(vovworld) - ຕອນເຊົ້າວັນທີ 09 ກັນຍາ, ພາຍໃຕ້ການເປັນປະທານຂອງທ່ານປະທານສະພາແຫ່ງຊາດ ຫງວຽນຊິງຮຸ່ງ, ຄະນະປະຈຳສະພາແຫ່ງຊາດໄດ້ໄຂກອງປະຊຸມຄັ້ງທີ 21. ນີ້ແມ່ນກອງປະຊຸມດ້ວຍຫຼາຍເນື້ອໃນສຳຄັນເພື່ອກະກຽມໃຫ້ແກ່ກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13, ຄາດວ່າຈະດຳເນີນໄປໃນທ້າຍເດືອນ ຕຸລາ ຈະມາເຖິງ. ທີ່ກອງປະຊຸມຄັ້ງນີ້, ຄະນະປະຈຳສະພາແຫ່ງຊາດ ຈະພິຈາລະນາ, ປຶກສາຫາລືເທື່ອສຸດທ້າຍກ່ຽວກັບຮ່າງລັດຖະທຳມະນູນປີ 1992 (ສະບັບປັບປຸງ) ກອນທີ່ລາຍງານຕໍ່ກົມການເມືອງ ແລະ ຄະນະບໍລິຫານງານສູນກາງ, ພ້ອມທັງໃຫ້ຄຳເຫັນໃສ່ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ) ແລະ ຮ່າງກົດໝາຍອື່ນ 13 ສະບັບ. ທ່ານປະທານສະພາແຫ່ງຊາດ ເອົາໃຈໃສ່ວ່າ; ໃນເດືອນຕຸລາ ຈະມາເຖິງ, ຮ່າງ ລັດຖະທຳມະນູນປີ 1992 (ສະບັບປັບປຸງ) ຈະໄດ້ຍື່ນສະເໜີຕໍ່ສະພາແຫ່ງຊາດ ແລະ ຈະໄດ້ຮັບການຮັບຮອງເອົາຕາມແຜນການທີ່ໄດ້ວາງອອກ. ເພາະສະນັ້ນ, ທ່ານປະທານສະພາແຫ່ງຊາດ ຮຽກຮ້ອງໃຫ້ບັນດາສະມາຊິກຄະນະປະຈຳສະພາແຫ່ງຊາດ ເອົາໃຈໃສ່ປຶກສາຫາລືຢ່າງລະອຽດ, ລະມັດລະວັງ ແລະ ແນ່ນອນ. ຄະນະປະຈຳສະພາແຫ່ງຊາດ ກໍ່ຈະຮັບຟັງຄະນະຕິດຕາມກວດກາລາຍງານກ່ຽວກັບການປະຕິບັດນະໂຍບາຍ, ກົດໝາຍວ່າດ້ວຍການປະກັນສຸຂະພາບໄລຍະ 2009 – 2012; ການປະຕິບັດນະໂຍບາຍ, ກົດໝາຍໃນວຽກງານຄັດເລືອກ, ບຳລຸງສ້າງ, ແຕ່ງຕັ້ງສຳລັບຖັນແຖວພະນັກງານ, ລັດຖະກອນ; ການປະຕິບັດທົດລອງບໍ່ຈັດຕັ້ງສະພາປະຊາຊົນຂັ້ນເມືອງ, ຕາແສງ. ຕາມລາຍການຂອງກອງປະຊຸມແລ້ວ, ຄະນະປະຈຳສະພາແຫ່ງຊາດ ຈະໃຫ້ຄຳເຫັນກ່ຽວກັບບົດລາຍງານຜົນຂອງການລົງຄະແນນສຽງໄວ້ວາງໃຈທີ່ສະພາແຫ່ງຊາດ ແລະ ສະພາປະຊາຊົນທຸກຂັ້ນ ແລະ ບັນດາບົດລາຍງານສຳຄັນອື່ນໆ. ທ່ານປະທານສະພາແຫ່ງຊາດ ຊີ້ແຈ້ງວ່າ.
“ກອງປະຊຸມໃນທ້າຍປີນີ້ ສະພາແຫ່ງຊາດ ຈະຮັບຟັງບົດບາຍງານຫຼາຍບົດ ຍ້ອນກອງປະຊຸມຄັ້ງນີ້ແມ່ນກອງປະຊຸມກາງອາຍຸການຂອງສະພາແຫ່ງຊາດ ກໍ່ແມ່ນກອງປະຊຸມກາງອາຍຸການຂອງພັກກອມມູນິດຫວຽດນາມ ເພື່ອແນໃສ່ຕີລາຄາຄືນສະພາບການຂອງປີ 2013, ຄາດຄະເນສະພາບການຂອງປີ 2014 ແລະຮັບຟັງ, ຕິລາຄາສະພາບເສດຖະກິດ, ສັງຄົມ, ການປ້ອງກັນຊາດ, ປ້ອງກັນຄວາມສະຫງົບ, ວຽກງານຍຸຕິທຳ, ການຕໍ່ສູ້ປ້ອງກັນຕ້ານອາດຊະຍາກຳໃນ 2 ປີ. ຈາກນັ້ນຈະສູ້ຊົນສຳເລັດໜ້າທີ່ເຊິ່ງປະຊຸມໃຫຍ່ຄັ້ງທີ 11 ໄດ້ວາງອອກ. ຂ້າພະເຂົ້າຫວັງວ່າ ບັນດາສະມາຊິກສະພາແຫ່ງຊາດ ຈະເຮັດວຽກຈົນສຸດຄວາມສາມາດຂອງຕົນເພື່ອໃຫ້ກອງປະຊຸມຄັ້ງນີ້ສຳເລັດຜົນ”.