(vovworld)- ບັນດາສະຖາບັນຂອງອົດສະຕາລີ ພວມສົນໃຈເຖິງບັນດາການຜັນແປເຄັ່ງຕຶງປະຈຸບັນຢູ່ທະເລຕາເວັນອອກ, ກ່ຽວຂ້ອງເຖິງເລື່ອງຈີນ ຕັ້ງຮ້ານເຈາະນ້ຳມັນຢູ່ເຂດເສດຖະກິດຈຳເພາະ ແລະ ເຂດໄຫລ່ທະວີບຂອງຫວຽດນາມ. ວັນທີ 28/5, ດຣ ຮ່ວາງແອງຕວນ, ຫົວຫນ້າສະຖາບັນຄົ້ນຄ້ວາຍຸດທະສາດການທູດດ ສະຖາບັນການທູດ ໄດ້ເຮັດວຽກກັບສູນຄົ້ນຄ້ວາອາເມລິກາ ສັງກັດມະຫາວິທະຍາໄລ Sydney ແລະ ສະຖາບັນຄົ້ນຄວ້ານະໂຍບາຍສາກົນ Lowy ຂອງອົດສະຕາລີ ກ່ຽວກັບບັນຫານີ້. ດຣ ຮ່ວາງແອງຕວນ ໄດ້ລາຍງານເຖິງການກະທຳຂອງຈີນ ຢູ່ ທະເລຕາເວັນອອກ ພ້ອມທັງຢືນຢັນ: ບັນດາການກະທຳຂອງຈີນຕັ້ງຮ້ານເຈາະນ້ຳມັນຢູ່ເຂດເສດຖະກິດຈຳເພາະ ແລະ ເຂດໄຫລ່ທະວີບຂອງຫວຽດນາມ ພ້ອມທັງຜັນຂະຫຍາຍບັນດາກຳປັ່ນຮົບ ແລະ ເຮືອບິນ ແມ່ນການກະທຳລະເມີດສິດອະທິປະໄຕ ແລະ ອຳນາດສານຂອງຫວຽດນາມ, ລະເມີດກົດບັດ ສປຊ, ສົນທິສັນຍາ ສປຊ ກ່ຽວກັບກົດໝາຍທະເລປີ 1982, ຝືນກັບເນື້ອໃນຈິດໃຈຂອງຖະແຫລງການປະພຶດຂອງບັນດາຝ່າຍຢູ່ທະເລຕາເວັນອອກ.
ບັນດານັກຮຽນຮູ້ ແລະ ຜູ້ຊ່ຽວຊານ ອົດສະຕາລີ ໄດ້ແລກປ່ຽນກ່ຽວກັບຈຸດປະສົງຂອງຈີນ ໃນການຕັ້ງຮ້ານເຈາະນ້ຳມັນຢ່າງຜິດກົດໝາຍ, ແລະ ທັດສະນະຂອງ ອາຊຽນ ກ່ຽວກັບບັນຫານີ້, ນະໂຍບາຍດຸ່ນດ່ຽງຄືນໃຫມ່ຂອງອາເມລິກາ, ນະໂຍບາຍເພີ່ມທະວີຜົນສະທ້ອນຂອງຈີນ ກໍຄືບັນດາບາດກ້າວຍຸດທະສາດຂອງຫວຽດນາມ ເພື່ອແກ້ໄຂບັນຫາຢູ່ທະເລຕາເວັນອອກ.
ຮ້ານເຈາະນ້ຳມັນຂອງຈີນຢູ່ເຂດເສດຖະກິດຈຳເພາະຂອງຫວຽດນາມ
ພາບ:xahoi.com.vn
|
ກອງປະຊຸມໃຫ້ຄຳປຶກສາຂອງສປຊກ່ຽວກັບມະຫາສະໝຸດແລະກົດໝາຍທະເລ
(vovworld)- ແຕ່ວັນທີ 27-30/5, ກອງປະຊຸມຄັ້ງທີ 15 ວິວັດການໃຫ້ຄຳປືກສາຂອງ ສປຊ ກ່ຽວກັບມະຫາສະໝຸດ ແລະ ກົດໝາຍທະເລ ພາຍໃຕ້ຫົວເລື່ອງວ່າ:“ບົດບາດຂອງສິນໃນນ້ຳ-ສິນທະເລສຳລັບການຄ້ຳປະກັນສະບຽງ ອາຫານທົ່ວໂລກ ຖືກຈັດຂຶ້ນຢູ່ ສຳນັກງານ ສປຊ ທີ່ນະຄອນ ນິວຢອກ ສະຫະລັດ ອາເມລິກາ. ທີ່ກອງປະຊຸມ, ຫົວຫນ້າຄະນະຜູ້ແທນຫວຽດນາມ ມີບົດກ່າວປາໄສຢືນຢັນບົດບາດສຳຄັນຂອງສິນໃນນ້ຳ- ສິນທະເລ ສຳລັບການຄ້ຳປະກັນສະບຽງອາຫານ, ພິເສດແມ່ນຢູ່ບັນດາປະເທດມີຝ່ັງທະເລຍາວ, ມີພົນລະເມືອງເປັນຈຳນວນຫລວງຫລາຍຄື ຫວຽດນາມ. ຝ່າຍຫວຽດນາມ ໄດ້ຮຽກຮ້ອງບັນດາປະເທດຮ່ວມມືກັນເພືອ່ສ້າງລະບອບຄຸ້ມຄອງຢ່າງມີປະສິດທິຜົນກ່ຽວກັບການຂຸດຄົ້ນແຫລ່ງຜົນປະໂຫຍດສິນທະເລເພື່ອຮັບປະກັນຈຸດໝາຍຄ້ຳປະກັນດ້ານສະບຽງອາຫານຂອງແຕ່ລະປະເທດ. ນອກນັ້ນ, ຝ່າຍຫວຽດນາມ ກໍໄດ້ເຕື້ອງເຖິງບັນດາການກະທຳກໍ່ຄວາມເຄັ່ງຕຶງຫວ່າງແລ້ວນີ້ຂອງຈີນ ຢູ່ ທະເລຕາເວັນອອກ, ສົ່ງຜົນສະທ້ອນເຖິງການເຄື່ອນໄຫວຫາປາອັນຊອບທຳຂອງຊາວປະມົງຫວຽດນາມ. ພິເສດ ແມ່ນເລື່ອງຈີນ ຕັ້ງຮ້ານເຈາະນ້ຳມັນຢູ່ເຂດເສດຖະກິດຈຳເພາະ ແລະ ເຂດໄຫລ່ທະວີບຂອງຫວຽດນາມ. ທີ່ກອງປະຊຸມ, ຫວຽດນາມ ຮຽກຮ້ອງບັນດາປະເທດໃນພາກພື້ນ ຈົ່ງຮ່ວມມືກັນເພື່ອກ້າວໄປເຖິງການສ້າງຄວາມເປັນເອກະພາບໃນການຄຸ້ມຄອງການຫາປາຢູ່ພາກພື້ນ, ຫລີກລ້ຽງການກະທຳກໍ່ຄວາມເຄັ່ງຕຶງ.
ອາຊຽນຕ້ອງກາຍເປັນກຳລັງໜູນຕົ້ນຕໍ່ໃນການແກ້ໄຂຄວາມຂັດແຍ້ງຢູ່ທະເລຕາເວັນອອກ
ດ້ວຍຫົວເລື່ອງ “ຄວາມເຄັ່ງຕຶງປິນຂັ້ນໄດຢູ່ທະເລຕາເວັນອອກ ແລະ ບັນດາການກະທົບເຖິງຄວາມສະຫງົບປອດໄພໃນພາກພື້ນ“, ສູນຄົ້ນຄ້ວາ CASS-India ຂຶ້ນກັບກຸ່ມບໍລິສັດ Stratcore ໄດ້ຈັດກອງປະຊຸມສຳມະນາເພື່ອປຶກສາຫາລືໂຕະມົນຢູ່ສິງກະໂປໃນວັນທີ 28/5. ກອງປະຊຸມສຳມະນາໄດ້ດຶງດູດການເຂົ້າຮ່ວມຂອງບັນດາຜູ້ຊ່ຽວຊານ, ນັກຮຽນຮູ້, ນັກຄົ້ນຄ້ວາໃນຂົງເຂດປ້ອງກັນຊາດປ້ອງກັນຄວາມສະຫງົບ, ການພົວພັນສາກົນ ແລະ ກົດໝາຍມາຈາກຫຼາຍປະເທດໃນໂລກ. ນະທີ່ນີ້, ບັນດານັກປາຖະກະຖາໄດ້ແລກປ່ຽນທັດສະນະທີ່ແຕກຕ່າງກັນກ່ຽວຂ້ອງເຖິງເລື່ອງເພີ່ມຄວາມເຄັ່ງຕຶງຢູ່ທະເລຕາເວັນອອກ, ໃນນັ້ນມີບົດບາດໃຈກາງຂອງອາຊຽນ ແລະ ບັນດາສິ່ງທ້າທາຍຕໍ່ຄວາມສະຫງົບປອດໄພໃນພາກພື້ນໃນສະພາບການປະຈຸບັນ….. ນັກປາຖະກະຖາເກືອບທັງໝົດລ້ວນແຕ່ສະແດງຄວາມເປັນຫ່ວງກັງວົນກ່ຽວກັບການກະທຳພຽງລຳພັງຝ່າຍດຽວຂອງຈີນ ໃນການຂັດແຍ້ງອະທິປະໄຕກັບປະເທດບ້ານໃກ້ເຮືອນຄຽງ, ພິເສດແມ່ນບັນດາການຜັນແປຫຼ້າສຸດ ຢູ່ທະເລຕາເວັນອອກ, ພ້ອມທັງເນັ້ນໜັກເຖິງຄວາມຈຳເປັນວ່າ, ອາຊຽນ ແລະ ຈີນ ຕ້ອງບັນລຸໄດ້ປະມວນຂໍ້ກຳນົດການປະພຶດຢູ່ທະເລຕາເວັນອອກໂດຍໄວ./.