ກອງປະຊຸມໃຫຍ່ຜູ້ແທນອົງຄະນະພັກແຂວງ ຕ່ຽນຢາງ
ຄັ້ງທີ 10 ອາຍຸການ 2015 – 2020
(ພາບ: tiengiang.gov.vn)
(vovworld) – ກອງປະຊຸມໃຫຍ່ຜູ້ແທນອົງຄະນະພັກແຂວງ ຕ່ຽນຢາງ ຄັ້ງທີ 10 ອາຍຸການ 2015 – 2020 ດ້ວຍຫົວຂໍ້ “ຍົກສູງຄວາມສາມາດຊີ້ນຳນຳພາຮອບດ້ານຂອງອົງຄະນະພັກ, ເພີ່ມທະວີຄວາມສາມັກຄີ, ເສີມຂະຫຍາຍປະຊາທິປະໄຕ, ຂະຫຍັນຂັນເຄື່ອນ, ມີຫົວຄິດປະດິດສ້າງ, ກໍ່ສ້າງ ຕ່ຽນຢາງ ເປັນແຂວງພັດທະນາໝັ້ນຄົງໃນເຂດທົ່ງພຽງແມ່ນ້ຳຂອງ” ໄດ້ໄຂຂຶ້ນໃນຕອນເຊົ້າວັນທີ 20/10 ຢູ່ນະຄອນ ໝີທໍ. ເຂົ້າຮ່ວມ ແລະ ກ່າວຄຳເຫັນຊີ້ນຳກອງປະຊຸມ ທ່ານພົນເອກ ໂງຊວນລິ້ກ ເລຂາສູນກາງພັກ, ຫົວໜ້າກົມໃຫຍ່ການເມືອງກອງທັບປະຊາຊົນ ຫວຽດນາມ, ຕີລາຄາສູງບັນດາຜົນງານ ຊຶ່ງອົງຄະນະພັກ ແລະ ປະຊາຊົນແຂວງ ຕ່ຽນຢາງ ບັນລຸໄດ້ໃນໄລຍະຜ່ານມາ, ພິເສດແມ່ນໃນຂົງເຂດພັດທະນາເສດຖະກິດຕິດພັນກັບວຽກງານຮັບປະກັນຊີວິດສັງຄົມ. ທ່ານພົນເອກ ໂງຊວນລິ້ກ ສະເໜີແຂວງ ຕ່ຽນຢາງ ສຸມໃສ່ປະຕິບັດການສ້າງໂຄງປະກອບພື້ນຖານເສດຖະກິດຄືນໃໝ່, ຈຸດສຸມການສ້າງໂຄງປະກອບຂະແໜງກະສິກຳແຂວງຄືນໃໝ່ ໃນນັ້ນຍູ້ແຮງຮູບແບບລ້ຽງສັດ, ປູກຕົ້ນໄມ້ກິນໝາກຕາມທິດປູກຝັງຮັບໃຊ້ສະເພາະການສົ່ງອອກ. ອົງຄະນະພັກແຂວງ ຕ່ຽນຢາງ ຕ້ອງໃສ່ໃຈເປັນພິເສດການພັດທະນາແຫຼ່ງຊັບພະຍາກອນມະນຸດ, ເຮັດວຽກງານພະນັກງານໃຫ້ດີ, ເອົາໃຈໃສ່ເປັນພິເສດເຖິງພະນັກງານຍິງ, ພະນັກງານໜຸ່ມ, ພະນັກງານມີລະດັບຄວາມຮູ້ສູງ. ໄປຄຽງຄູ່ກັບການພັດທະນາເສດຖະກິດ, ແຂວງ ຕ່ຽນຢາງ ຕ້ອງເອົາໃຈໃສ່ເຖິງວຽກງານປ້ອງກັນຊາດ - ປ້ອງກັນຄວາມສະຫງົບ, ກໍ່ສ້າງພັກ.