ການໂອ້ລົມສົນທະນາ “ແງ່ຫວັງການຮ່ວມມື
ຫວຽດນາມ - OECD ມຸ່ງໄປເຖິງການເຕີບໂຕກວມລວມ”
(ພາບ: qdnd.vn)
(vovworld) – ວັນທີ 18/11, ກະຊວງການຕ່າງປະເທດ ຫວຽດນາມ ສົມທົບກັບອົງການຮ່ວມມື ແລະ ພັດທະນາເສດຖະກິດ (OECD) ຈັດຕັ້ງການໂອ້ລົມສົນທະນາ “ແງ່ຫວັງການຮ່ວມມື ຫວຽດນາມ - OECD ມຸ່ງໄປເຖິງການເຕີບໂຕກວມລວມ” ຢູ່ຮ່າໂນ້ຍ, ຊຶ່ງໄດ້ດຶງດູດການເຂົ້າຮ່ວມຂອງຜູ້ຕາງໜ້າບັນດາກະຊວງ, ຂະແໜງການ, ສະຖາບັນຄົ້ນຄວ້າ, ນັກຊ່ຽວຊານ, ນັກຮຽນຮູ້, ວິສາຫະກິດ ຫວຽດນາມ; ນັກຊ່ຽວຊານອົງການຮ່ວມມື ແລະ ພັດທະນາເສດຖະກິດໃນຂົງເຂດການເຕີບໂຕກວມລວມ ແລະ ຜູ້ຕາງໜ້າສະຖານທູດຂອງບັນດາປະເທດສະມາຊິກອົງການຮ່ວມມື ແລະ ພັດທະນາເສດຖະກິດຢູ່ ຮ່າໂນ້ຍ. ກ່າວຄຳເຫັນທີ່ພິທີໄຂ, ທ່ານ ຫວູກວາງມິງ ຜູ້ຊ່ວຍວຽກລັດຖະມົນຕີ, ຫົວໜ້າກົມສັງລວມເສດຖະກິດກະຊວງການຕ່າງປະເທດ ເນັ້ນໜັກວ່າ: ຄວາມສາມາດບົ່ມຊ້ອນການຮ່ວມມືລະຫວ່າງ ຫວຽດນາມ ແລະ ອົງການຮ່ວມມື ແລະ ພັດທະນາເສດຖະກິດຍັງໃຫຍ່ຫລວງຢູ່, ພິເສດ ແມ່ນເມື່ອການພັດທະນາ ແລະ ເຊື່ອມໂຍງເຂົ້າກັບສາກົນຂອງ ຫວຽດນາມ ພວມກ້າວເຂົ້າສູ່ໄລຍະໃໝ່, ທ່ານ ຫວູກວາງມິງ ຢືນຢັນວ່າ: ຫວຽດນາມ ພ້ອມແລ້ວຈະສົມທົບຢ່າງແໜ້ນແຟ້ນກັບອົງການຮ່ວມມື ແລະ ພັດທະນາເສດຖະກິດ ຜັນຂະຫຍາຍໂຄງການອາຊີຕາເວັນອອກສ່ຽງໃຕ້ຢ່າງແທດຈິງ ແລະ ມີປະສິດທິຜົນ. ທ່ານ ຫວູກວາງມິງ ປາດຖະໜາຢາກໃຫ້ອົງການຮ່ວມມື ແລະ ພັດທະນາເສດຖະກິດ ເພີ່ມທະວີໜູນຊ່ວຍ ຫວຽດນາມ ປະຕິຮູບເສດຖະກິດ ແລະ ຍົກສູງປະສິດທິຜົນການເຊື່ອມໂຍງເຂົ້າກັບສາກົນ ໂດຍຜ່ານບັນດາຂອບເຂດການຮ່ວມມື 2 ຝ່າຍ, 3 ຝ່າຍ ແລະ ພາກພື້ນ.