(vovworld)-ຕອນເຊົ້າວັນທີ 19/6 ຢູ່ ຮ່າໂນ້ຍໄດ້ໄຂກອງປະຊຸມສຳມະນາ ອາຊຽນ-ຈີນ ດ້ວຍຫົວຂໍ້ວ່າ: “ເພີ່ມທະວີການຮ່ວມມືອາຊຽນ-ຈີນ ໃນການຊອກຫາ ແລະ ກູ້ໄພກູ້ຊີບສຳລັບຄົນ ແລະ ເຮືອ,ກຳປັ່ນຖືກປະສົບໄພຢູ່ທະເລຕາເວັນອອກ” ໂດຍມີການເຂົ້າຮ່ວມຂອງຜູ້ແທນ 40 ທ່ານ ຊຶ່ງແມ່ນບັນດາເຈົ້າຫນ້າທີ່ ແລະ ຜູ້ຊ່ຽວຊານມາຈາກ ອາຊຽນ, ຈີນ. ຈຸດປະສົງຂອງກອງປະຊຸມສຳມະນາແມ່ນແນໃສ່ຊອກຫາບັນດາມາດຕະການຊຸກຍູ້ການຮ່ວມມືລະຫວ່າງ ອາຊຽນ ແລະ ຈີນ ໃນການຊອກຫາ ແລະ ກູ້ໄພກູ້ຊີບສຳລັບຄົນ ແລະ ເຮືອ, ກຳປັ່ນຖືກປະສົບໄພຢູ່ທະເລຕາເວັນອອກ ປະກອບສ່ວນປັບປຸງສະພາບສັນຕິພາບ, ສະຖຽນລະພາບ ແລະ ຄວາມເປັນລະບຽບຮຽບຮ້ອຍຢູ່ທະເລຕາເວັນອອກ, ຜ່ານນັ້ນ ສ້າງຄວາມໄວ້ເນື້ອເຊື່ອໃຈລະຫວ່າງ ອາຊຽນ ແລະ ຈີນໃນສະພາບການພິພາດອະທິປະໄຕ ແລະ ສິດອະທິປະໄຕຢູ່ທະເລຕາເວັນອອກບໍ່ທັນໄດ້ຮັບການແກ້ໄຂຢ່າງເຖິງຖອງ. ເມື່ອແລກປ່ຽນກັບນັກຂ່າວຢູ່ນອກກອງປະຊຸມສຳມະນາ, ທ່ານຮອງລັດຖະມົນຕີການຕ່າງປະເທດຫວຽດນາມ ຟ້າມກວາງວີງ ໄດ້ເນັ້ນຫນັກວ່າ:
“ພາກສ່ວນທີ່ສຳຄັນຂອງ DOC ນັ້ນແມ່ນບັນດາມາດຕະການສ້າງຄວາມໄວ້ເນື້ອເຊື່ອໃຈ. ແລະນີ້ແມ່ນຫນຶ່ງໃນບັນດາມາດຕະການຊື່ງສອງຝ່າຍໄດ້ທາບທາມຄຳເຫັນເຊິ່ງກັນ ແລະກັນເພື່ອຊຸກຍູ້ການສ້າງຄວາມໄວ້ເນື້ອເຊື່ອໃຈ. ຜ່ານບັນດາການເຄື່ອນໄຫວຄືແນວນີ້, ບັນດາຝ່າຍຈຶ່ງສາມາດເຂົ້າໃຈເຊິ່ງກັນ ແລະ ກັນກວ່າ ຫລັງຈາກນັ້ນຈະມີບັນດາມາດຕະການຍື່ນສະເຫນີຕໍ່ຂັ້ນລັດຖະບານສອງຝ່າຍເພື່ອຮ່ວມມືນຳກັນ. ແຕ່ຢາກຮ່ວມມືເພື່ອສ້າງຄວາມໄວ້ເນື້ອເຊື່ອໃຈຕ້ອງຮັບປະກັນຈຸດໝາຍສັນຕິພາບ, ສະຖຽນລະພາບ, ຄວາມໝັ້ນຄົງຄວາມປອດໄພການເດີນທະເລ ແລະ ຄວາມເສລີໃນການແລກປ່ຽນການຄ້າຢູ່ພາກພື້ນນີ້. ”
ພາບປະກອບ:internet
|
ທ່ານຮອງລັດຖະມົນຕີການຕ່າງປະເທດຫວຽດນາມ ຟ້າມກວາງວີງ ຢືນຢັນວ່າ: ໂດຍແມ່ນປະເທດແຄມທະເລ ດ້ວຍຄວາມປາດຖະຫນາ ແລະ ມີເຈດຕະນາດີຢາກຊຸກຍູ້ການສ້າງຄວາມໄວ້ເນື້ອເຊື່ອໃຈ ແລະ ການຮ່ວມມືໃນພາກພື້ນເພື່ອສັນຕິພາບ, ສະຖຽນລະພາບລວມຢູ່ທະເລຕາເວັນອອກ, ຫວຽດນາມ ມີຄວາມເອົາໃຈໃສ່ທີ່ສຸດເຖິງການຊຸກຍູ້ການຮ່ວມມືໃນພາກພື້ນກ່ຽວກັບການຊອກຫາ ແລະ ກູ້ໄພກູ້ຊີບຄົນ ແລະ ເຮືອກຳປັ່ນຖືກປະສົບໄພຢູ່ທະເລຕາເວັນອອກ.