(vovworld) - ຕອນເຊົ້າວັນທີ 12 ສິງຫາ, ພາຍໃຕ້ການເປັນປະທານຂອງທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ, ຄະນະປະຈຳສະພາແຫ່ງຊາດເລີ່ມຈັດກອງປະຊຸມຄັ້ງທີ 20. ກອງປະຊຸມຄັ້ງນີ້ ຄາດວ່າ ຈະແກ່ຍາວເປັນເວລາ 10 ວັນ, ແຕ່ວັນທີ 12 – 22 ສິງຫາ, ສຸມໃສ່ປຶກສາຫາລື, ໃຫ້ຄຳຄິດຄຳເຫັນໃສ່ບັນດາຮ່າງກົດໝາຍລັດຖະບັນຍັດ, ຮ່າງດຳລັດ. ໃນກອງປະຊຸມຄັ້ງທີ 20 ນີ້, ຄະນະປະຈຳສະພາແຫ່ງຊາດ ຈະປຶກສາຫາລື, ໃຫ້ຄຳເຫັນໃສ່ 11 ເນື້ອໃນ, ໃນນັ້ນມີ ຮ່າງກົດໝາຍ 7 ສະບັບ, ຮ່າງລັດຖະບັນຍັດ 2 ສະບັບ ແລະ ຮ່າງດຳລັດ 2 ສະບັບ; ຈັດກອງປະຊຸມເພື່ອຕີລາຄາກ່ຽວກັບການຈັດຕັ້ງປະຕິບັດບັນດາເອກະສານກົດໝາຍຂອງສະພາແຫ່ງຊາດຊຸດທີ 12 ແລະ ສ່ວນໜຶ່ງຂອງສະພາແຫ່ງຊາດຊຸດທີ 13, ຜ່ານນັ້ນເຫັນໄດ້ບັນດາໝາກຜົນ, ປະສິດທິຜົນຂອງກົດໝາຍ, ດຳລັດຕ່າງໆ. ທີ່ກອງປະຊຸມຄັ້ງນີ້, ຄະນະປະຈຳສະພາແຫ່ງຊາດ ສືບຕໍ່ໃຫ້ຄຳເຫັນໃສ່ຮ່າງລັດຖະທຳມະນຸນປີ 1992 ສະບັບປັບປຸງ; ປະຕິບັດຊັກຖາມ ແລະ ຕອບຄຳຊັກຖາມ ລະຫວ່າງກອງປະຊຸມ 2 ຄັ້ງກັບລັດຖະມົນຕີ 2 ທ່ານແມ່ນລັດຖະມົນຕີກະຊວງຍຸຕິທຳ ແລະ ລັດຖະມົນຕີຊັບພະຍາກອນ ແລະ ສິ່ງແວດລ້ອມ. ຄະນະປະຈຳສະພາແຫ່ງຊາດ ກໍ່ພິຈາລະນາບາງເນື້ອໃນອື່ນໆ ແມ່ນເພີ່ມເຕີ່ມໃຫ້ກົດໝາຍວ່າດ້ວຍທີ່ດິນ ແລະ ຮັບຟັງບົດລາຍງານກ່ຽວກັບການປະຕິບັດນະໂຍບາຍ, ກົດໝາຍ ກ່ຽວກັບການຮັບປະກັນຄຸນນະພາບ ແລະ ລາຍການ, ປື້ມຕຳລາຮຽນສຶກສາສາມັນ.
ໃນຕອນເຊົ້າວັນທີ 12 ສິງຫາ, ຄະນະປະຈຳສະພາແຫ່ງຊາດ ໄດ້ສຸມໃສ່ປຶກສາຫາລື, ໃຫ້ຄຳເຫັນກ່ຽວກັບຮ່າງລັດຖະບັນຍັດຕຳຫຼວດເຄື່ອນທີ່. ທ່ານຮອງປະທານສະພາແຫ່ງຊາດຫວຽດນາມ ວອງຈູລິວ ແລະ ບັນດາຄຳເຫັນເຫັນດີສ່ວນຫຼາຍໄດ້ເຫັນດີກັນການປະກາດໃຊ້ລັດຖະບັນຍັດນີ້. ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ເຫັນດີກັບຄຳເຫັນປະກອບຂອງບັນດາສະມາຊິກຄະນະປະຈຳສະພາແຫ່ງຊາດເກືອບທັງໝົດທີ່ປະກອບໃສ່ໃສ່ຮ່າງລັດຖະບັນຍັດຕຳຫຼວດເຄື່ອນທີ່ ແລະ ສະເໜີສືບຕໍ່ສ້າງໃຫ້ສຳເລັດເພື່ອປະກາດໃຊ້ລັດຖະບັນຍັດຕາມແຜນການ.
ຕອນບ່າຍວັນທີ 12/8, ຄະນະປະຈຳສະພາແຫ່ງຊາດໄດ້ປຶກສາຫາລື, ໃຫ້ຄຳເຫັນໃສ່ຮ່າງກົດໝາຍປັບປຸງ ແລະ ເພີ່ມເຕີມກົດໝາຍວ່າດ້ວຍຄົມມະນາຄົມທາງນ້ຳພາຍໃນ. ບັນດາຄຳເຫັນລ້ວນແຕ່ໄດ້ເຫັນດີປັບປຸງ ເພີ່ມເຕີ່ມກົດໝາຍສະບັບນີ້ໃຫ້ສອດຄ່ອງກັບສະພາບການປະຈຸບັນ. ໃນນັ້ນ ບັນດາຜູ້ແທນມີຄວາມສົນໃຈ ແລະ ສະເໜີເຮັດແຈ້ງ, ບໍ່ໄດ້ກຳນົດແບບລວມໆຄືໃນຮ່າງກົດໝາຍສະບັບນີ້ຄື: ບັນຫາຄຸມຄອງທາງນ້ຳ, ພາຫະນະ, ການກຳນົດການອອກໜັງສືອະນຸຍາດ ແລະ ຜູ້ຂັບກຳປັ່ນ, ເຮືອ ກໍ່ຄືບາງຄຳນິຍາມໃນຮ່າງກົດໝາຍ…ບັນດາຜູ້ແທນກໍ່ສະເໜີຕ້ອງກຳນົດຢ່າງຈະແຈ້ງກ່ວາ ຄວາມຮັບຜິດຊອບຂອງບັນດາເປົ້າໝາຍກ່ຽວຂ້ອງ ເພື່ອຈຳກັດອຸບັດຕິເຫດ ແລະ ມີພື້ນຖານດ້ານກົດໝາຍເມື່ອແກ້ໄຂບັນດາອຸບັດຕິເຫດທາງຄົມມະນາຄົມທາງນ້ຳ ກໍ່ຄືເຮັດແຈ້ງຄວາມຮັບຜິດຊອບຂອງອຳນາດການປົກຄອງທ້ອງຖິ່ນ, ອົງການກວດກາຂອງລັດ, ການກວດກາຂອງບັນດາອົງການກ່ຽວຂ້ອງ.