(vovworld) - ຕອນເຊົ້າວັນທີ 30/6, ກອງປະຊຸມລັດຖະມົນຕີການຕ່າງປະເທດປະຈຳປີ ອາຊຽນ ຄັ້ງທີ 46 (AMM 46) ໄດ້ໄຂຂຶ້ນຢ່າງເປັນທາງການຢູ່ສູນກອງປະຊຸມສາກົນ Begaoan, ປະເທດ ບຣູໄນ. ກ່າວຄຳເຫັນທີ່ວາລະໄຂ ສະເດັດເຈົ້າ Mahamed Bolkia, ລັດຖະມົນຕີການຕ່າງປະເທດ ແລະ ການຄ້າ ບຣູໄນ, ປະທານຂອງ AMM 46, ຕີລາຄາສູງການຮ່ວມມືຂອງບັນດາປະເທດ ອາຊຽນ ໃນວິວັດການສ້າງບັນດາໂຄງການດຳເນີນງານໃຫ້ແກ່ກອງປະຊຸມ, ພ້ອມທັງສະແດງຄວາມຕັດສິນໃຈຂອງ ອາຊຽນ ໃນການປະຕິບັດບັນດາຈຸດໝາຍເຊິ່ງພາກພື້ນໄດ້ວາງອອກ. ທ່ານລັດຖະມົນຕີ Bolkia ກໍ່ເນັ້ນໜັກວ່າ:
“ໃນໄລຍະເປັນປະທານ ອາຊຽນ, ພວກຂ້າພະເຈົ້າມີໂອກາດພົບປະ 2 ຝ່າຍກັບບັນດາສະມາຊິກຂອງພາກພື້ນ ແລະ ພວກຂ້າພະເຈົ້າໄດ້ຮັບການສົ່ງເສີມຫຼາຍຢ່າງ. ມີສິ່ງໜຶ່ງທີ່ພວກຂ້າພະເຈົ້າເຫັນໄດ້ຊັດນັ້ນແມ່ນ ພວກເຮົາພວມເປັນເອກະພາບກັນສ້າງພາກພື້ນລວມ ສັນຕິພາບ ແລະ ສະຖຽນລະພາບ”
ພາຍຫຼັງພິທີໄຂ, ບັນດາລັດຖະມົນຕີການຕ່າງປະເທດ ອາຊຽນ ໄດ້ດຳເນີນວາລະປະຊຸມລັບເພື່ອປຶກສາຫາລືກ່ຽວກັບບັນດາບັນຫາຂອງພາກພື້ນ ແລະ ໂລກ, ໃນນັ້ນມີການສ້າງປະຊາຄົມ ອາຊຽນ ນັບແຕ່ນີ້ເຖິງທ້າຍປີ 2015 ເພື່ອປະຊາຄົມ ອາຊຽນ “ຮ່ວມສຳພັນກ່ຽວກັບທາງດ້ານເສດຖະກິດ, ຜຸກພັນທາງດ້ານການເມືອງ, ແລະ ພ້ອມກັນແບ່ງປັນບັນດາຄວາມຮັບພິດຊອບກ່ຽວກັບສັງຄົມ”, ເພີ່ມທະວີການພົວພັນກັບຕ່າງປະເທດ ແລະ ເສີມຂະຫຍາຍບົດບາດໃຈກາງຂອງ ອາຊຽນໃນໂຄງປະກອບພາກພື້ນທີ່ພວມໄດ້ຮັບການສ້າງຕັ້ງຂຶ້ນ ກໍ່ຄືບົດບາດຫຼັກແຫຼ່ງຂອງສະຫະສະມາຄົມໃນການແກ້ໄຂບັນດາບັນຫາສຳຄັນຢູ່ພາກພື້ນ, ຊຸກຍູ້ການຮ່ວມສຳພັນ ແລະ ເຊື່ອມຕໍ່ ອາຊຽນ ເປັນກຳລັງໜູນ ຈາກນັ້ນເປີດກ້ວາງການເຊື່ອມຕໍ່ອອກສູ່ພາກພື້ນ ອາຊີ ຕາເວັນອອກ.