(vovworld) - ງານວາງສະແດງທີ່ມີຊື່ວ່າ “ຄວາມປະທັບໃຈຫວຽດນາມ” ຫາກໍຖືກໄຂຂື້ນຢູ່ສູນວັດທະນະທຳຫວຽດນາມ ປະຈຳຝລັ່ງ, ເພື່ອແນໃສ່ໂຄສະນາໃຫ້ພໍແມ່ປະຊາຊົນຊາວຫວຽດນາມ ອາໄສຢູ່ຝລັ່ງ, ມະຫາຊົນຝລັ່ງ ແລະ ເພື່ອນມິດສາກົນຢູ່ຝລັ່ງກ່ຽວກັບຊາວຫວຽດນາມ ແລະ ຊຸດອາພອນປະຈຳເຜົ່າຫວຽດນາມ ຈຳນວນໜຶ່ງ. ງານໄດ້ຈັດວາງສະແດງກ່ຽວກັບວັດທະນະທຳສະເພາະຂອງຫວຽດນາມ, ດ້ວຍບັນດາຊຸດອາພອນທີ່ມີສີສັນຫຼາກຫຼາຍຂອງບັນດາເຜົ່າສ່ວນໜ້ອຍຄື, ຜູ້ໄທ, ໄຕ່, ນຸ່ງ, ຢາວ, ຮ່າຍີ່… ເຊິ່ງດຳລົງຊີວິດຢູ່ບັນເຂດພາກທີ່ແຕກຕ່າງກັນໃນປະເທດຫວຽດນາມ, ສະແດງໃຫ້ເຫັນມູນເຊື້ອ ດ້ວຍຮິດຄອງປະເພນີ, ຄວາມເຊື່ອຖື, ຄວາມງາມ ແລະ ຈິດໃຈຂອງບັນດາເຜົ່າຫວຽດນາມ, ງານວາງສະແດງກໍໄດ້ສະແດງຊຸດເສື້ອຍາວຂອງເຜົ່າ ກິງ, ທີ່ເປັນສັນຍາລັກພົ້ນເດັ່ນ ແລະ ຕາງໜ້າໃຫ້ແກ່ສີສັນວັດທະນະທຳຫວຽດນາມ. ບັນດາເພື່ອນມິດຝລັງ ທີ່ເຂົ້າຮ່ວມງານວາງສະແດງໄດ້ໃຫ້ຂໍ້ສັງເກດວ່າ ບັນດາພາບພົດດັ່ງກ່າວໄດ້ປະກອບສ່ວນສ້າງຄວາມປະທັບໃຈພິເສດໃຫ້ນັກທ່ອງທ່ຽວທີ່ມາຢ້ຽມຢາມຫວຽດນາມ.