ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ກ່າວປາໄສໄຂກອງປະຊຸມ
(ພາບ: vietnamplus.vn)
(vovworld) - ຕອນເຊົ້າວັນທີ 27/11, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ກ່າວປາໄສໄຂກອງປະຊຸມຄວາມໝັ້ນຄົງທາງດ້ານການເງິນໃນພາກພື້ນອາຊີຕາເວັນອອກ. ກອງປະຊຸມມີການເຂົ້າຮ່ວມຂອງຜູ້ແທນເກືອບ 400 ຄົນທີ່ມາຈາກ 14 ພື້ນຖານເສດຖະກິດອາຊີຕາເວັນອອກ ແລະ ໂລກ. ຕາງໜ້າລັດຖະບານຫວຽດນາມ, ທ່ານນາຍົກລັດຖະມົນຕີ ຫງວຽນເຕີນຢູງ, ເນັ້ນໜັກວ່າ:
”ໃນສະຖານະການທີ່ຕະຫຼາດການເງິນສາກົນ ແລະ ຫວຽດນາມຊ້ອນແຝງຄວາມບໍ່ເປັນປົກກະຕິຫຼາຍຢ່າງ. ເລື່ອງຈັດຕັ້ງກອງປະຊຸມນີ້ ສະແດງໃຫ້ເຫັນຄວາມຕັດສິນໃຈປະຕິຮູບລະບົບການເງິນຕາມທິດປອດໄພ, ໝັ້ນຄົງ, ສ້າງເງື່ອນໄຂເພື່ອຮັກສາທ່າເຕີບໂຕ ແລະ ພັດທະນາຢ່າງໝັ້ນຄົງຂອງລັດຖະບານຫວຽດນາມ. ຂ້າພະເຈົ້າເຊື່ອໝັ້ນວ່າ, ກອງປະຊຸມຄັ້ງນີ້ຈະແມ່ນເວທີປາໄສ ເພື່ອແລກປ່ຽນ, ແບ່ງປັນໝາກຜົນແຫ່ງການຄົ້ນຄ້ວາ, ບັນດາບົດຮຽນຢ່າງເປີດເຜີຍ, ກົງໄປກົງມາ ກໍ່ຄືຍົກອອກແນວຄວາມຄິດ, ຂໍ້ສະເໜີ, ວິທີການແກ້ໄຂນະໂຍບາຍຢ່າງແທດຈິງ, ລະອຽດ ເພື່ອແນໃສ່ຊຸກຍູ້ການຮັກສາສະຖຽນລະພາບ ແລະ ການພັດທະນາຢ່າງໝັ້ນຄົງຢູ່ຫວຽດນາມເວົ້າສະເພາະ, ກໍ່ຄືຢູ່ພາກພື້ນ, ສາກົນເວົ້າລວມ”.
ທ່ານນາຍົກລັດຖະມົນຕີ ຫງວຽນເຕີນຢູງ ກໍ່ແບ່ງປັນບັນດາຜົນງານອັນໃຫຍ່ຫຼວງ ເຊິ່ງຫວຽດນາມບັນລຸໄດ້ ພາຍຫຼັງ 25 ປີ ແຫ່ງການປ່ຽນໃໝ່, ຊີ້ແຈ້ງທິດທາງ ແລະ ບັນດາມາດຕະການແກ້ໄຂຕົ້ນຕໍ່ໃນການສ້າງໂຄງປະກອບພື້ນຖານເສດຖະກິດ ເຊິ່ງຫວຽດນາມພວມສຸມໃສ່ປະຕິບັດ. ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນວ່າ:
”ຈຸດສຸມຂອງໂຄງການສ້າງໂຄງປະກອບຕະຫຼາດການເງິນຫວຽດນາມຄືນໃໝ່ ແມ່ນສ້າງໂຄງປະກອບລະບົບທະນາຄານ, ເພີ່ມທະວີໂຄງລ່າງດ້ານການເງິນ, ປ່ຽນໃໝ່ກົນໄກຮັກສາດ້ານການເງິນເປັນປົກກະຕິ ແລະ ຕິດຕາມກວດກາດ້ານການເງິນຕາມມາດຖານສາກົນ ເພື່ອແນໃສ່ຮັບປະກັນໃຫ້ແກ່ການເຕີບໂຕ ແລະ ຮັກສາເສດຖະກິດມະຫາພາກໃຫ້ເປັນປົກກະຕິ”
ໃນ 2 ວັນ ແຫ່ງການດຳເນີນກອງປະຊຸມ, ບັນດາຜູ້ແທນໄດ້ປຶກສາຫາລືບັນດາຫົວເລື່ອງທີ່ກ່ຽວຂ້ອງເຖິງການເພີ່ມທະວີນະໂຍບາຍລະມັດລະວັງ ແລະ ຍົກສູງມາດຖານຄ້ຳປະກັນດ້ານການເງິນ; ບັນດາມາດຕະການເພີ່ມທະວີພື້ນຖານດ້ານການເງິນ ເພື່ອຈຸດໝາຍຮັກສາລະບົບການເງິນ, ຕະຫຼາດການເງິນພາກພື້ນອາຊີຕາເວັນອອກໃຫ້ເປັນປົກກະຕິ, ເພື່ອການພັດທະນາແບບຍືນຍົງຂອງເສດຖະກິດພາກພື້ນ ແລະ ທົ່ວໂລກ.