(VOVWORLD) -ທ່ານປະທານປະເທດ ຫງວຽນຊວັນຟຸກ ໄດ້ຕີລາຄາສູງເລື່ອງອຳນາດການປົກຄອງ ແລະ ປະຊາຊົນນະຄອນ ມີບັນດາມາດຕະການຢ່າງຂ້ຽວຂາດ, ມີປະສິດທິຜົນໃນໄລຍະກວ່າ 2 ເດືອນແຫ່ງການຕ້ານໂລກລະບາດ.
 ທ່ານປະທານປະເທດຫວຽດນາມ ຫງວຽນຊວັນຟຸກ ເປັນປະທານການເຮັດວຽກກັບການນຳຫຼັກແຫຼ່ງນະຄອນ(ພາບ: TTXVN)
|
ຕອນເຊົ້າວັນທີ 18 ສິງຫາ, ຢູ່ນະຄອນ ບັກຢາງ, ທ່ານປະທານປະເທດຫວຽດນາມ ຫງວຽນຊວັນຟຸກ ໄດ້ເປັນປະທານການເຮັດວຽກກັບການນຳຫຼັກແຫຼ່ງຂອງນະຄອນກ່ຽວກັບສະພາບການປະຕິບັດໜ້າທີ່ເສດຖະກິດສັງຄົມ. ກ່າວຄຳເຫັນທີ່ການເຮັດວຽກ, ທ່ານປະທານປະເທດ ຫງວຽນຊວັນຟຸກ ໄດ້ຕີລາຄາສູງເລື່ອງອຳນາດການປົກຄອງ ແລະ ປະຊາຊົນນະຄອນ ມີບັນດາມາດຕະການຢ່າງຂ້ຽວຂາດ, ມີປະສິດທິຜົນໃນໄລຍະກວ່າ 2 ເດືອນແຫ່ງການຕ້ານໂລກລະບາດ. ມາຮອດປະຈຸບັນ, ກວ່າ 36 ວັນທີ່ ບັກຢາງ ບໍ່ມີກໍລະນີຕິດເຊື້ອພະຍາດໃໝ່, ບັນຍາກາດຟື້ນຟູການຜະລິດດຳເນີນທຸລະເກິດແມ່ນຟົດຟື້ນທີ່ສຸດ. ນີ້ແມ່ນຜົນງານດີທີ່ສຸດ, ປະກອບສ່ວນເຂົ້າໃນຜົນງານລວມຂອງທົ່ວປະເທດໃນການປ້ອງກັນ, ຕ້ານໂລກລະບາດ ແລະ ແມ່ນບົດຮຽນທີ່ດີສຳລັບຫຼາຍທ້ອງຖິ່ນໃນທົ່ວປະເທດ.
ທ່ານປະທານປະເທດຖືວ່າ, ເລື່ອງບັນລຸໄດ້ໝາກຜົນນັ້ນແມ່ນບົດຮຽນທີ່ດີຂອງ ບັກຢາງ ໃນການປ້ອງກັນ, ຕ້ານໂລກລະບາດໂຄວິດ-19. ນັ້ນແມ່ນແຍກຫ່າງສັງຄົມຢ່າງທັນການ; ຮັບປະກັນຊີວິດສັງຄົມໃຫ້ແກ່ປະຊາຊົນ; ຕັ້ງໜ້າປິ່ນປົວໃຫ້ຜູ້ຕິດເຊື້ອພະຍາດໂຄວິດ-19; ຕັ້ງໜ້າຂົນຂວາຍການສັກວັກຊິນໃຫ້ແກ່ບັນດາເປົ້າໝາຍບຸລິມະສິດຕາມລຳດັບ. ທ່ານກ່າວວ່າ:
“ຜົນສຳເລັດໃນການປະຕິບັດເປົ້າໝາຍຄວບຄູ່ຂອງ ບັກຢາງ ນັ້ນແມ່ນຍ້ອນມີການຕັດສິນໃຈຢ່າງເດັດດ່ຽວໃນການເລືອກເອົາຈຸດເວລາປະຕິບັດການແຍກຫ່າງໄດ້ຢ່າງຖືກຕ້ອງ ແລະ ທັນການ, ຮັກສາລະບຽບວິໄນໃນການແຍກຫ່າງໄດ້ຢ່າງເຂັ້ມງວດ, ຈຳກັດການຕິດແປດສະຫຼັບກັນ. ປິ່ນປົວໃຫ້ແກ່ກໍລະນີ F0, F1 ໄດ້ຢ່າງທັນການ ແລະ ຈັດແບ່ງໄດ້ຢ່າງວ່ອງໄວ. ລະບົບການເມືອງມີການເຂົ້າຮ່ວມຢ່າງແຮງໃນທຸກຂັ້ນ, ສຸມໃສ່ຊີ້ນຳນຳພາ, ມີຄວາມເປັນເອກະພາບ, ມີປະສິດທິຜົນ ແລະ ປະສິດທິພາບ. ມີຫຼາຍຮູບແບບປະດິດຄິດສ້າງ ເປັນຕົ້ນແມ່ນສ້າງຂອບອ້ອມປ້ອງກັນເຂດຜະລິດໝາກລີ້ນຈີ່, ວາງຂາຍໝາກລີ້ນຈີ່ໃນສູນການຄ້າເອເລັກໂຕນິກ, ບວກກັບການຮ່ວມມືລະຫວ່າງພາກລັດ ແລະ ພາກເອກະຊົນໃນການປ້ອງກັນ, ຕ້ານໂລກລະບາດ. ລະຫວ່າງພະແນກຕ່າງໆມີການສົມທົບກັນຢ່າງກົມກ່ຽວ, ມີນະໂຍບາຍສະເໝີຕົ້ນສະເໝີປາຍ, ລຸລ່ວງ. ນີ້ແມ່ນບັນດາບົດຮຽນທີ່ອາດຈະຫັນເປັນມາດຖານ ເພື່ອນຳໃຊ້ໃນຫຼາຍທ້ອງຖິ່ນອື່ນໆໃນທົ່ວປະເທດ.”