(vovworld) – ວັນທີ 15/07, ຄະນະກຳມະການສູນກາງແນວໂຮມປະເທດຊາດຫວຽດນາມ ສົມທົບກັບແຂວງລ້າງເຊີນ ຈັດຕັ້ງການໂອ້ລົມສົນທະນາກ່ຽວກັບ “ສະພາບຕົວຈິງ, ມາດຕະການແກ້ໄຂຍູ້ແຮງຂະບວນການທົ່ວປວງຊົນເຂົ້າຮ່ວມການຮັບປະກັນຄວາມເປັນລະບຽບຮຽບຮ້ອຍ, ປອດໄພດ້ານຄົມມະນາຄົມ” ແລະ “ແນວໂຮມປະເທດຊາດເຂົ້າຮ່ວມການກໍ່ສ້າງຊົນນະບົດໃໝ່” ຢູ່ແຂວງລ້າງເຊີນ. ເຂົ້າຮ່ວມການໂອ້ລົມສົນທະນາມີຜູ້ແທນກວ່າ 100 ຄົນທີ່ມາຈາກ 13 ແຂວງພູດອຍທາງພາກເໜືອຫວຽດນາມ ແລະ ມີການນຳຂັ້ນຕ່າງໆບັນດາຂະແໜງການທີ່ກ່ຽວຂ້ອງໄດ້ເຂົ້າຮ່ວມ. ກ່າວຄຳເຫັນທີ່ພິທີ, ທ່ານນາງ ຮ່າທິລຽນ, ຮອງປະທານຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ຮູ້ວ່າ: ດ້ວຍຄວາມຄ້າຍຄືກັນກ່ຽວກັບເງື່ອນໄຂດ້ານພູສາດ, ເສດຖະກິດ, ສັງຄົມ, ພື້ນຖານໂຄງລ່າງຂອງບັນດາແຂວງພູດອຍທາງພາກເໜືອ, ຄະນະກຳມະການແນວໂຮມປະເທດຊາດ ແລະ ພະແນກຄວາມປອດໄພດ້ານຄົມມະນາຄົມບັນດາແຂວງໄດ້ເປັນເຈົ້າການສົມທົບກັນ, ຜັນຂະຫຍາຍບັນດາແຜນການ, ໂຄງການແນໃສ່ສ້າງຂະບວນການ “ທົ່ວປວງຊົນເຂົ້າຮ່ວມການຮັບປະກັນຄວາມປອດໄພດ້ານຄົມມະນາຄົມ” ໄດ້ເປັນຢ່າງດີ. ທ່ານນາງ ຮ່າທິລຽນ ກໍ່ສະເໜີໃຫ້ແນວໂຮມປະເທດຊາດບັນດາແຂວງດັ່ງກ່າວ ບົນພື້ນຖານພາລະໜ້າທີ່ຂອງຕົນ ເຂົ້າຮ່ວມວິກິດການກໍ່ສ້າງຊົນນະບົດໃໝ່ ຕິດພັນກັບການປະຕິບັດບັ້ນຂົນຂວາຍ “ທົ່ວປວງຊົນສາມັກຄີກໍ່ສ້າງຊີວິດວັດທະນະທຳຢູ່ເຂດຊຸມຊົນ” ເປັນຢ່າງດີ.