(ທ່ານເລຂາທິການໃຫຍ່ຄະນະບໍລິຫານງານສູນ
ກາງກອມມູນິດ ຫວຽດນາມ ຫງວຽນຟູຈ້ອງ)
(vovworld) – ກອງປະຊຸມຄັ້ງທີ 13 ຄະນະບໍລິຫານງານສູນກາງພັກຊຸດທີ 11 ຖືກໄຂຂຶ້ນຢ່າງສົມກຽດໃນຕອນເຊົ້າວັນທີ 14/12 ຢູ່ນະຄອນຫລວງ ຮ່າໂນ້ຍ. ກອງປະຊຸມຄັ້ງນີ້ ໄດ້ປຶກສາຫາລືບັນດາເນື້ອໃນຄື: ຮັບເອົາຄຳເຫັນປະກອບຂອງກອງປະຊຸມໃຫຍ່ອົງຄະນະພັກທຸກຂັ້ນຂອງສະມາຊິກສະພາແຫ່ງຊາດ, ແນວໂຮມປະເທດຊາດ, ບັນດາອົງການຈັດຕັ້ງມະຫາຊົນ, ຂອງພະນັກງານ, ສະມາຊິກພັກ ແລະ ປະຊາຊົນ; ບັນດາຮ່າງເອກະສານທີ່ຍືນສະເໜີຕໍ່ກອງປະຊຸມໃຫຍ່ຄັ້ງທີ 12 ຂອງພັກ: ບົດລາຍງານສະຫລຸບການປະຕິບັດມະຕິສູນກາງທີ 4 ຊຸດທີ 11 ກ່ຽວກັບການກໍ່ສ້າງພັກ, ກ່ຽວກັບບຸກຄະລາກອນຄະນະບໍລິຫານງານສູນກາງ, ກົມການເມືອງ, ຄະນະເລຂາທິການ ແລະ ບຸກຄະລາກອນຄະນະກຳມະການກວດກາສູນກາງຊຸດທີ 12, ຮ່າງກົດລະບຽບການປະຕິບັດວຽກງານ, ກົດລະບຽບການປ່ອນບັດເລືອກຕັ້ງຢູ່ກອງປະຊຸມໃຫຍ່ຄັ້ງທີ 12 ຂອງພັກ ແລະ ບາງບັນຫາສຳຄັນອື່ນໆ. ກ່າວຄຳເຫັນທີ່ພິທີໄຂກອງປະຊຸມ, ທ່ານເລຂາທິການໃຫຍ່ຄະນະບໍລິຫານງານສູນກາງກອມມູນິດ ຫວຽດນາມ ຫງວຽນຟູຈ້ອງ ຊີ້ແຈ້ງບາງບັນຫາມີລັກສະນະເຈາະຈິ້ມ ເພື່ອໃຫ້ສູນກາງເອົາໃຈໃສ່ໃນວິວັດການປຶກສາຫາລື, ພິຈາລະນາ ແລະ ຕັດສິນ.
“ສະເໜີສູນກາງສະຫງວນເວລາຄົ້ນຄວ້າ, ປຶກສາຫາລືປະກອບຄຳເຫັນຢ່າງລະອຽດໃສ່ບົດລາຍງານອະພິປາຍ, ຮັບເອົາຄຳເຫັນ ແລະ ເນື້ອໃນຄົບຊຸດບັນດາຮ່າງເອກະສານ ດ້ວຍຈິດໃຈສ້າງສັນນັບຖືບັນດາຄຳເຫັນປະກອບຂອງທົ່ວພັກ, ບັນດາສະມາຊິກສະພາແຫ່ງຊາດ, ແນວໂຮມປະເທດຊາດ ຫວຽດນາມ, ບັນດາອົງການຈັດຕັ້ງມະຫາຊົນການເມືອງ - ສັງຄົມ ແລະ ປະຊາຊົນ. ສຸມໃສ່ໃຫ້ຄຳເຫັນ ຕໍ່ບັນດາຂໍ້ສະເໜີເພີ່ມເຕີມ, ປັບປຸງ ແລະ ເນື້ອໃນຄົບຊຸດຂອງຮ່າງເອກະສານຕ່າງໆ, ພິເສດແມ່ນບັນດາບັນຫາທີ່ຍັງມີຄຳເຫັນ ຫຼື ວິທີການເລືອກເຟັ້ນທີ່ແຕກຕ່າງກັນ. ພ້ອມກັນນັ້ນ ກໍຄວນສະແດງທັດສະນະການເມືອງສຳລັບບັນດາຄຳເຫັນທີ່ຜິດພາດ, ຝືນກັບທັດສະນະ, ແນວທາງພື້ນຖານຂອງພັກ. ຈາກນັ້ນ, ພິຈາລະນາ ຮັບຮອງເອົາເນື້ອໃນຄົບຊຸດລາຍງານການເມືອງ ແລະ ບົດລາຍງານເສດຖະກິດສັງຄົມ ເພື່ອຍື່ນສະເໜີຕໍ່ກອງປະຊຸມໃຫຍ່ຄັ້ງທີ 12 ຂອງພັກ ”.
ຕາມລາຍການແລ້ວ, ກອງປະຊຸມຄັ້ງທີ 13 ຄະນະບໍລິຫານງານສູນກາງພັກຊຸດທີ 11 ຈະເຮັດວຽກຮອດວັນທີ 22/12.