ຮູບມັງກອງດ້ວຍໝາກພ້າວ
(vovworld) - ຕອນຄ່ຳວັນທີ 5/4, ຢູ່ໃຈກາງນະຄອນເບັ໋ນແຈ, Festival ໝາກພ້າວເບັ໋ນແຈ ຄັ້ງທີ 3 ໄດ້ໄຂຂຶ້ນຢ່າງເປັນທາງການ. ກ່າວຄວາມເຫັນຢູ່ທີ່ນີ້, ທ່ານນາງຮອງປະທານປະເທດ Nguyen Thi Doan ໄດ້ຕີລາຄາສູງການຈັດຕັ້ງ Festival ໝາກພ້າວເບັ໋ນແຈ ໃນຄັ້ງນີ້, ພ້ອມທັງຢັ້ງຢືນບົດບາດ, ທີ່ຕັ້ງຂອງຕົ້ນໝາກພ້າວຢູ່ແຂວງເບັ໋ນແຈ ກໍ່ຄືທົ່ວປະເທດທີ່ມີຕໍ່ຊີວິດ, ການພັດທະນາຂອງປະເທດຊາດ. ທ່ານນາງຮອງປະທານປະເທດ Nguyen Thi Doan ສະເໜີໃຫ້ແຂວງເບັ໋ນແຈ ແລະ ບັນດາກະຊວງ, ຂະແໜງການ ຄວນຂະຫຍາຍເນື້ອທີ່ປູກໝາກພ້າວຕື່ມອີກ, ຍົກສູງຄຸນນະພາບຕົ້ນໝາກພ້າວ ແລະ ບັນດາຜະລິດຕະພັນຈາກຕົ້ນໝາກພ້າວ, ນຳມາເຊິ່ງມູນຄ່າສົ່ງອອກສູງ ແລະ ປົກປັກຮັກສາສິ່ງແວດລ້ອມຊີວະພາບ.
”ຕົ້ນໝາກພ້າວນັບມື້ນັບສວມບົດບາດສຳຄັນໃນການພັດທະນາປະເທດຊາດ, ດັ່ງນັ້ນຄວນມີຄວາມເອົາໃຈໃສ່ຢ່າງຖືກຕ້ອງ. ຂ້າພະເຈົ້າຫວັງວ່າ, ໃນອະນາຄົດ, ພວກເຮົາບໍ່ພຽງແຕ່ຊຸກຍູ້ການຮ່ວມມືລະຫວ່າງບັນດາແຂວງເທົ່ານັ້ນ, ຫາກຍັງຕ້ອງຮ່ຳຮຽນເອົາບົດຮຽນຂອງບັນດາປະເທດປູກໝາກພ້າວຫຼາຍ, ເຮັດໃຫ້ຕົ້ນໝາກພ້າວມີຫຼາຍປະເພດ ແລະ ມີປະສິດທິຜົນທາງດ້ານເສດຖະກິດສູງ”.
ປະຈຸບັນ, ແຂວງເບັ໋ນແຈມີເນື້ອທີ່ປູກຕົ້ນໝາກພ້າວໃຫຍ່ກວ່າໝູ່ໃນທົ່ວປະເທດ. ຜະລິດຕະພັນຈາກຕົ້ນໝາກພ້າວເບັ໋ນແຈ ໄດ້ສົ່ງໄປຂາຍຢູ່ 60 ປະເທດ ແລະ ເຂດແຄວ້ນໃນທົ່ວໂລກ. ເລື່ອງຈັດຕັ້ງ Festival ໝາກພ້າວລະດັບຊາດຄັ້ງນີ້, ຍັງແມ່ນໂອກາດເພື່ອໃຫ້ແຂວງເບັ໋ນແຈ, ແລະ ບັນດາແຂວງໃນເຂດທົ່ງພຽງແມ່ນ້ຳຂອງ ກໍ່ຄືທ້ອງຖີ່ນອື່ນໆໃນທົ່ວປະເທດ ໂຄສະນາເຄື່ອງໝາຍບັນດາຜະລິດຕະພັນຈາກຕົ້ນໝາກພ້າວອີກດ້ວຍ.