(vovworld) – ຕອນຄຳ່ວັນທີ 24/3, ຕາມເວລາຫວຽດນາມ, ກອງປະຊຸມສຸດຍອດຄວາມໝັ້ນຄົງ ປອດໄພ ນິວເຄຼຍ ຄັ້ງທີ 2 ຖືກໄຂຂຶ້ນຢູ່ສູນກອງປະຊຸມເວທີປາໄສໂລກ ຢູ່ ລາໄຮ, ປະເທດ ໂຮນລັງ. ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ພ້ອມກັບການນຳ 53 ປະເທດ ເຊິ່ງລວມມີບັນດາປະເທດມະຫາອຳນາດນິວເຄຼຍ ແລະ ບັນດາປະເທດນຳໃຊ້ນິວເຄຼຍ ພົນລະເຮືອນ, ເລຂາທິການໃຫຍ່ ສປຊ, ຜູ້ອຳນວຍການໃຫຍ່ອົງການພະລັງງານປະລະມານູສາກົນ (IAEA), ປະທານສະຫະພາບ ເອີລົບ (EU) ...ໄດ້ເຂົ້າຮ່ວມກອງປະຊຸມ. ກ່າວຄຳເຫັນໄຂກອງປະຊຸມ, ນາຍົກລັດຖະມົນຕີປະເທດເຈົ້າພາບ ໂຮນລັງ, ເລຂາທິການໃຫຍ່ ສປຊ ແລະ ປະທານາທິບໍດີ ສ. ເກົາຫຼີ (ປະເທດເຈົ້າພາບກອງປະຊຸມສຸດຍອດຄວາມໝັ້ນຄົງ, ປອດໄພນິວເຄຼຍຄັ້ງທີ 2) ໄດ້ຊົມເຊີຍບັນດາຄວາມຄືບໜ້າພໍສົມຄວນທີ່ບັນລຸໄດ້ຜ່ານກອງປະຊຸມສຸດຍອດຢູ່ ວໍຊິງຕັນ ປີ 2010 ແລະ ເຊີອູນ ປີ 2012.
ພາຍຫຼັງວາລະໄຂ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ພ້ອມກັບການນຳປະເທດຕ່າງໆໄດ້ເຂົ້າຮ່ວມວາລະປຶກສາຫາລື ນະໂຍບາຍໃນຂອບເຂດກອງປະຊຸມສຸດຍອດຄັ້ງນີ້. ວັນທີ 25/3, ທ່ານນາຍົກລັດຖະມົນຕີ ຫງວຽນເຕີນຢູ້ງ ສືບຕໍ່ເຂົ້າຮ່ວມ ວາລະປະຊຸມຄົບຄະນະ ແລະ ຫົວເລື່ອງສະເພາະ 3 ຄັ້ງ. ທ່ານນາຍົກລັດຖະມົນຕີ ຈະມີບົດກ່າວປາໄສທີ່ວາລະປະຊຸມຄົບຄະນະຄັ້ງທີ 1.
ກ່ອນໜ້ານັ້ນ, ທ່ານນາຍົກລັດຖະມົນຕີ ຫງວຽນເຕີນຢູ້ງ ມີການພົບປະຄັ້ງຕ່າງໆກັບປະມຸກລັດ ແລະ ການນຳລັດຖະບານບັນດາປະເທດເຂົ້າຮ່ວມກອງປະຊຸມ...
ທີ່ການພົບປະກັບທ່ານປະທານປະເທດ ຈີນ ສື້ຈີ້ນຜິງ, 2 ຝ່າຍສະແດງຄວາມປິຕິຊົມຊື່ນຕໍ່ໜ້າບັນດາຄວາມຄືບໜ້າອັນໃຫຍ່ຫຼວງໃນການພົວພັນ 2 ປະເທດໃນໄລຍະຜ່ານມາ, ພ້ອມທັງປາດຖະໜາຢາກມີບັນດາແຜນການລະອຽດເພື່ອແນໃສ່ຊຸກຍູ້ການຮ່ວມມື 2 ຝ່າຍ, ປາດຖະໜາຢາກຄະນະກຳມະການຊີ້ນຳການຮ່ວມມື 2 ຝ່າຍດຳເນີນກອງປະຊຸມປຶກສາຫາລືບັນດາມາດຕະການເພື່ອຊຸກຍູ້ການພົວພັນໂດຍໄວ.
ທີ່ການພົບປະກັບທ່ານນາຍົກລັດຖະມົນຕີ ຫງວຽນເຕີນຢູ້ງ, ທ່ານປະທານາທິບໍດີ ອາເມລິກາ Barack Obama ຊົມເຊີຍບັນດາການປະກອບສ່ວນສຳຄັນຂອງ ຫວຽດນາມ ທີ່ບັນດາກອງປະຊຸມສຸດຍອດນິວເຄຼຍ... ທ່ານນາຍົກລັດຖະມົນຕີ ຫງວຽນເຕີນຢູ້ງ ຢືນຢັນ ຫວຽດນາມ ປາດຖະໜາຢາກນຳການພົວພັນຄູ່ຮ່ວມມືຮອບດ້ານ ຫວຽດນາມ - ອາເມລິກາກ້າວເຂົ້າສູ່ລວງເລິກ, ແທດຈິງ, ມີປະສິດທິຜົນໃນບັນດາຂົງເຂດ.
ທ່ານນາຍົກລັດຖະມົນຕີ ຫງວຽນເຕີນຢູ້ງ ແລະ ທ່ານນາຍົກລັດຖະມົນຕີ ຍີ່ປຸ່ນ Shinzo Abe ສະແດງຄວາມປິຕິຊົມຊື່ນຕໍ່ຫນ້າບັນດາບາດກ້າວພັດທະນາໃໝ່ຂອງການພົວພັນ 2 ປະເທດ. ທ່ານນາຍົກລັດຖະມົນຕີ Shinzo Abe ແລະ ທ່ານນາຍົກລັດຖະມົນຕີ ຫງວຽນເຕີນຢູ້ງ ຢືນຢັນຄວາມຕັດສິນໃຈຜັນຂະຫຍາຍໝາກຜົນຂອງການຢ້ຽມຢາມ ຍີ່ປຸ່ນທີ່ຜ່ານມາຂອງທ່ານປະທານປະເທດ ຫວຽດນາມ ເຈືອງເຕີນຊາງ, ຢ່າງຕັ້ງໜ້າ, ມີປະສິດທິຜົນ.
ເມື່ອພົບປະກັບທ່ານນາຍົກລັດຖະມົນຕີ ຫງວຽນເຕີນຢູ້ງ , ທ່ານນາງປະທານາທິບໍດີ ສ.ເກົາຫຼີ Park Geun Hye ປາດຖາໜາຢາກໃຫ້ 2 ປະເທດສຳເລັດການເຈລະຈາ FTA ໂດຍໄວ, ປະກອບສ່ວນຊຸກຍູ້ການພົວພັນການຄ້າ, ການລົງທຶນລະຫວ່າງ 2 ປະເທດ....
ໃນຂອບເຂດການເຄື່ອນໄຫວ 2 ຝ່າຍຂອງຄະນະຜູ້ແທນຂັ້ນສູງຫວຽດນາມ ຢູ່ ໂຮນລັງ, ທ່ານຮອງປະທານສະພາແຫ່ງຊາດ ຫງວຽນທິກິມເງິນ ໄດ້ໄປຢ້ຽມຢາມ ສະພາແຫ່ງຊາດ ໂຮນລັງ ແລະ ມີການພົບປະ, ເຮັດວຽກກັບທ່ານ Ard Van Der Steur, ຮອງປະທານຄະນະກຳມະການປະຈຳສະພາຕຳ່ ໂຮນລັງ.