(vovworld) - ໃນລະຫວ່າງວັນທີ 4 - 5/5, ຄະນະປະຈຳສະພາແຫ່ງຊາດວຫວຽດນາມ ໄດ້ຈັດວາລະປະຊຸມຄັ້ງທີ 8 ຢູ່ຮ່າໂນ້ຍ, ພາຍໃຕ້ການເປັນປະທານຂອງທ່ານປະທານສະພາແຫ່ງຊາດ Nguyen Sinh Hung. ເຂົ້າຮ່ວມວາລະປະຊຸມ, ມີຜູ້ຕາງໜ້າຜູ້ປະຈຳການສະພາຊົນເຜົ່າ, ບັນດາກຳມະທິການຂອງສະພາແຫ່ງຊາດ, ຜູ້ຕາງໜ້າການນຳກະຊວງ, ຂະແໜງການ, ອົງການຈັດຕັ້ງທີ່ກ່ຽວຂ້ອງຈຳນວນໜຶ່ງ. ຄະນະປະຈຳສະພາແຫ່ງຊາດ ໄດ້ໃຫ້ຄຳເຫັນກ່ຽວກັບການເພີ່ມເຕີມບາງໂຄງການໃໝ່ ທີ່ຍັງບໍ່ທັນມີໃນບັນຊີລາຍຊື່ກຳນົດ ແລະ ໂຄງການທີ່ມີການດັດປັບຂອບຂະໜາດ: ຄະນະປະຈຳສະພາແຫ່ງຊາດໄດ້ເຫັນດີເຫັນພ້ອມໂດຍພື້ນຖານ ກັບຂໍ້ສະເໜີຂອງລັດຖະບານກ່ຽວກັບການເພີ່ມເຕີມ 4 ໂຄງການໃໝ່, 5 ໂຄງການພາກສ່ວນທີ່ຂື້ນກັບໂຄງການທາງແຄມທະເລແຂວງ ນິນທ້ວນ ເຂົ້າບັນຊີລາຍຊື່ບັນດາໂຄງການ, ກິດຈະກຳ ໄດ້ຈັດແບ່ງທຶນຈາກພັນທະບັດລັດຖະບານໄລຍະ 2012 – 2015. ຄະນະປະຈຳສະພາແຫ່ງຊາດ ໄດ້ເຫັນດີເຫັນພ້ອມກັບລັດຖະບານກ່ຽວກັບການແຈກຢາຍຈຳນວນເງິນ 5.500 ຕື້ດົ່ງຈາກພັນທະບັດລັດຖະບານ ໃຫ້ແກ່ 19 ໂຄງການທີ່ຂຶ້ນກັບຂົງເຂດຊົນລະປະທານໃຫຍ່ຢູ່ບັນດາແຂວງເຂດພູດອຍທາງພາກເໜືອ, ພາກກາງ ແລະ ໄຕງວຽນ, ໃຫ້ຄຳເຫັນກ່ຽວກັບຈຸດໝາຍ, ໜ້າທີ່, ເວລາປະຕິບັດ ແລະ ແຫຼ່ງກຳລັງລະອຽດ ຂອງບັນດາໂຄງການພາກສ່ວນ ທີ່ຂຶ້ນກັບແຕ່ລະໂຄງການຈຸດໝາຍແຫ່ງຊາດໄລຍະ 2012 – 2015. ຄະນະປະຈຳສະພາແຫ່ງຊາດໄດ້ເຫັນດີໂດຍພື້ນຖານກັບວິທີຈັດແບ່ງຈຳນວນເສດໃນແຜນລາຍຈ່າຍງົບປະມານສູນກາງ ແລະ ເງິນເຫຼືອຈາກລາຍຮັບງົບປະມານສູນກາງ ປີ 2011, ສະເໜີດັດປັບການຈັດແບ່ງສຳລັບຈຳນວນເງິນໜູນຊ່ວຍຜູ້ມີຄຸນງາມຄວາມດີຕໍ່ການປະຕິວັດ ປັບປຸງເຮືອນຢູ່. ແລະກໍຢູ່ວາລະປະຊຸມຄັ້ງນີ້, ຄະນະປະຈຳສະພາແຫ່ງຊາດສືບຕໍ່ໃຫ້ຄຳເຫັນກ່ຽວກັບການກະກຽມກອງປະຊຸມສະໄໝສາມັນເທື່ອທີ 3 ສະພາແຫ່ງຊາດຊຸດທ 13, ແຜນຮ່າງສືບຕໍ່ປ່ຽນໃໝ່, ຍົກສູງຄຸນນະພາບ, ປະສິດທິຜົນການເຄື່ອນໄຫວຂອງສະພາແຫ່ງຊາດ, ຮັບຮອງເອົາມະຕິກ່ຽວກັບການປະຕິບັດນະໂຍບາຍ, ກົດໝາຍທີ່ມີຕໍ່ຜູ້ມີຄຸນງາມຄວາມດີຕໍການປະຕິວັດ ແລະ ໃຫ້ຄຳເຫັນກ່ຽວກັບວຽກງານ ບຸກຄະລາກອນ.