(vovworld) – ວັນທີ 23/05, ລາຍການ “ກຽດສະຫງ່າຫວຽດນາມ” ໂດຍໜັງສືພິມແຮງງານ ແລະ ສະຖານີໂທລະພາບຫວຽດນາມ ສົມທົບກັນຈັດຂຶ້ນຢູ່ນະຄອນຮ່າໂນ້ຍ. ນີ້ແມ່ນຄັ້ງທີ 11, ລາຍການ “ກຽດສະຫງ່າຫວຽດນາມ” ໄດ້ຮັບການຈັດຕັ້ງ, ຊຶ່ງມີສ່ວນບຸກຄົນ, ໝູ່ຄະນະນັບພັນຄົນທີ່ມີຜົນງານພິເສດ ແລະ ໄດ້ຮັບການເຊີດຊູກ່ຽວກັບບັນດາການປະກອບສ່ວນໃຫ້ແກ່ພາລະກິດສ້າງສາ ແລະ ປົກປັກຮັກສາປະເທດຊາດ. ກ່າວຄຳເຫັນທີ່ພິທີ, ທ່ານປະທານປະເທດຫວຽດນາມ ເຈືອງເຕີນຊາງ ໄດ້ຊົມເຊີຍບັນດາໝູ່ຄະນະ, ສ່ວນບຸກຄົນດີເດັ່ນໃນຂະບວນການແຂ່ງຂັນຮັກຊາດ ແລະ ຍ້ອງຍໍບັນດາຫົວໜ່ວຍທີ່ໄດ້ຈັດຕັ້ງລາຍການ “ກຽດສະຫງ່າຫວຽດນາມ” ໃນໄລຍະຕະຫຼອດ 10 ປີຜ່ານມາຢ່າງສຳເລັດຜົນ. ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ.
“ໃນພາລະກິດປ່ຽນໃໝ່, ສ້າງສາ ແລະ ປົກປັກຮັກສາເອກະລາດ, ອະທິປະໄຕ, ເຂດດິນແດນອັນຄົບຖ້ວນ ໃນປະຈຸບັນ, ຄຳຮຽກຮ້ອງແຂ່ງຂັນຮັກຊາດຂອງປະທານໂຮ່ຈິມິນ ຍາມໃດກໍ່ແມ່ນກຳລັງໜູນດຶງດູດປະຊາຊົນທຸກຊັ້ນວັນນະ, ທຸກພາກສ່ວນເສດຖະກິດ, ບັນດາອົງການຈັດຕັ້ງ, ຂະແໜງການ, ໝູ່ຄະນະໃນສັງຄົມສະໜັບສະໜູນ ແລະ ເຂົ້າຮ່ວມ. ຈາກບັນດາຂະບວນການແຂ່ງຂັນຮັກຊາດ ໄດ້ມີບັນດາແບບຢ່າງຄົນດີວຽກເດັ່ນ, ບັນດາໝູ່ຄະນະ ແລະ ສ່ວນບຸກຄົນດີເດັ່ນເຂົ້າຮ່ວມເປັນຈຳນວນຫຼວງຫຼາຍ ແລະ ໄດ້ຮັບການເຊີດຊູຈາກສັງຄົມ, ຮໍ່າຮຽນ ແລະ ປະຕິບັດຕາມ”.
ກ່ອນໜ້ານັ້ນ, ວັນທີ 22/05, ທີ່ການຕ້ອນຮັບບັນດາແບບຢ່າງດີເດັ່ນເຂົ້າຮ່ວມລາຍການ, ທ່ານເລຮົ່ງແອງ, ກຳມະການກົມການເມືອງ, ຜູ້ປະຈຳການຄະນະເລຂາສູນກາງພັກ ແລະ ທ່ານ ຫງວຽນທ້ຽນເຍີນ, ກຳມະການສູນກາງພັກ, ປະທານຄະນະກຳມະການສູງກາງແນວໂຮມປະເທດຊາດຫວຽດນາມ ສະແດງຄວາມປາດຖະໜາວ່າ ບັນດາສ່ວນບຸກຄົນ, ໝູ່ຄະນະທີ່ໄດ້ຮັບການເຊີດຊູ ສືບຕໍ່ເສີມຂະຫຍາຍຜົນງານທີ່ບັນລຸໄດ້, ຝຶກຝົນຫຼໍ່ຫຼອມ, ຮໍ່າຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມິນ… ເພື່ອໃຫ້ເປັນແກ່ນສານແຜ່ຂະຫຍາຍຂະບວນການແຂ່ງຂັນຮັກຊາດ, ຊຸກຍູ້ການພັດທະນາເສດຖະກິດສັງຄົມ ແລະ ປະກອບສ່ວນປົກປັກຮັກສາອະທິປະໄຕເຂດທະເລ, ໝູ່ເກາະຂອງຫວຽດນາມ.