ທ່ານຮອງນາຍົກລັດຖະມົນຕີ ຫງວຽນທ້ຽນເຍິນ
(vovworld) – ວັນທີ 23/5, ຢູ່ໂຕກຽວ, ກອງປະຊຸມສາກົນອະນາຄົດຂອງອາຊີ ຄັ້ງທີ 19 ໂດຍໜັງສືພິມ Nikkei ແລະ ສູນຄົ້ນຄ້ວາເສດຖະກິດຂອງຍີ່ປຸ່ນສົມທົບກັນຈັດຕັ້ງ ໄດ້ໄຂຂຶ້ນຢ່າງເປັນທາງການ. ເຂົ້າຮ່ວມກອງປະຊຸມມີບັນດາເຈົ້າໜ້າທີ່, ນັກຮຽນຮູ້ປະເທດຕ່າງໆ ໃນນັ້ນມີທ່ານຮອງນາຍົກລົດຖະມົນຕີຫວຽດນາມ ຫງວຽນທ້ຽນເຍິນ… ດ້ວຍຫົວຂໍ້ວ່າ “ອາຊີຊອກຫາເສັ້ນທາງຮ່ວມສຳພັນ ແລະ ເຊື່ອມໂຍງ“.ໃນມື້ທຳອິດຂອງກອງປະຊຸມ, ບັນດາຜູ້ແທນໄດ້ສຸມໃສ່ປຶກສາຫາລືກ່ຽວກັບສະພາບເຄັ່ງຕຶງຫວ່າງແລ້ວນີ້ຢູ່ພາກພື້ນອາຊີຕາເວັນອອກ ແລະ ອະນາຄົດຂອງຈີນ ກໍ່ຄືສະພາບການເສດຖະກິດໃນພາກພື້ນ. ເມື່ອເຕື້ອງເຖິງຄວາມເຄັ່ງຕຶງລະຫວ່າງຈີນ ແລະ ຟີລິບປິນ ຍ້ອນການພິພາດອະທິປະໄຕ. ທ່ານລັດຖະມົນຕີການຕ່າງປະເທດຟີລິບປິນ Albert del Rosario ຢືນຢັນວ່າ ຄຳຮຽກສິດທາງ 9 ຕອນຂອງຈີນ ຢູ່ທະເລຕາເວັນອອກ ແມ່ນການລະເມີດກົດໝາຍວ່າດ້ວຍທະເລຂອງສະຫະປະຊາຊາດຢ່າງຮ້າຍແຮງ.
ກ່ອນໜ້ານັ້ນ, ທ່ານລັດຖະມົນຕີການຕ່າງປະເທດຍີ່ປຸ່ນ Fumio Kishida ກໍ່ຮຽກຮ້ອງຕ້ອງປະຕິບັດກົດໝາຍສາກົນໃນການພິພາດລະຫວ່າງບັນດາປະເທດໃນພາກພື້ນ. ທ່ານລັດຖະມົນຕີ Fumio Kishida ຢືນຢັນວ່າ:
“ຄວາມເຄັ່ງຕຶງຢູ່ທະເລຕາເວັນອອກ ແລະ ທະເລຈີນຕາເວັນອອກ ພວມນັບມື້ນັບເພີ່ມຂຶ້ນ. ເຂດທະເລທີ່ໝັ້ນຄົງແມ່ນຜົນປະໂຫຍດລວມບໍ່ພຽງແຕ່ຂອງພາກພື້ນ ຫາກຂອງທັງປະຊາຄົມໂລກອີກ. ຕ້ອງອີງໃສ່ພື້ນຖານດ້ານກົດໝາຍ ຫາກບໍ່ອີງໃສ່ກຳລັງແຮງເພື່ອຮັກສາຄວາມເປັນລະບຽບຮຽບຮ້ອຍ. ພ້ອມທັງຮັບປະກັນຄວາມເສລີ ແລະ ຄວາມປອດໄພໃນການເດີນທະເລ ແມ່ນປັດໃຈທີ່ຂາດບໍ່ໄດ້ສຳລັບສັນຕິພາບ ແລະ ຄວາມຈະເລີນໃນພາກພື້ນ“.
ສ່ວນທ່ານຮອງນາຍົກລັດຖະມົນຕີ ຫງວຽນທ້ຽນເຍິນ ກໍ່ເນັ້ນໜັກເຖິງຄວາມສຳຄັນຂອງການເພີ່ມທະວີການຮ່ວມມືໃນພາກພື້ນ ເພື່ອຜ່ານຜ່າຄວາມແຕກຕ່າງກັນ ແລະ ແກ້ໄຂການພິພາດກັນໂດຍສັນຕິວິທີ. ທ່ານຮອງນາຍົກລັດຖະມົນຕີ ຫງວຽນທ້ຽນເຍິນ ກ່າວວ່າ:
“ເຂົ້າຮ່ວມບັນດາກົນໄກຮ່ວມມືໃນພາກພື້ນ ແມ່ນວິທີເພື່ອສ້າງຄວາມໄວ້ເນື້ອເຊື່ອໃຈ, ຜ່ານນັ້ນຫຼຸດຜ່ອນໄພເກີດການປະທະກັນ. ພຶດຕິກຳຕົວຈິງສະແດງໃຫ້ເຫັນວ່າ ລະດັບການຮ່ວມມື ແລະ ຄວາມໄວ້ເນື້ອເຊື່ອໃຈຍິ່ງສຸງປານໃດ, ໄພເກີດການປະທະກັນຍິ່ງຕຳ່ເທົ່ານັ້ນ ແລະ ຍິ່ງມີປະໂຫຍດໃຫ້ແກ່ການພັດທະນາຂອງແຕ່ລະປະເທດ ກໍ່ຄືຂອງທັງພາກພື້ນ. ຍ້ອນເຫດນັ້ນ, ຍາມໃດຫວຽດນາມກໍ່ເຂົາຮ່ວມໃນຂອບເຂດການຮ່ວມມື, ຮ່ວມສຳພັນໃນພາກພື້ນ ຢ່າງຕັ້ງໜ້າ ແລະ ມີຄວາມຮັບຜິດຊອບ“.
ໃນວັນດຽວກັນທ່ານນາຍົກລັດຖະມົນຕີຍີ່ປຸ່ນ Sin – do A – be ໄດ້ໃຫ້ການຕ້ອນຮັບທ່ານຮອງນາຍົກລັດຖະມົນຕີ ຫງວຽນທ້ຽນເຍິນ, ສອງຝ່າຍໄດ້ເຫັນດີເປັນເອກະສັນຈະຮ່ວມມືຢ່າງແໜ້ນແຟ້ນ ເພື່ອນຳການພົວພັນຄູ່ຮ່ວມມືຍຸດທະສາດພັດທະນານັບມື້ນັບເລິກເຊິ່ງ, ກວ້າງຂວາງ ແລະ ມີປະສິດທິຜົນ.
ໃນໂອກາດນີ້, ທ່ານຮອງນາຍົກລັດຖະມົນຕີ ຫງວຽນທ້ຽນເຍິນ ໄດ້ມີການພົບປະ ແລະ ເຮັດວຽກກັບປະທານອົງການຮ່ວມມືສາກົນຍີ່ປຸ່ນ (JICA). ປະທານລັດຖະສະພາມິດຕະພາບຍີ່ປຸ່ນ - ຫວຽດນາມ , ການນຳເວທີປາໄສເສດຖະກິດ ຍີ່ປຸ່ນ - ຫວຽດນາມ… ແລະ ເປັນສັກຂີພິຍານພິທີລົງນາມໃນບົດບັນທຶກການຮ່ວມມືລະຫວ່າງສູນຄົ້ນຄ້ວາຊັບພະຍາກອນໝັ້ນຄົງຍີ່ປຸ່ນ ແລະ ສະຖາບັນສືບພັນກະສີກຳຫວຽດນາມ.