(vovworld) - ເນື່ອງໃນໂອກາດທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ຢ້ຽມຢາມປະເທດສາທາລະນະລັດປະຊາຊົນຈີນ ຢ່າງເປັນທາງການ, ໃນລະຫວ່າງວັນທີ 10 – 15/09. ວັນທີ 14/09, 2 ປະເທດໄດ້ອອກແຈ້ງການຮ່ວມຫວຽດນາມ - ຈີນ. ແຈ້ງການຊີ້ແຈ້ງວ່າ: ໃນໄລຍະຢູ່ຢ້ຽມຢາມຈີນ, ທ່ານນາຍົກລັດຖະມົນຕີ ຫງວຽນຊວງຟຸກ ໄດ້ມີການພົບປະກັບບັນດາການນຳ ຂອງຈີນ, ເຂົ້າຮ່ວມງານຕະຫຼາດນັດຈີນ - ອາຊຽນ ແລະ ກອງປະຊຸມສຸດຍອດການຄ້າ ແລະ ການລົງທຶນຈີນ - ອາຊຽນ ຄັ້ງທີ 13…
ທີ່ບັນດາການພົບປະຄັ້ງຕ່າງໆ, 2 ຝ່າຍໄດ້ແລກປ່ຽນຄຳເຫັນ ແລະ ບັນລຸໄດ້ຄວາມຮັບຮູ້ລວມຢ່າງກ້ວາງຂວາງກ່ຽວກັບເລື່ອງເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ - ຈີນ ເລິກເຊິ່ງ, ກວ້າງຂວາງກວ່າ ໃນສະພາບການໃໝ່, ກໍຄືກ່ຽວກັບບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ. 2 ຝ່າຍຈະຢືດໝັ້ນເຄົາລົບເຊິ່ງກັນ ແລະ ກັນ, ເພີ່ມທະວີການແລກປ່ຽນຍຸດທະສາດ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ເຮັດໃຫ້ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃຫ້ເລິກເຊິ່ງກວ່າ, ຄວບຄຸມ ແລະ ແກ້ໄຂບັນດາຂໍ້ຕິດຄັດທີ່ຍັງຄົງຄ້າງຢ່າງສົມເຫດສົມຜົນ ແລະ ບັນດາບັນຫາເກີດຂຶ້ນ… 2 ຝ່າຍເຫັນດີຮັກສາການພົບປະທີ່ເປັນມູນເຊື້ອລະຫວ່າງການນຳຂັ້ນສູງຂອງ 2 ພັກ, 2 ລັດ. 2 ຝ່າຍ ເຫັນດີນຳໃຊ້ບັນດາມາດຕະການທີ່ມີປະສິດທິຜົນ ແລະ ມີຜົນປະໂຫຍດເພື່ອຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ 2 ຝ່າຍສືບຕໍ່ໄດ້ຮັບການພັດທະນາເປັນປົກກະຕິ, ນຳມາເຊິ່ງຜົນປະໂຫຍດໃຫ້ແກ່ການພັດທະນາເສດຖະກິດ ແລະ ປັບປຸງຊີວິດການເປັນຢູ່ຂອງປະຊາຊົນ 2 ປະເທດ. 2 ຝ່າຍໄດ້ແລກປ່ຽນຄຳເຫັນຢ່າງກົງໄປກົງມາກ່ຽວກັບບັນຫາບົນທະເລ, ເຫັນດີສືບຕໍ່ເຄົາລົບຄວາມຮັບຮູ້ລວມສຳຄັນເຊິ່ງການນຳຂັ້ນສູງລະຫວ່າງ 2 ພັກ, 2 ລັດບັນລຸໄດ້, “ຂໍ້ຕົກລົງກ່ຽວກັບບັນດາຫຼັກການພື້ນຖານຊີ້ນຳການແກ້ໄຂບັນຫາບົນທະເລຫວຽດນາມ - ຈີນ”, ນຳໃຊ້ກົນໄກເຈລະຈາຂັ້ນລັດຖະບານກ່ຽວກັບເຂດຊາຍແດນຫວຽດນາມ - ຈີນ, ຊອກຫາມາດຕະການແກ້ໄຂໂດຍພື້ນຖານ ແລະ ຍາວນານເຊິ່ງ 2 ຝ່າຍສາມາດຮັບຮູ້ໄດ້.
ນອກນັ້ນ, ໃນໄລຍະຢູ່ຢ້ຽມຢາມຈີນ, 2 ຝ່າຍກໍ່ໄດ້ລົງນາມໃນສັນຍາຮ່ວມມືຫວຽດນາມ - ຈີນ ຫຼາຍສະບັບອີກດ້ວຍ.