(vovworld) - ຕອນເຊົ້າວັນທີ 3/9, ຢູ່ຮ່າໂນ້ຍ, ມີຜູ້ແທນທັງຢູ່ພາຍໃນປະເທດ ແລະ ຕ່າງປະເທດ ກວ່າ 50 ທ່ານ ໄດ້ເຂົ້າຮ່ວມກອງປະຊຸມທົ່ວໄລກຄັ້ງທີ 2 ກ່ຽວກັບກະສິກຳ, ຄວາມໝັ້ນຄົງດ້ານສະບຽງອາຫານ ແລະ ການປ່ຽນແປງຂອງດິນຟ້າອາກາດ. ໂດຍກະຊວງກະສິກຳ ແລະ ພັດທະນາຊົນນະບົດຫວຽດນາມ ສົມທົບກັບລັດຖະບານໂຮມລັງ ຈັດຕັ້ງຂຶ້ນ ດ້ວຍການໜູນຊ່ວຍຂອງອົງການອາຫານ ແລະ ກະເສດສະຫະປະຊາຊາດ ແລະ ທະນາຄານໂລກ. ກ່າວຄຳເຫັນທີ່ພິທີໄຂກອງປະຊຸມ, ທ່ານລັດຖະມົນຕີກະຊວງກຳສິກຳ ແລະ ພັດທະນາຊົນນະບົດຫວຽດນາມ Cao Duc Phat ຊີ້ແຈ້ງວ່າ, ກະສິກຳໃນປະຈຸບັນ ໄດ້ປະກອບສ່ວນສຳຄັນໃນຊີວິດສັງຄົມຂອງບັນດາປະເທດ, ການເຕີບໂຕດ້ານກະສິກຳຢ່າງໝັ້ນຄົງ ບໍ່ພຽງແຕ່ຮັບປະກັນການສະໜອງສະບຽງອາຫານຢ່າງພຽງພໍໃຫ້ແກ່ພົນລະເມືອງປະຈຸບັນ ທີ່ພວມເພີ່ມຂຶ້ນໃນແຕ່ລະປີ, ຫາກຍັງປະກອບສ່ວນຍົກສູງ ແລະ ປົວແປງຄຸນນະພາບຊີວິດການເປັນຢູ່ຂອງປະຊາຊົນອີກດ້ວຍ. ບັນດາການການເຄື່ອນໄຫວບຸລິມະສິດຖືກເນັ້ນໜັກທີ່ກອງປະຊຸມ ຈະສຸມໃສ່ເຂົ້າໃນການກຳນົດບັນດາແຫຼ່ງການເງິນໃໝ່, ເປີດກວ້າງການຄົ້ນຄວ້າ ແລະ ມອບໂອນວິທະຍາສາດເຕັກໂນໂລຊີ, ເພີ່ມທະວີການລົງທຶນຂອງພາກເອກະຊົນຜ່ານກົນໄກຄູ່ຮ່ວມມືຂອງລັດ ແລະ ເອກະຊົນ… ລັດຖະມົນຕີ Cao Duc Phat ຊີ້ແຈ້ງວ່າ.
“ເພີ່ມທະວີການຮ່ວມມືລະຫວ່າງບັນດາປະເທດ ເພື່ອແກ້ໄຂບັນດາສິ່ງທ້າທາຍທົ່ວໂລກ, ສົ່ງເສີມພາກເອກະຊົນລົງທຶນເຂົ້າໃນຂົງເຂດກະສິກຳ. ພ້ອມກັນນັ້ນ ເສີມຂະຫຍາຍບັນດາແຫຼ່ງກຳລັງ ເພື່ອລົງທຶນຄົ້ນຄວ້າ, ນຳໃຊ້ເຕັກໂນໂລຊີ ແລະ ເຜີຍແຜ່ຂໍ້ມູນຂ່າວສານເພື່ອສ້າງເງື່ອນໄຂໃຫ້ແກ່ການພັດທະນາພື້ນຖານກະສິກຳທີ່ໃກ້ຊິດກັບສິ່ງແວດລ້ອມ. ຂ້າພະເຈົ້າເຊື້ອໝັ້ນວ່າ, ດ້ວຍການຮ່ວມມືຢ່າງແໜ້ນແຟ້ນ ແລະ ລັກສະນະທົ່ວໂລກລະຫວ່າງບັນດາປະເທດ ແລະ ການໜູນຊ່ວຍຂອງບັນດາອົງການສາກົນ, ຄວາມມານະພະຍາຍາມຂອງແຕ່ລະປະເທດຈະນຳມາເຊິ່ງຄວາມສຳເລັດຜົນທີ່ໃຫຍ່ຫູວງ ແລະ ພວກເຮົາຈະສາມາດຜ່ານຜ່າໄດ້ບັນດາສິ່ງທ້າທາຍທົ່ວໂລກກ່ຽວກັບຄວາມໝັ້ນຄົງດ້ານສະບຽງອາຫານ”.