(vovworld) – ຕອນເຊົ້າວັນທີ 4/5, ແຂວງ ດ້ຽນບຽນໄດ້ຈັດຕັ້ງພິທີເປີດສະຫຼອງເສັ້ນທາງຈາກ ປອນລອດ ໄປ ນົ້ວງາມ - ເມື່ອງຍ່າ - ເມື່ອງລ໋ອຍ ເຖິງດ່ານຊາຍແດນ ຫ້ວຍປວກ. ເສັ້ນທາງນີ້ມີຄວາມຍາວກ່ວາ 80 ກມ ໂດຍກອງບັນຊາການທະຫານແຂວງ ດ້ຽນບຽນ ເປັນເຈົ້າຂອງລົງທຶນ ດ້ວຍຍອດຈຳນວນເງິນລົງທຶນກ່ວາ 1.300 ຕື້ດົ່ງ, ເຊິ່ງເລີ່ມຜັນຂະຫຍາຍແຕ່ປີ 2011. ເສັ້ນທາງໄດ້ຮັບການກໍ່ສ້າງສຳເລັດ ຈະປະກອບສ່ວນຫລຸດຜ່ອນໄລຍະທາງຈາກນະຄອນ ດ້ຽນບຽນຝູ ໄປຫຼວງພະບາງ (ລາວ) ເກືອບ 100 ກມ. ນີ້ແມ່ນໜຶ່ງໃນບັນດາກິດຈະກຳແທດຈິງເພື່ອສະເຫຼີມສະຫຼອງ 60 ປີແຫ່ງໄຊຊະນະ ດ້ຽນບຽນຝູ. ພົນຈັດຕະວາ ລືວຈ້ອງລື, ຫົວໜ້າກອງບັນຊາການທະຫານແຂວງ ດ້ຽນບຽນ, ໃຫ້ຮູ້ວ່າ:
“ເສັ້ນທາງດັ່ງກ່າວໄດ້ຮັບການກໍ່ສ້າງສຳເລັດຈະປະກອບສ່ວນເຊື່ອມຕໍ່ທາງຄົມມະນາຄົມ, ຂົນສົ່ງ, ປະກອບສ່ວນປັບປຸງຊີວິດການເປັນຢູ່ຂອງປະຊາຊົນ, ຮັບປະກັນຊີວິດສັງຄົມ ແລະ ຕິດພັນກັບການປັບປຸງການປ້ອງກັນຊາດ - ປ້ອງກັນຄວາມສະຫງົບໃນເສັ້ນຊາຍແດນທີ່ຕິດກັບ ລາວ ມີລວງຍາວ 360 ກມ ແລະ ປະກອບສ່ວນປົກປັກຮັກສາຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຢູ່ທາງທິດຕາເວັນຕົກແຂວງ ດ້ຽນບຽນ. ນີ້ກໍ່ແມ່ນກິດຈະກຳຈຸດສຸມເຊິ່ງກຳລັງປະກອບອາວຸດແຂວງ ດ້ຽນບຽນ ໄດ້ຮັບມອບໝາຍເປັນເຈົ້າຂອງລົງທຶນ”