(vovworld) - ຕອນບ່າຍວັນທີ 1/5, ງານວາງສະແດງຮູບພາບສະຖານະການ - ສິລະປະ “ເຈື່ອງຊາ ທີ່ຮັກແພງ” ໂດຍ ສະມາຄົມນັກສິລະປິນຖ່າຍຮູບ ຫວຽດນາມ ສົມທົບກັບສະມາຄົມວັນນະຄະດີ ສິລະປະ ແຂວງ ແຄ໋ງຮ່ວາ ຈັດຕັ້ງ ໄດ້ອັດລົງ ຢູ່ນະຄອນ ຍາຈາງ. ຄະນະຈັດຕັ້ງໄດ້ມອບຮູບຖ່າຍບາງແຜ່ນໃຫ້ແກ່ບັນດາໂຮງຮຽນໃຫຍ່ຢູ່ນະຄອນ ຍາຈາງ. ງານວາງສະແດງຖືກຈັດຂຶ້ນແຕ່ວັນທີ 26/4, ຢູ່ສວນສາທາລະນະແຄມຝັ່ງທະເລ ຍາຈາງ, ໄດ້ແນະນຳຮູບຖ່າຍ 70 ແຜ່ນຂອງນັກຂ່າວ, ນັກສິລະປິນຖ່າຍຮູບ ເຈີນມິນງອກ. ຄະນະຈັດຕັ້ງໄດ້ມອບຮູບຖ່າຍຂະໜາດໃຫຍ່ 6 ແຜ່ນໃຫ້ແກ່ໂຮງຮຽນ 6 ແຫ່ງຢູ່ນະຄອນ ຍາຈາງ, ມອບຮູບຖ່າຍພະແກ້ວຢູ່ວັດ ເຈື່ອງຊາ ໃຫຍ່ໃຫ້ວັດ ວ້ານດຶກ ຢູ່ນະຄອນ ຍາຈາງ , ມອບຮູບຖ່າຍ 2 ແຜ່ນກ່ຽວກັບທິວທັດທຳມະຊາດຢູ່ນະຄອນ ຍາຈາງ ໃຫ້ເມືອງເກາະ ເຈື່ອງຊາ . ນັກຂ່າວ, ນັກສິລະປິນຖ່າຍຮູບ ເຈີນມິນງອກ ໃຫ້ຮູ້ວ່າ:
“ບັນດາຮູບຖ່າຍກ່ຽວກັບໝູ່ເກາະ ເຈື່ອງຊາ ຖືກແຂວນຢູ່ບ່ອນທີ່ບັນດານ້ອງນັກຮຽນເຫັນໄດ້ງ່າຍ. ຂ້າພະເຈົ້າ ຫວັງວ່າ: ບັນດາຮູບຖ່າຍກ່ຽວກັບໝູ່ເກາະ ເຈື່ອງຊາ ຈະຊ່ວຍໃຫ້ລຸ້ນຕໍ່ໄປສືບທອດລຸ້ນພໍ່ລຸ້ນອ້າຍໃນການຕໍ່ສູ້ປົກປັກຮັກສາອະທິປະໄຕໝູ່ເກາະ ຮ່ວາງຊາ - ເຈື່ອງຊາ”
ໄລຍະເວລາໃກ້ໆນີ້, ສະມາຄົມວັນນະຄະດີ ສິລະປະ, ສະມາຄົມນັກຂ່າວແຂວງ ແຄ໋ງຮ່ວາ ຈະຈັດຕັ້ງງານວາງສະແດງເຄື່ອນທີ່ກ່ຽວກັບໝູ່ເກາະ ເຈື່ອງຊາ ຢູ່ທ້ອງຖິ່ນຕ່າງໆ ແລະ ບັນດາໂຮງຮຽນ ໃນບໍລິເວນແຂວງ.