາກກ້ຽງ ກາວຟອງ ໃນຕະຫຼາດ. ທ່ານປະທານປະເທດສະເໜີໃຫ້ບໍລິສັດ ແລະ ເມືອງກາວຟອງ ສືບຕໍ່ຜັນຂະຫຍາຍບັນດາວິທີຍົກສູງຄຸນນະພາບ, ກຳລັງແກ່ງແຍ້ງຂອງຜະລິດຕະພັນໃນສະພາບທີ່ຫວຽດນາມ ເຊື່ອມໂຍງ, ຫັນການຄ້າເປັນເສລີ.
ເມື່ອຢ້ຽມຢາມ ແລະ ຊອກຮູ້ຊີວິດການເປັນຢູ່ຂອງພໍ່ແມ່ປະຊາຊົນບັນດາເຜົ່າໃນບໍລິເວນຕາແສງຕ່ຽນຟອງ, ທ່ານປະທານປະເທດ ສະເໜີໃຫ້ອຳນາດການປົກຄອງທ້ອງຖິ່ນເສີມຂະຫຍາຍທ່າແຮງຂອງແຂວງເພື່ອພັດທະນາ, ຂະຫຍາຍຮູບແບບລ້ຽງປູກສິນໃນນ້ຳ ປະກອບສ່ວນຍົກສູງຊີວິດການເປັນຢູ່ຂອງປະຊາຊົນໃນເຂດທີ່ມີເຂື່ອນໄຟຟ້ານ້ຳຕົກຮ່ວາບິ່ງ.
ທີ່ການເຮັດວຽກກັບພະນັກງານຫຼັກແຫຼ່ງແຂວງຮ່ວາບິ່ງ, ທ່ານປະທານປະເທດເຈືອງເຕີນຊາງ ໄດ້ຕີລາຄາສູງອົງຄະນະພັກ, ອຳນາດການປົກຄອງ ແລະ ປະຊາຊົນແຂວງຮ່ວາບິ່ງ ໄດ້ເສີມຂະຫຍາຍກຳລັງແຮງສາມັກຄີທົ່ວປວງຊົນທັງຊາດ, ຍູ້ແຮງການພັດທະນາເສດຖະກິດ ຮັກສາລະດັບເຕີບໂຕເສດຖະກິດເກືອບ 10,4% ໃນ 4 ປີຜ່ານມາ. ທ່ານປະທານປະເທດ ຊົມເຊີຍທ້ອງຖິ່ນໄດ້ຫັນໂຄງປະກອບພື້ນຖານເສດຖະກິດຢ່າງວ່ອງໄວ ແລະ ຖືກທິດ, ໃນນັ້ນສ້າງໂຄງປະກອບກະສິກຳປ່າໄມ້ຕາມທິດຍົກສູງຄຸນຄ່າພັດທະນາຢ່າງໝັ້ນຄົງ. ທ່ານປະທານປະເທດ ເນັ້ນໜັກວ່າ, ອຳນາດການປົກຄອງແຂວງຮ່ວາບິ່ງ ພວມມານະພະຍາຍາມສູ້ຊົນເພື່ອບັນລຸລາຍຮັບປານກາງຂອງທົ່ວປະເທດໃຫ້ໄດ້, ສະນັ້ນ, ຕ້ອງຊອກຫາທິດທາງໃຫ້ແກ່ການພັດທະນາເສດຖະກິດສັງຄົມ ແລະ ມີມາດຕະການແກ້ໄຂຢ່າງລະອຽດ ເພື່ອເສີມຂະຫຍາຍຄວາມສາມາດບົ່ມຊ້ອນ ແລະ ທ່າແຮງຂອງຕົນ.