(vovworld) – ຕອນເຊົ້າວັນທີ 21/10, ໄຂກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຊຸດທີ 13, ເຂົ້າຮ່ວມພິທີໄຂຢູ່ ຮ່າໂນ້ຍ, ມີການນຳຂັ້ນສູງ, ອະດີດການນຳຂັ້ນສູງພັກ, ລັດ, ສະພາແຫ່ງຊາດ, ລັດຖະບານ, ແນວໂຮມປະເທດຊາດ ຫວຽດນາມ ແລະ ນັກປະຕິວັດຜູ້ອາວຸໂສ, ຕາງໜ້າບາງຄະນະທູຕານຸທູດ ແລະ ອົງການສາກົນ.
ກ່າວຄຳເຫັນທີ່ກອງປະຊຸມ, ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮູ່ງ ເນັ້ນໜັກວ່າ: ນີ້ແມ່ນກອງປະຊຸມກາງສະໄໝຂອງສະພາແຫ່ງຊາດ ແລະ ແມ່ນກອງປະຊຸມສຳຄັນພິເສດ. ກ່ຽວກັບບັນດາເນື້ອໃນຂອງກອງປະຊຸມ, ທ່ານປະທານສະພາແຫ່ງຊາດ ຫງວຽນຊິງຮູ່ງ ໃຫ້ຮູ້ວ່າ:
“ທີ່ກອງປະຊຸມຄັ້ງນີ້, ສະພາແຫ່ງຊາດຈະພິຈາລະນາ, ຕົກລົງບັນດາເນື້ອໃນສຳຄັນດັ່ງຕໍ່ໄປນີ້. ທີ 1 ແມ່ນຮັບຮອງເອົາຮ່າງລັດຖະທຳມະນູນປີ 1992 ສະບັບປັບປຸງ. ເພື່ອໃຫ້ເລື່ອງຮັບຮອງເອົາບັນລຸໄດ້ໝາກຜົນສູງ, ຮັບປະກັນປະຊາທິປະໄຕ, ຕອບສະໜອງຄວາມມຸ້ງມາດປາດຖະໜາຂອງປະຊາຊົນ, ໃນກອງປະຊຸມເທື່ອນີ້, ສະພາແຫ່ງຊາດຈະສະຫງວນເວລາເໝາະສົມເພື່ອສືບຕໍ່ປຶກສາຫາລືຢ່າງມີຄວາມປະຊາທິປະໄຕ, ສ້າງຄວາມເຫັນດີເຫັນພ້ອມ, ເປັນເອກະສັນກັນຢ່າງສູງດ້ວຍຈິດໃຈຮັບຟັງຄວາມເຫັນຂອງປະຊາຊົນ, ອະທິບາຍຢ່າງລະອຽດບັນດາຄວາມໝາຍທີ່ໄດ້ວາງອອກ. ທີ 2 ແມ່ນ, ຮັບຮອງເອົາຮ່າງກົດໝາຍວ່າດ້ວຍທີ່ດິນ (ສະບັບປັບປຸງ), ຕອບສະໜອງຄວາມຮຽກຮ້ອງຕ້ອງການໃນການພັດທະນາເສດຖະກິດ, ສັງຄົມ ແລະ ຄວາມຫວັງຂອງປະຊາຊົນ. ທີ 3 ແມ່ນ, ສະພາແຫ່ງຊາດສະຫງວນເວລາເພື່ອພິຈາລະນາບັນດາບົດລາຍງານຂອງລັດຖະບານກ່ຽວກັບໝາກຜົນແຫ່ງການປະຕິບັດເສດຖະກິດ, ສັງຄົມ, ງົບປະມານແຫ່ງລັດປີ 2013, ຕົກລົງແຜນການພັດທະນາເສດຖະກິດ, ສັງຄົມ ແລະ ແຜນງົບປະມານແຫ່ງລັດປີ 2014. ປະຕິບັດແຜນການພັດທະນາເສດຖະກິດ, ສັງຄົມໄລຍະ 5 ປີ, ການປະຕິບັດແຜນຮ່າງສັງລວມສ້າງໂຄງປະກອບເສດຖະກິດຄືນໃໝ່. ”
ແລະກໍ່ທີ່ພິທີໄຂ, ສະພາແຫ່ງຊາດໄດ້ຮັບຟັງທ່ານນາຍົກລັດຖະມົນຕີ ຫງວຽນເຕີນຢູງ ສະເໜີບົດລາຍງານຂອງລັດຖະບານກ່ຽວກັບໝາກຜົນແຫ່ງການປະຕິບັດແຜນພັດທະນາເສດຖະກິດ - ສັງຄົມປີ 2013, ແຜນພັດທະນາເສດຖະກິດ, ສັງຄົມປີ 2014, ສະພາບການປະຕິບັດແຜນພັດທະນາເສດຖະກິດ, ສັງຄົມ 5 ປີ (2011 – 2015).
ກອງປະຊຸມສະໄໝສາມັນເທື່ອທີ 6 ສະພາແຫ່ງຊາດໄດ້ໄຂຂຶ້ນໃນຕອນເຊົ້າວັນທີ 21/10
(ພາບປະກອບ)
ແລະກໍ່ໃນຕອນເຊົ້າວັນດຽວກັນ, ຫົວໜ້າກຳມາທິການເສດຖະກິດ ທ່ານ ຫງວຽນວັນເຢົາ ໄດ້ສະເໜີບົດລາຍງານກວດກາ, ຕີລາຄາໝາກຜົນແຫ່ງການປະຕິບັດມະຕິຂອງສະພາແຫ່ງຊາດກ່ຽວກັບແຜນພັດທະນາເສດຖະກິດ - ສັງຄົມ ປີ 2013 ແລະ 3 ປີ (2011 – 2013), ແຜນພັດທະນາເສດຖະກິດ - ສັງຄົມປີ 2014. ກ່ຽວກັບໝາກຜົນແຫ່ງການປະຕິບັດໜ້າທີ່ພັດທະນາເສດຖະກິດ - ສັງຄົມ 3 ປີ (2011 – 2013), ຕາມກຳມາທິການເສດຖະກິດແລ້ວ, ເສດຖະກິດ ຫວຽດນາມ ສືບຕໍ່ຕ້ອງປະເຊີນໜ້າກັຍຄວາມດັ່ນອັນໃຫຍ່ຫຼວງໃນໄລຍະສັ້ນ ແລະ ບໍ່ທັນກັບຄືນສູ່ສະພາບເຕີບໂຕໄວໃນ 1 – 2 ປີຈະມາເຖິງ.
ກໍ່ໃນຕອນເຊົ້າວັນທີ 21/10, ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ທ່ານ ຮອງນາຍົກລັດຖະມົນຕີ ຫງວຽນທ້ຽນເຍີນ ໄດ້ສະເໜີບົດລາຍງານ “ສະຫລຸບຄຳເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງ ແລະ ປະຊາຊົນ” ຕໍ່ສະພາແຫ່ງຊາດ. ຕາມນັ້ນແລ້ວ, ຜູ້ມີສິດເລືອກຕັ້ງສະເໜີລັດຖະບານມີມາດຕະການຄຸມຄອງການເຄື່ອນໄຫວຂອງ ໂຮງໝໍ, ຄຸ້ມຄອງ ແລະ ນຳໃຊ້ຢຸກຢາ, ລາຄາຢຸກຢາຢ່າງແໜ້ນແຟ້ນ, ເຮັດແຈ້ງຄວາມຮັບຜິດຊອບຂອງບັນດາອົງການມີໜ້າທີ່ຮັບຜິດຊອບໃນວຽກງານຄຸ້ມຄອງສິງແວດລ້ອມບໍ່ແໜ້ນແຟ້ນ, ແກ້ໄຂບັນດາການກະທຳລະເມີດກໍ່ຜົນຮ້າຍຢ່າງໜັກໜ່ວງເຖິງສິ່ງແວດລ້ອມ.
ໃນວາລະປະຊຸມເມື່ອຕອນບ່າຍວັນດຽວກັນ, ບັນດາສະມາຊິກສະພາແຫ່ງຊາດໄດ້ປຶກສາຫາລືຮ່າງກົດໝາຍວ່າດ້ວຍວຽກເຮັດງານທຳ. ບັນດາຄຳເຫັນໄດ້ເຕື້ອງເຖິງຫຼາຍໝວດບັນຫາຄື: ພັດທະນາວຽກເຮັດງານທຳ, ຂໍ້ມູນຂ່າວຕະຫຼາດແຮງງານ, ຄຸມຄອງຄົນງານ...
ຄາດວ່າ, ໃນຕອນເຊົ້າວັນທີ 22/10, ສະພາແຫ່ງຊາດຮັບຟັງບົດລາຍງານອະທິບາຍການຮັບເອົາຄຳເຫັນຂອງສະມາຊິກສະພາແຫ່ງຊາດ ແລະ ຄຳເຫັນຂອງປະຊາຊົນກ່ຽວກັບຮ່າງລັດຖະທຳມະນູນປີ 1992 ສະບັບປັບປຸງ ແລະ ໃບສະເໜີຮ່າງມະຕິກ່ຽວກັບການປະຕິບັດລັດຖະທຳມະນູນປີ 1992 (ປັບປຸງເມື່ອປີ 2013), ບົດລາຍງານກ່ຽວກັບວຽກງານປ້ອງກັນ, ຕ້ານສໍ້ລາດບັງຫຼວງປີ 2013.