ໂລກລະບາດ Covid – 19: ຫວຽດນາມມີກຳລັງຄວາມສາມາດຢ່າງພຽງພໍໃນການຄວບຄຸມໂລກລະບາດ
(VOVWORLD) -ຫວຽດນາມມີກຳລັງຄວາມສາມາດ, ແຫຼ່ງກຳລັງ, ຈິດໃຈ ແລະ ປະສົບການຢ່າງພຽງພໍເພື່ອຄວບຄຸມໂລກລະບາດ, ມີວິທະຍາສາດ - ເຕັກໂນໂລຢີ, ມີຖັນແຖວແພດໝໍເກັ່ງ, ມີລະບົບໂຮງໝໍລົງເລິກຂະແໜງ ເຊິ່ງໄດ້ປິ່ນປົວຜູ້ທີ່ຕິດ Covid – 19 16 ຄົນຫາຍດີເປັນປົກກະຕິ ແລະ ອອກໂຮງໝໍ, ໄລຍະທີ່ຜ່ານມາບໍ່ມີຜູ້ໃດເສຍຊີວິດ. ນີ້ແມ່ນເນື້ອໃນປະກາດສະຫຼຸບຂອງ ທ່ານນາຍົກລັດຖະມົນຕີ ຫງວຽນຊວັນຟຸກ ຢູ່ກອງປະຊຸມຄະນະປະຈຳລັດຖະບານກ່ຽວກັບການສະກັດກັ້ນ, ຕ້ານໂລກລະບາດ Covid – 19.
 ທ່ານນາຍົກລັດຖະມົນຕີ ຫງວຽນຊວັນຟຸກກ່າວຄຳເຫັນທີ່ກອງປະຊຸມ (ພາບ: VGP) |
ຕາມນັ້ນແລ້ວ, ຄະນະປະຈຳລັດຖະບານໄດ້ເຫັນດີເປັນເອກະພາບກັບບົດລາຍງານຂອງຄະນະຊີ້ນຳການສະກັດກັ້ນ, ຕ້ານໂລກລະບາດ Covid - 19 ແຫ່ງຊາດ, ຫວຽດນາມໄດ້ກະກຽມ ກໍລະນີຕ່າງໆໃຫ້ເປັນຢ່າງດີດັ່ງນັ້ນ ຈຶ່ງບໍ່ຕົກຢູ່ໃນທ່າຮັບໃນການຄວບຄຸມສະພາບການ. ຫຼັງຈາກ 22 ວັນທີ່ ບໍ່ກວດພົບກໍລະນີຕິດເຊື້ອ Covid – 19 ໃໝ່ຕື່ມອີກ, ປັດຈຸບັນ, ຫວຽດນາມ ໄດ້ຮັບເອົາ ຜູ້ຕິດເຊື້ອ Covid – 19 ໃໝ່ຕື່ມອີກ 18 ຄົນ. ຕໍ່ໜ້າການຜັນແປຢ່າງສັບສົນຂອງສະພາບໂລກລະບາດ, ທ່ານນາຍົກລັດຖະມົນຕີໄດ້ຮຽກຮ້ອງໃຫ້ບັນດາກະຊວງ, ຂະແໜງການ, ທ້ອງຖິ່ນ: ປະກາດຂໍ້ມູນຂ່າວສານທີ່ກ່ຽວຂ້ອງເຖິງໂລກລະບາດ Covid – 19 ຕ້ອງຮັບປະກັນໃຫ້ທັນການ, ຄົບຖ້ວນ, ເປີດເຜີຍ, ໂປ່ງໃສ, ຊອກຫາຜູ້ເປັນແຫຼ່ງລະບາດໃຫ້ໄວທີ່ສຸດ ແລະ ບັນດາຜູ້ທີ່ສຳຜັດກໍ່ຕ້ອງໄດ້ ແຍກຕົວຢູ່ຕ່າງຫາກຢ່າງຄົບຖ້ວນ. ພ້ອມກັນນັ້ນ, ຕ້ອງຮັບປະກັນການສະໜອງບັນດາປະເພດສິນຄ້າບໍລິໂພກທີ່ຈຳເປັນຢ່າງຄົບຖ້ວນເພື່ອຕອບສະໜອງຄວາມຕ້ອງການຂອງປະຊາຊົນ.
ທ່ານນາຍົກລັດຖະມົນຕີກໍ່ເຫັນດີໃຫ້ໂຈະຊົ່ວຄາວຕໍ່ການຍົກເວັ້ນ ວີຊາ ແຕ່ຝ່າຍດຽວກັບ 8 ປະເທດຄື: ແດນມາກ, ນອກແວ, ແຟງລັງ, ຊູແອັດ, ອັງກິດ, ຝລັ່ງ, ເຢຍລະມັນ, ແອັດສະປາຍ ແລະ ໂຈະຊົ່ວຄາວກ່ຽວກັບຜົນສັກສິດຂອງ ວີຊາທີ່ອອກໃຫ້ຊາວຫວຽດນາມທີ່ພວມອາໄສຢູ່ຕ່າງປະເທດ ແລະ ຊາວຕ່າງປະເທດທີ່ເປັນ ເມຍ, ຜົວ, ລູກ ຂອງຊາວຫວຽດນາມທີ່ອາໄສຢູ່ 8 ປະເທດດັ່ງກ່າວ. ເຫັນດີການປະຕິບັດແຈ້ງອາການສຸຂະພາບແບບບັງຄັບ ສຳລັບຜູ້ທີ່ເດີນທາງເຂົ້າປະເທດຫວຽດນາມ.