ກອງປະຊຸມສຸດຍອດ ອາຊຽນ ຄັ້ງທີ 21
ພາບ:TTXVN
|
(vovworld) - ຕອນເຊົ້າວັນທີ 18/11, ຢູ່ນະຄອນຫລວງພະນົມເປັນ ປະເທດ ກຳປູເຈຍ, ໄດ້ໄຂກອງປະຊຸມສຸດຍອດ ອາຊຽນ ຄັ້ງທີ 21 ພາຍໃຕ້ຫົວຂໍ້ວ່າ: ປະຊາຄົມດຽວ, ຊາຕະກຳດຽວ”, ເປີດສາກໃຫ້ແກ່ບັນດາກອງປະຊຸມສຸດຍອດຂອງ ອາຊຽນ ແລະ ລະຫວ່າງ ອາຊຽນ ກັບບັນດາປະເທດຄູ່ເຈລະຈາ ຊື່ງຈະຖືກຈັດຂຶ້ນໃນວັນທີ 20/11. ໃນສູນທອນພົດໄຂກອງປະຊຸມ, ທ່ານນາຍົກລັດຖະມົນຕີ ກຳປູເຈຍ ສົມເດັດ ເຕໂຊ ຮຸນແຊນ ໄດ້ສະເຫນີກອງປະຊຸມສຸມໃສ່ຜັນຂະຫຍາຍຢ່າງມີປະສິດທິຜົນວິວັດທະນາການສ້າງປະຊາຄົມອາຊຽນ, ແຜນການສັງລວມກ່ຽວກັບການເຊື່ອມຈອດ ອາຊຽນ, ປະຕິບັດບັນດາຂໍ້ຕົກລົງກ່ຽວກັບການຮ່ວມສຳພັນດ້ານເສດຖະກິດ, ຮັດແຄບຊ່ອງຫວ່າງການພັດທະນາ, ຊຸກຍູ້ການປະຕິບັດກົດບັດ ແລະ ບັນດາກອບກົດໝາຍ, ໃນນັ້ນ ມີອະນຸສັນຍາຂອງກົດບັດ ອາຊຽນ ກ່ຽວກັບກົນໄກແກ້ໄຂການພິພາດ, ຍົກສູງ “ວັດທະນະທຳ ການປະຕິບັດ” ໃນອາຊຽນ, ຮັບປະກັນຄວາມສັນຕິພາບ, ສະຖຽນລະພາບຢູ່ໃນພາກພື້ນ, ຮັບປະກັນບົດບາດໃຈກາງຂອງ ອາຊຽນໃນໂຄງປະກອບພາກພື້ນທີ່ພວມໄດ້ຮັບການສ້າງຂຶ້ນ, ໄປຄຽງຄູ່ກັບການເພີ່ມທະວີການພົວພັນຮ່ວມມືກັບບັນດາປະເທດຄູ່ເຈລະຈາ ເພື່ອຈຸດໝາຍລວມຂອງພາກພື້ນ, ຊຸກຍູ້ກົນໄກສົມທົບໃນອາຊຽນ ແລະ ລະຫວ່າງ ອາຊຽນ ກັບບັນດາປະເທດຄູ່ເຈລະຈາເພື່ອຮັບມືກັບສິ່ງທ້າທາຍໃນພາກພື້ນ.
ທີ່ພິທີໄຂກອງປະຊຸມ, ບັນດາການນຳ ອາຊຽນ ໄດ້ປະກາດການສ້າງສະຖາບັນຄົ້ນຄ້ວາສັນຕິພາບ ແລະ ໄກ່ເກຍປອງດອງ ອາຊຽນ ຢ່າງເປັນທາງການ ເພື່ອຊຸກຍູ້ການຮ່ວມມືໃນ ອາຊຽນ ກ່ຽວກັບການແກ້ໄຂການພິພາດໂດຍສັນຕິວິທີ ກໍຄືໃນຂົງເຂດປອ້ງກັນ ຊາດປ້ອງກັນຄວາມສະຫງົບເວົ້າລວມ. ພາຍຫລັງພິທີໄຂ, ບັນດາການນຳ ອາຊຽນ ໄດ້ດຳເນີນວາລະປະຊຸມຄົບຄະນະ ກອງປະຊຸມສຸດຍອດ ອາຊຽນ ຄັ້ງທີ 21, ສຸມໃສ່ປຶກສາຫາລືກ່ຽວກັບບັນຫາຈຸດສຸມ ແລະ ບຸລິມະສິດຂອງ ອາຊຽນ. ທີ່ກອງປະຊຸມ, ທ່ານນາຍົກລັດຖະມົນຕີ Nguyen Tan Dung ມີບົດກ່າວປາໃສສຳຄັນກ່ຽວກັບບັນດາເນື້ອໃນຂອງກອງປະຊຸມຄັ້ງນີ້.
ຕອນເຊົ້າວັນດຽວກັນ, ຢູ່ນອກກອງປະຊຸມສຸດຍອດ ອາຊຽນ ຄັ້ງທີ 21, ທ່ານນາຍົກລັດຖະມົນຕີ Nguyen Tan Dung ໄດ້ພົບປະແລກປ່ຽນຄຳເຫັນກັບທ່ານນາຍົກລັດຖະມົນຕີ ສິງກະໂປ ຫລີຊຽນຫລົງ. ນາຍົກລັດຖະມົນຕີ ທັງສອງທ່ານໄດ້ເຫັນດີສົມທົບກັນຢ່າງແຫນ້ນແຟ້ນເພື່ອ ສະເຫລີມສະຫລອງ 40 ປີແຫ່ງວັນສ້າງຕັ້ງສາຍພົວພັນທາງການທູດ ລະຫວ່າງສອງປະເທດໃນປີ 2013. ທ່ານນາຍົກລັດຖະມົນຕີ ຫລີຊຽນຫລົງ ຢືນຢັນ ຈະມາຢ້ຽມຢາມຫວຽດນາມ ຢ່າງເປັນທາງການ ແລະ ສອງຝ່າຍຈະດຳເນີນການລົງນາມໃນຖະແຫລງການກ່ຽວກັບການສ້າງສາຍພົວພັນຄູ່ຮ່ວມມືຍຸດທະສາດ ຫວຽດນາມ ແລະ ສິງກະໂປ.
ຕອນບ່າຍວັນດຽວກັນ, ທ່ານນາຍົກລັດຖະມົນຕີ Nguyen Tan Dung ພ້ອມກັບບັນດາການນຳ ອາຊຽນ ດຳເນີນວາລະປະຊຸມລັບກອງປະຊຸມສຸດຍອດ ອາຊຽນ ຄັ້ງທີ 21 ແລະ ລົງນາມໃນຖະແຫລງການຮ່ວມ ພະນົມເປັນ ຮັບຮອງເອົາຖະແຫລງການສິດທິມະນຸດ ອາຊຽນ. ເນື່ອງໃນໂອກາດນີ້, ການນຳບັນດາປະເທດ ອາຊຽນ ໄດ້ອະນຸດມັດ ແລະ ແຕ່ງຕັ້ງທ່ານຮອງລັດຖະມົນຕີການຕ່າງປະເທດ ຫວຽດນາມ Le Luong Minh ດຳລົງຕຳແຫນ່ງເລຂາທິການໃຫຍ່ ອາຊຽນ ໃນອາຍຸການ ນັບແຕ່ປີ 2013 ຮອດປີ 2017.