ພິທີມອບໃບຮັບຮອງມໍລະດົກປະຫວັດສາດລະດັບຊາດໃຫ້ປູຊະນີຍະສະຖານ 2 ແຫ່ງ
(ພາບ: baokhanhhoa.com)
(vovworld) - ຕອນເຊົ້າວັນທີ 17/7, ຢູ່ນະຄອນຍາຈາງ, ທ່ານລັດຖະມົນຕີກະຊວງວັດທະນະທຳ ກິລາ ແລະ ທ່ອງທ່ຽວ ຮ່ວາງຕ໋ວນແອງ, ໄດ້ມອບໃບຮັບຮອງມໍລະດົກປະຫວັດສາດລະດັບຊາດໃຫ້ປູຊະນີຍະສະ ຖານ 2 ແຫ່ງແມ່ນ ສະຖານທີ່ຮັກສາກຳ່ປັ່ນ C235 ແລະ ສີລາເລກອະທິປະໄຕໝູ່ເກາະເຈື່ອງຊາ ໃຫ້ຜູ້ຕາງໜ້າທ້ອງຖີ່ນຕ່າງໆ.
ປູຊະນີຍະສະຖານສີລາເລກອະທິປະໄຕໝູ່ເກາະເຈື່ອງຊາຢູ່ເກາະຊອງຕືໄຕ ແລະ ເກາະນາມອຽດ ໂດຍຫວຽດນາມກໍ່ສ້າງແຕ່ປີ 1956. ໃນ ສີລາເລກອະທິປະໄຕ 2 ແຜ່ນໄດ້ລະບຸຢ່າງຈະແຈ້ງວ່າ: “ໝູ່ເກາະເຈື່ອງຊາແມ່ນຂຶ້ນກັບແຂວງເຟືອກຕູຍ“. ທ່ານລັດຖະມົນຕີກະຊວງວັດທະນະທຳ ກິລາ ແລະ ທ່ອງທ່ຽວ ຮ່ວາງຕ໋ວນແອງ ຢືນຢັນວ່າ, ປູຊະນີຍະສະຖານສີລາເລກອະທິປະໄຕຢູ່ໝູ່ເກາະເຈື່ອງຊາ ແມ່ນພະຍານຫຼັກຖານປະຫວັດສາດສຳຄັນເຊິ່ງໄດ້ລະບຸໄວ້ຢ່າງລະອຽດກ່ຽວກັບການຄຸ້ມຄອງຢ່າງຕໍ່ເນື່ອງ, ຮອບດ້ານຂອງຫວຽດນາມ ທີ່ມີຕໍ່ໝູ່ເກາະເຈື່ອງຊາ.
“ເລື່ອງຈັດອັນດັບໃຫ້ສີລາເລກອະທິປະໄຕ 2 ແຜ່ນຢູ່ໝູ່ເກາະເຈື່ອງຊາ ແມ່ນສະແດງໃຫ້ເຫັນທ່າທີເຄົາລົບ ແລະ ນຳ້ໃຈຕັດສິນໃຈປົກປັກຮັກສາອະທິປະໄຕໝູ່ເກາະ, ທະເລຂອງປະເທດຊາດ, ປະກອບສ່ວນປຸກລຸກນຳ້ໃຈຮັກຊາດ ແລະ ມູນເຊື້ອວິລະຊົນຂອງຊາວຫວຽດນາມ“.
ສ່ວນ ປູຊະນີຍະສະຖານບ່ອນຮັກສາກຳ່ປັ່ນ C235 - ທາງໂຮ່ຈີມິນບົນທະເລ, ແມ່ນຕິດພັນກັບເຫດການປີ 1968 ຢູ່ເຂດທະເລ ຮ່ອນແຮ່ວ, ຕາແສງນິງເວີນ, ເທດສະບານນິງຮ່ວາ, ບັນດານັກຮົບໃນກຳປັ່ນບໍ່ມີໝາຍເລກ C235 ໂດຍກັບຕັນເຮືອ ຫງວຽນຟານວິງ ບັນຊາ ໄດ້ຂົນສົ່ງສິນຄ້າລຳລຽງໃຫ້ສະໜາມຮົບຢູ່ທິດໃຕ້ພາກກາງໄດ້ຕໍ່ສູ້ຢ່າງພິລະອາກຫານກັບກຳ່ປັ່ນສູ້ຮົບ 7 ລຳ ແລະ ກອງປະຕິບັດງານພິເສດ 2 ກອງຂອງສັດຕູ ແລະ ກຳ່ປັ່ນ C235 ໄດ້ປ່ອຍສິນຄ້າລົງທະເລຢ່າງປອດໄພ ແລະ ທຳລາຍກຳ່ປັ່ນໂດຍທັນທີ. ພະນັກງານ ແລະ ນັກຮົບ 14 ຄົນໃນກຳ່ປັ່ນດັ່ງກ່າວໄດ້ເສຍສະຫຼະຊີວິດຢ່າງພິລະອາດຫານ. ສ່ວນກັບຕັນເຮືອ ຫງວຽນຟານວິງ ໄດ້ຮັບນາມມະຍົດວິລະຊົນກຳລັງປະກອບອາວຸດປະຊາຊົນຈາກລັດ.