(ທ່ານເອກອັກຄະລັດຖະທູດ ຫວຽດນາມ ປະຈຳ ກຳປູເຈຍ ແທກຢື)
(vovworld) – ທີ່ການໂອ້ລົມສົນທະນາດຳເນີນໃນຕອນບ່າຍວັນທີ 29/9, ໂດຍສະຖານທູດ ຫວຽດນາມ ປະຈຳ ກຳປູເຈຍ ສົມທົບກັບສະມາຄົມນັກທຸລະກິດຊາວ ຫວຽດນາມ ອາໄສຢູ່ຕ່າງປະເທດ, ສະມາຄົມບັນດານັກລົງທຶນ ຫວຽດນາມ ຢູ່ ກຳປູເຈຍ (AVIC) ຈັດຕັ້ງ, ຜູ້ຕາງໜ້າບັນດານັກທຸລະກິດຊາວ ຫວຽດນາມ ອາໄສຢູ່ຕ່າງປະເທດ ໄດ້ສະແດງຄວາມປາດຖະໜາຢາກໃຫ້ ລັດຖະບານ ຫວຽດນາມ, ໂດຍຜ່ານບັນດາອົງການສຳນັກງານຕາງໜ້າປະຈຳຕ່າງປະເທດ, ເຮັດວຽກກັບລັດຖະບານ ແລະ ອຳນາດການປົກຄອງຂັ້ນຕ່າງໆຂອງ ກຳປູເຈຍ ເພື່ອໃຫ້ວິສາຫະກິດ ຫວຽດນາມ ສືບຕໍ່ໄດ້ຮັບຄວາມສົນໃຈ, ສ້າງເງື່ອນໄຂສະດວກໃນວິວັດການດຳເນີນທຸລະກິດ, ປະກອບສ່ວນຊຸກຍູ້ການພົວພັນຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງ 2 ປະເທດ. ທ່ານເອກອັກຄະລັດຖະທູດ ຫວຽດນາມ ປະຈຳ ກຳປູເຈຍ ແທກຢື ຖືວ່າ: ຄວາມສາມາດບົ່ມຊ້ອນການຮ່ວມມືເສດຖະກິດລະຫວ່າງ ຫວຽດນາມ - ກຳປູເຈຍ ຍັງໃຫຍ່ຫລວງຢູ່ ແລະ ປະຊາຄົມວິສາຫະກິດ ຫວຽດນາມ ແມ່ນກຳລັງແກ່ນສານປະຕິບັດ ແລະ ຊຸກຍູ້ການເຊື່ອມຕໍ່ເສດຖະກິດນັບມື້ນັບມີປະສິດທິຜົນ ແລະ ຍືນຍົງ. ທ່ານເອກອັກຄະລັດຖະທູດ ສະເໜີປະຊາຄົມວິສາຫະກິດ ຫວຽດນາມ ຕ້ອງເພີ່ມທະວີການເຊື່ອມຕໍ່ຫລາຍກ່ວາອີກ; ສະມາຄົມນັກທຸລະກິດຊາວ ຫວຽດນາມ ອາໄສຢູ່ ກຳປູເຈຍ ເສີມຂະຫຍາຍບັນດາການເຄື່ອນໄຫວໜູນຊ່ວຍ, ໃຫ້ຄຳປຶກສາ ແລະ ສະໜອງຂໍ້ມູນຂ່າວສານໃຫ້ບັນດາສະມາຊິກສະມາຄົມກ່ຽວກັບບັນດານະໂຍບາຍ ແລະ ຂໍ້ກຳນົດໃໝ່ຂອງລັດຖະບານ ກຳປູເຈຍ ແລະ ຫວຽດນາມ