ຮູບເງົາ “ຊີວິດຂອງນາງ ອ໋ຽນ”
(ພາບ: ງອກມາຍ/ຫວຽດນາມ+)
(vovworld) - ວັນທີ 30/08, ຜູ້ຕາງໜ້າສະຖານທູດບັນດາປະເທດ ໄທ, ຟີລີບປິນ, ອິນໂດເນເຊຍ, ມາເລເຊຍ ແລະ ຫວຽດນາມ ໃນຄະນະກຳມະການ ອາຊຽນ ຢູ່ Praha (ACP) ໄດ້ຈັດການປະຊຸມຂ່າວແນະນຳສັບປະດາຮູບເງົາ ອາຊຽນ ຄັ້ງທີ 5 ຢູ່ ສ.ເຊັກໂກ. ຕາມນັ້ນແລ້ວ, ຮູບເງົາທີ່ດີເດັ່ນ 5 ເລື່ອງຂອງ 5 ປະເທດ ອາຊຽນ ຢູ່ ສ.ເຊັກໂກ ຈະໄດ້ນຳມາສາຍຮັບໃຊ້ມະຫາຊົນ ເຊັກໂກ ນັບແຕ່ວັນທີ 13 – 17/09 ຈະມາເຖິງ. ບັນດາຮູບເງົາສ່ວນຫລາຍໄດ້ຮັບການເລືອກເຟັ້ນມາສາຍໃນຄັ້ງນີ້ ລ້ວນແຕ່ຂຶ້ນກັບປະເພດເລື່ອງຄວາມຮັກ, ຈິດຕະສັງຄົມ ສ່ອງແສງການພົວພັນລະຫວ່າງມະນຸດໃນສັງຄົມ ຫຼື ຄວາມມຸ່ງຫວັງຊອກຫາຄຸນຄ່າແທ້ຈິງ ຂອງການດຳລົງຊີວິດ, ຂອງຄວາມຮັກ. ປີນີ້, ຫວຽດນາມ ແນະນຳຮູບເງົາເລື່ອງທີ່ມີຊື່ວ່າ “ຊີວິດຂອງນາງ ອ໋ຽນ”. ທ່ານ ຫວູວັນມີງ ທີ່ປຶກສາການເມືອງ ສະຖານທູດ ຫວຽດນາມ ປະຈຳ ສ.ເຊັກໂກ ໃຫ້ຮູ້ວ່າ:
“ຮູບເງົາ ຊີວິດຂອງນາງ ອ໋ຽນ ເວົ້າກ່ຽວກັບຮີດຄອງປະເພນີຂອງສັງຄົມໃນສະໄໝຫົວເມືອງຂຶ້ນເຄິ່ງສັກດີນາ ສຳລັບແມ່ຍິງ ຫວຽດນາມ ຢູ່ເຂດບ້ານນາພາກເໜືອ. ຢູ່ແຫ່ງນັ້ນ ປະຊາຊົນເກືອບຄືວ່າບໍ່ມີບົດບາດໃນສັງຄົມ, ບໍ່ໄດ້ໄປໂຮງຮຽນ…ຮູບເງົານີ້ ໄດ້ສະແດງຊ່ວຍໃຫ້ຜູ້ຊົມ ສ.ເຊັກໂກ ເຂົ້າໃຈປະຫວັດຊາດ, ວັດທະນະທຳ ແລະ ຮີດຄອງປະເພນີຂອງຊາວ ຫວຽດນາມ ຜ່ານແຕ່ລະໄລຍະປະຫວັດສາດ.”
ສັບປະດາຮູບເງົາ ອາຊຽນ ຢູ່ ສ.ເຊັກໂກ ແມ່ນເຫດການວັດທະນະທຳ ຖືກສະຖານທູດ 5 ປະເທດໃນຄະນະກຳມະການ ອາຊຽນ ຢູ່ Praha ຈັດຕັ້ງເປັນປະຈຳປີ ເພື່ອແນໃສ່ແນະນຳພື້ນຖານວັດທະນະທຳເປັນເອກະລັກຂອງ ອາຊຽນ ເວົ້າລວມ ແລະ ບັນດາປະເທດສະມາຊິກເວົ້າສະເພາະໃຫ້ແກ່ມະຫາຊົນ ສ.ເຊັກໂກ.