(vovworld) – ຕອນເຊົ້າວັນທີ 13/7, ຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ສະມາຄົມພຸດທະສາສະໜາຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນພຸດທະສາສະໜາແຫ່ງລາຊະອານາຈັກ ກຳປູເຈຍ ໂດຍພະມະຫາພິກຂຸ Tep Vong ເປັນຫົວໜ້າຄະນະ, ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທີ່ການຕ້ອນຮັບ, ທ່ານຮອງປະທານ ທັງເປັນເລຂາທິການໃຫຍ່ຄະນະກຳມະການແນວໂຮມປະເທດຊາດຫວຽດນາມ Vu Trong Kim ໄດ້ເນັ້ນໜັກວ່າ ການຢ້ຽມຢາມຫວຽດນາມ ຂອງຄະນະຜູ້ແທນພຸດທະສາສະໜາ ກຳປູເຈຍ ໄດ້ດຳເນີນໄປໃນຈຸດເວລາທີ່ປະຊາຊົນສອງປະເທດຫວຽດນາມ - ກຳປູເຈຍ ພວມຈັດຕັ້ງບັນດາການເຄື່ອນໄຫວພົບປະມິດຕະພາບເພື່ອສະເຫຼີມສະຫຼອງ “ປີມິດຕະພາບຫວຽດນາມ - ກຳປູເຈຍ” ແລະ 45 ປີແຫ່ງວັນສ້າງສາຍພົວພັນທາງການທູດ, ຊຶ່ງຈະປະກອບສ່ວນຊຸກຍູ້ສາຍພົວພັນຖານບ້ານໃກ້ເຮືອນຄຽງ, ມິດຕະພາບທີ່ເປັນມູນເຊື້ອ ແລະ ການຮ່ວມມືຢ່າງຮອບດ້ານລະຫວ່າງຫວຽດນາມ - ກຳປູເຈຍ ເຂົ້າສູ່ລວງເລິກ, ມີສະຖຽນລະພາບ ແລະ ໝັ້ນຄົງ. ທ່ານຮອງປະທານ Vu Trong Kim ກໍຊີ້ແຈ້ງວ່າ ດ້ວຍບົດບາດ, ໜ້າທີ່ຂອງຕົນ, ຄະນະກຳມະການແນວໂຮມປະເທດຊາດຫວຽດນາມ ໄດ້ຮ່ວມມືກັບສະພາແນວໂຮມສາມັກຄີພັດທະນາປະເທດຊາດກຳປູເຈຍ ຜັນຂະຫຍາຍປະຕິບັດບັນດາຖະແຫຼງການຮ່ວມ ແລະ ໂຄງການຮ່ວມມື; ຢືນຢັນຄວາມຕັດສິນໃຈຂອງປະຊາຊົນສອງປະເທດຈະປັບປຸງ ແລະ ເພີ່ມທະວີສາຍພົວພັນອັນດີງາມລະຫວ່າງຫວຽດນາມ - ກຳປູເຈຍໃຫ້ດີຍິ່ງໆຂຶ້ນ.