(vovworld) - ໃນຂອບເຂດ Festival ມໍລະດົກ ກວາງນາມ ຄັ້ງທີ 5 ປີ 2013, ຕອນເຊົ້າວັນທີ 22/06, ຢູ່ນະຄອນໂຮ້ຍອານ ໄດ້ດຳເນີນກອງປະຊຸມ “ການພົບປະລະຫວ່າງທ້ອງຖິ່ນ ແລະ ຄະນະທູຕານຸທູດ”. ກອງປະຊຸມໄດ້ດຶງດູດຜູ້ແທນເກືອບ 120 ຄົນເຂົ້າຮ່ວມ, ສຸມໃສ່ປຶກສາຫາລື 3 ເນື້ອໃນຕົ້ນຕໍ່ຄື: ການພັດທະນາເສດຖະກິດ - ສົງຄົມຢ່າງໝັ້ນຄົງ; ພັດທະນາ ແລະ ນຳໃຊ້ແຫຼ່ງຊັບພະຍາກອນມະນຸດ; ພັດທະນາວັດທະນະທຳ ແລະ ທ່ອງທ່ຽວ. ທີ່ກອງປະຊຸມ, ທ່ານນາງຮອງລັດຖະມົນຕີການຕ່າງປະເທດຫວຽດນາມ ຫງວຽນເຟືອງງາ ຢືນຢັນວ່າ.
“ເວທີປາໄສຄັ້ງນີ້ແມ່ນກາລະໂອກາດເພື່ອໃຫ້ບັນດາວິສາຫະກິດ, ບັນດາການນຳ ທ້ອງຖິ່ນຕ່າງໆຂອງຫວຽດນາມ ສຳພັດກັບຄະນະທູຕານຸທູດ, ກັບບັນດາເອກອັກຄະລັດຖະທູດ. ຜ່ານນັ້ນສາມາດໂຄສະນາທ່າແຮງ, ຄວາມສາມາດບົນຊ້ອນໃນການຮ່ວມມື, ນະໂຍບາຍພັດທະນາຂອງທ້ອງຖິ່ນຕົນ, ເພື່ອເຮັດແນວໃດ ພວມເຮົາສາມາດເສີມຂະຫຍາຍຄວາມສາມາດບົມຊ້ອນຂອງແຕ່ລະຝ່າຍ, ພ້ອມກັນຊຸກຍູ້ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ”.
ແລະກໍໃນຕອນຄໍ່າວັນດຽວກັນ, ຢູ່ໂຮງລະຄອນໂຮ້ຍອານ, ແຂວງກວາງນາມ, Festival ມໍລະດົກ ກວາງນາມ ຄັ້ງທີ 5 ປີ 2013 ໄດ້ໄຂຂຶ້ນຢ່າງເປັນທາງການ. Festival ຈະດຳເນີນແຕ່ວັນທີ 22 – 26/06, ຊຶ່ງແມ່ນວັນບຸນຂອງບັນດາມໍລະດົກວັດທະນະທຳບັນດາປະເທດອາຊຽນ ແລະ ບັນດາມໍລະດົກຢູ່ທຸກແທບຖິ່ນຂອງຫວຽດນາມ. ທ່ານ ດິງຮ່າຍ, ຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວແຂວງ ກວາງນາມ, ຮອງຫົວໜ້າຄະນະຈັດຕັ້ງໃຫ້ຮູ້ວ່າ.
“ມາຮອດຈຸດເວລານີ້, ອາດສາມາດເວົ້າໄດ້ວ່າລາຍການທີ່ໄດ້ວາງອອກ ໄດ້ຮັບຜົນສຳເລັດຢ່າງດີງາມ. ກ່ອນອື່ນໝົດແມ່ນວຽກງານກະກຽມຂອງບັນດາຫົວໜ່ວຍເຂົ້າຮ່ວມ, ທີ 2 ແມ່ນການກະກຽມຂອງທ້ອງຖິ່ນ ແລະ ນັບທັງການກະກຽມຂອງບັນດາເພື່ອນມິດຢູ່ບັນດາຫົວໜ່ວຍສາກົນ. ສ່ວນຝ່າຍກວາງນາມ, ໄດ້ເຮັດຈົນສຸດຄວາມສາມາດຂອງຕົນເພື່ອສ້າງເງື່ອນໄຂດີທີ່ສຸດໃຫ້ແກ່ການຕ້ອນຮັບບັນດາຫົວໜ່ວຍເຂົ້າຮ່ວມ ກໍຄືແຂກທ່ອງທ່ຽວມາຢ້ຽມຢາມແຂວງກວາງນາມໃນຈຸດເວລານີ້.”