(vovworld) - ໃນຕອນຄໍ່າວັນທີ 09/03, ງານບຸນກາເຟ ບວນມາທວດ ຄັ້ງທີ 4 ປີ 2013 ດ້ວຍຫົວຂໍ້ວ່າ “ກາເຟບວນມາທວດ ຮ່ວມສຳພັນ ແລະ ພັດທະນາ”ໄດ້ຖືກຈັດຂຶ້ນຢູ່ແຂວງດັກລັກຢ່າງເປັນທາງການ. ໃນລະຫວ່າງວັນທີ 9 – 12/03, ງານບຸນກາເຟ ບວນມາທວດ ບໍ່ພຽງແຕ່ເພື່ອເຊີດຊູຕົ້ນກາເຟ, ເຊິ່ງແມ່ນຕົ້ນໄມ້ຊະນິດສຳຄັນທີ່ສຸດໃນໂຄງປະກອບຜົນລະປູກຢູ່ທ້ອງຖິ່ນເທົ່ານັ້ນ, ຫາກຍັງແມ່ນເຫດການວັດທະນະທຳເຊິ່ງໄດ້ຈັດຕັ້ງຂຶ້ນດ້ວຍຂອບຂະໜາດໃຫຍ່ ເພື່ອຕ້ອນຮັບບັນດານັກລົງທຶນ, ແຂກມາຊົມ. ໃນຂອບເຂດຂອງງານບຸນ, ແຂກທ່ອງທ່ຽວໄດ້ຊິມລັດຊາດພິເສດຂອງກາເຟຢູ່ຮ້າຍກາເຟ 20 ແຫ່ງທີ່ມີຊື່ສຽງໃນທົ່ວນະຄອນບວນມາທວດ ໂດຍບໍ່ເສຍຄ່າ.
ແລະກໍໃນວັນດຽວກັນ, ຢູ່ນະຄອນບວນມາທວດ, ໄດ້ໄຂງານຕະຫຼດນັດສະເພາະກ່ຽວກັບຂະແໜງກາເຟ ແລະ ຜະລິດຕະພັນເຄື່ອງໝາຍການຄ້າຫວຽດນາມ. ທ່ານ ເລືອງວັນຕື້, ປະທານສະມາຄົມກາເຟ, ກາກາວ ຫວຽດນາມ ໃຫ້ຮູ້ວ່າ.
“ສິ່ງທີ່ເຮົາເຫັນໄດ້ງ່າຍວ່າ ຈຳນວນວິສາຫະກິດເຂົ້າຮ່ວມງານຕະຫຼາດນັບມື້ນັບຫຼາຍຂຶ້ນ ພາຍຫລັງໄດ້ຈັດຕັ້ງເປັນ 4 ຄັ້ງ. ວິສາຫະກິດຕ່າງປະເທດກໍເຂົ້າຮ່ວມຫຼາຍກວ່າ. ທີ 2 ແມ່ນ, ຜະລິດຕະພັນກາເຟ ນັບມື້ນັບອຸດົມສົມບຸນກວ່າ. ມີຫຼາຍວິສາຫະກິດໄດ້ມີຜະລິດຕະພັນປຸງແຕ່ງ. ຂ້າພະເຈົ້າຖືວ່ານີ້ແມ່ນບັນດາບາດກ້າວທີ່ສຳຄັນ, ຜ່ານນັ້ນ ສາມາດເຫັນໄດ້ຄຸນນະພາບຂອງກາເຟທີ່ນັບມື້ນັບເພີ່ມຂຶ້ນ ແລະ ຜູ້ປູກກາເຟໄດ້ເອົາໃຈໃສ່ເຖິງມູນຄ່າເພີ່ມກວ່າ ເພື່ອຍົກມູນຄ່າກາເຟຫວຽດນາມ”.
ງານຕະຫຼາດນັດຂະແໜງກາເຟ ແລະ ຜະລິດຕະພັນເຄື່ອງໝາຍການຄ້າຫວຽດນາມ ຄັ້ງນີ້ ໄດ້ດຶງດູດກວ່າ 200 ວິສາຫະກິດທັງຢູ່ພາຍໃນ ແລະ ຕ່າງປະເທດ ທີ່ເຂົ້າຮ່ວມການວາງສະແດງຜະລິດຕະພັນດ້ວຍຮ້ານວາງສະແດງ 720 ຮ້ານ.