(vovworld) - ກອງປະຊຸມຂັ້ນສູງອາຊີ - ອາຟະລິກາ 2015 ໄຂຂຶ້ນຢ່າງເປັນທາງການໃນຕອນເຊົ້າວັນທີ 22/4 ທີ່ນະຄອນຫຼວງ ຈາກາກຕາ, ອິນໂດເນເຊຍ. ເຂົ້າຮ່ວມກອງປະຊຸມຄັ້ງນີ້ມີການນຳ ແລະ ຜູ້ແທນທີ່ມາຈາກ 105 ປະເທດໃນພາກພື້ນອາຊີ ແລະ ອາຟະລິກາ, ພ້ອມກັບ 15 ປະເທດສັງເກດການ ແລະ 17 ອົງການສາກົນ. ທ່ານປະທານປະເທດ ຫວຽດນາມ ເຈືອງເຕິ໋ນຊາງ ພ້ອມກັບຄະນະຜູ້ແທນຂັ້ນສູງຫວຽດນາມ ໄດ້ເຂົ້າຮ່ວມພິທີໄຂ ແລະ ບັນດາວາລະປະຊຸມຄົບຄະນະຂອງກອງປະຊຸມນີ້.
ທ່ານປະທານປະເທດຫວຽດນາມ ເຈືອງເຕິ໋ນຊາງ ໄດ້ມີບົດກ່າວປາໄສສຳຄັນທີ່ວາລະປະຊຸມຄົບຄະນະຄັ້ງທຳອິດຂອງກອງປະຊຸມ, ໂດຍຢືນຢັນວ່າກອງປະຊຸມ ບັງດຸງ ປີ 1955 ໄດ້ສ້າງກຳລັງໜູນເພື່ອໃຫ້ປະຊາຊົນບັນດາປະເທດອາຊີ - ອາຟະລິກາ ລຸກຮຶ້ຂຶ້ນຍາດເອົາເອກະລາດແຫ່ງຊາດ ແລະ ພັດທະນາໃນທຸກດ້ານ. ທ່ານປະທານປະເທດຊີ້ແຈ້ງວ່າ, ໂດຍແມ່ນ 1 ໃນຈຳນວນ 29 ປະເທດເຂົ້າຮ່ວມກອງປະຊຸມບັງດຸງປີ 1955, ຫວຽດນາມ ສະໜັບສະໜູນຫົວຂໍ້ຂອງກອງປະຊຸມຂັ້ນສູງຄັ້ງນີ້ແມ່ນ “ເພີ່ມທະວການຮ່ວມມືໃຕ້ - ໃຕ້ ເພື່ອແນໃສ່ຊຸກຍູ້ສັນຕິພາບ ແລະ ຄວາມວັດທະນາຖາວອນຢູ່ໃນໂລກ“, ຮຽກຮ້ອງສອງທະວີບນີ້ຄວນເພີ່ມທະວີການຮ່ວມມືຮັບປະກັນສະພາບແວດລ້ອມສັນຕິພາບ, ຄວາມໝັ້ນຄົງ - ເຊິ່ງແມ່ນເງື່ອນໄຂຕັດສິນຊີ້ຂາດທຳອິດໃຫ້ແກ່ການພັດທະນາແບບຍືນຍົງ. ທ່ານປະທານເນັ້ນໜັກວ່າ, ປະເທດຕ່າງໆຕ້ອງປະຕິບັດ 10 ຫຼັກການຂອງບັງດຸງ. ພິເສດແມ່ນຫຼັກການ “ເຄົາລົບອະທິປະໄຕ ແລະ ຜືນແຜ່ນດິນຢ່າງຄົບຖ້ວນ“, “ບໍ່ຮຸກຮານ, ຂົ່ມຂູ່ຮຸກຮານ ແລະ ນຳໃຊ້ກຳລັງອາວຸດ“, “ແກ້ໄຂຄວາມຂັດແຍ້ງກັນດ້ວຍສັນຕິວິທີເໝາະສົມກັບກົດບັດສະຫະປະຊາຊາດ... ທ່ານປະທານປະເທດ ຫວຽດນາມ ຢືນຢັນວ່າ, ຢູ່ພາກພື້ນອາຊີຕາເວັນອອກສ່ຽງໃຕ້, ຫວຽດນາມພວມພ້ອມກັບບັນດາປະເທດ ອາຊຽນ ກໍ່ສ້າງປະຊາຄົມ ອາຊຽນ ໃຫ້ສຳເລັດໃນທ້າຍປີ 2015 ດ້ວຍ 3 ເສົາຄຳ້ກ່ຽວກັບການເມືອງ - ຄວາມໝັ້ນຄົງ, ເສດຖະກິດ ແລະ ວັດທະນະທຳ - ສັງຄົມ, ກໍ່ສ້າງອາຊີຕາເວັນອອກສ່ຽງໃຕ້ໃຫ້ກາຍເປັນພາກພື້ນສັນຕິພາບ, ສະຖຽນລະພາບ, ຮ່ວມມື ແລະ ຈະເລີນເທື່ອລະກ້າວ, ເປີດກາລະໂອກາດຮ່ວມມືລະຫວ່າງສອງພາກພື້ນກໍ່ຄືຢູ່ໃນໂລກ:
“ພວກຂ້າພະເຈົ້າພວມມານະພະຍາຍາມຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ ແລະ ຄວາມເສລີໃນການເດີນທະເລຢູ່ທະເລຕາເວັນອອກ. ພວກຂ້າພະເຈົ້າເດັດດຽວປະຕິບັດແຜນນະໂຍບາຍແກ້ໄຂຄວາມຂັດແຍ້ງກັນດ້ວຍສັນຕິວິທີບົນພື້ນຖານເຄົາລົບກົດໝາຍສາກົນ, ໃນນັ້ນມີກົດໝາຍວ່າດ້ວຍທະເລຂອງສະຫະປະຊາຊາດປີ 1982, ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC)… ຫວຽດນາມກໍ່ມີແຜນນະໂຍບາຍເພີ່ມທະວີ ຄວາມເປັນເຈົ້າການ, ຕັ້ງໜ້າ, ມີຄວາມຮັບຜິດຊອບໃນ ການເຂົ້າຮ່ວມ, ບັນດາກົນໄກວາງແຜນນະໂຍບາຍ, ປະກອບສ່ວນເສີມຂະຫຍາຍທັດສະນະລວມຂອງບັນດາປະເທດພວມພັດທະນາ“.
ເນື່ອງໃນໂອກາດເຂົ້າຮ່ວມກອງປະຊຸມຂັ້ນສູງອາຊີ - ອາຟະລິກາ 2015, ທ່ານປະທານປະເທດ ເຈືອງເຕິ໋ນຊາງ ໄດ້ຕ້ອນຮັບທ່ານຮອງປະທານາທິບໍດີ ເວເນຊູເອລາ Jorge Arreaza, ທ່ານຮອງປະທານາທິບໍດີອັງໂກລາ Manuel Domingos Vicente ແລະ ທ່ານລັດຖະມົນຕີວ່າການກະຊວງການຕ່າງປະເທດ ຕູຍນີຢີ Taieb Baccouche. ທ່ານປະທານຢືນຢັນວ່າ, ຫວຽດນາມຈະຮ່ວມມື ແລະ ສົມທົບຢ່າງແໜ້ນແຟ້ນ ກັບປະເທດຕ່າງໆເພື່ອຮັບປະກັນໃຫ້ກອງປະຊຸມຂັ້ນສູງຂະບວນການບໍ່ຮ່ວມກຸ່ມ ໂດຍເວເນຢູເອລາ ເປັນເຈົ້າພາບຈັດຕັ້ງໃນເດືອນ 9 ສຳເລັດຜົນ. ກໍ່ຄືຖືເປັນສຳຄັນການພົວພັນທີ່ເປັນມູນເຊື້ອມິດຕະພາບກັບອັງໂກລາ ແລະ ສອງຝ່າຍຈະປັບປຸງການພົວພັນດ້ານການເມືອງ, ຍູ້ແຮງການພົວພັນທາງດ້ານເສດຖະກິດ, ການຄ້າ ແລະ ການລົງທຶນ. ທ່ານປະທານຢືນຢັນວ່າ, ຫວຽດນາມ - ຕູຍນີຢີ ຄວນຮັກສາ ແລະ ເພີ່ມທະວີການພົວພັນດ້ານການເມືອງ, ສົມທົບກັນ ແລະ ສະໜັບສະໜູນເຊິ່ງກັນ ແລະ ກັນໃນເວທີປາໄສ, ອົງການຈັດຕັ້ງຫຼາຍຝ່າຍ.