(vovworld) – ວາລະປະຊຸມຄັ້ງທີ 9 ຄະນະປະຈຳສະພາແຫ່ງຊາດຖືກໄຂຂຶ້ນໃນວັນທີ 16/7 ທີ່ຮ່າໂນ້ຍ. ໃນ 2 ມື້ທີ່ເຮັດວຽກ, ຄະນະປະຈຳສະພາແຫ່ງຊາດຈະພິຈາລະນາ, ໃຫ້ຄຳເຫັນແກ່ບາງເນື້ອໃນທີ່ສຳຄັນ, ໃນນັ້ນມີການຊັກຖາມ ແລະ ຕອບຄຳຊັກຖາມທ່ີວາລະປະຊຸມຄັ້ງທີ 10 ແລະ ບົດລາຍງານສັງລວມຄຳເຫັນ ທີສະເໜີດຳເນີນການອະພິປາຍທີ່ສະພາຊົນເຜົ່າ ແລະ ບັນດາຄະນະກຳມາທິການສະພາແຫ່ງຊາດໃນຊຸມເດືອນທີ່ຍັງເຫຼືອຂອງປີ 2012. ຄະນະປະຈຳສະພາແຫ່ງຊາດກໍຕີລາຄາໝາກຜົນຂອງກອງປະຊຸມສະໄໝສາມັນເທື່ອທີ 3, ສະພາແຫ່ງຊາດຫວຽດນາມຊຸດທີ 13 ແລະ ໃຫ້ຄຳຄິດຄຳເຫັນເບື້ອງຕົ້ນກ່ຽວກັບການກະກຽມກອງປະຊຸມສະໄໝສາມັນເທື່ອທີ 4, ສະພາແຫ່ງຊາດຫວຽດນາມຊຸດທີ 13 ຮັບຮອງເອົາຮ່າງ ລັດຖະບັນຍັດສະບັບປັບປຸງ, ເພີ່ມເຕີມບາງຂໍ້ມາດຕາຂອງລັດຖະບັນຍັດສຳລັບຜູ້ມີຄຸນງາມຄວາມດີຕໍ່ການປະຕິວັດ. ກໍໃນວາລະປະຊຸມຄັ້ງນີ້, ຄະນະປະຈຳສະພາແຫ່ງຊາດກໍໃຫ້ຄຳເຫັນຕໍ່ໃບສະເໜີຂອງລັດຖະບານກ່ຽວກັບເລື່ອງ ຂໍອະນຸຍາດໃຫ້ສ້າງຕັ້ງນະຄອນ Ba Ria ທີ່ຂຶ້ນກັບແຂວງ Ba Ria – Vung Tau ໃນໄລຍະປະຕິບັດທົດລອງບໍ່ຈັດຕັ້ງສະພາປະຊາຊົນເມືອງ, ຕາແສງ ແລະ ບາງເນື້ອໃນອື່ນໆອີກ.
ໃນຖານະເປັນປະທານວາລະປະຊຸມ, ທ່ານປະທານສະພາແຫ່ງຊາດ Nguyen Sinh Hung ຖືວ່າ, ຜົນສຳເລັດທີ່ສຸດຂອງກອງປະຊຸມສະໄໝສາມັນເທື່ອທີ 3, ສະພາແຫ່ງຊາດຫວຽດນາມຊຸດທີ 13 ນັ້ນແມ່ນໄດ້ເຮັດໃຫ້ປະຊາຊົນເຫັນໄດ້ການເຄື່ອນໄຫວຂອງພັກ, ລັດ ແລະ ລັດຖະບານ ໃນໄລຍະຜ່ານມາ, ຜ່ານນັ້ນສ້າງຄວາມໄວ້ເນື້ອເຊື່ອໃຈ ແລະ ການແບ່ງປັນຂອງປະຊາຊົນຕໍ່ພັກ, ລັດ ແລະ ລັດຖະບານຫວຽດນາມ ໃນໄລຍະຫຍຸ້ງຍາກຄືປະຈຸບັນ.
“ກອງປະຊຸມທີ່ຜ່ານມາໄດ້ຮັບຜົນສຳເລັດທີ່ສຸດ ແມ່ນເຮັດໃຫ້ປະຊາຊົນເຂົ້າໃຈໄດ້ວ່າພັກ, ລັດ ສະພາແຫ່ງຊາດ, ລັດຖະບານ ພວມເຄື່ອນໄຫວຢ່າງມີປະສິດທິຜົນ,ໂດຍ ຜ່ານເລື່ອງສະມາຊິກສະພາແຫ່ງຊາດລົງພົບປະກັບຜູ້ມີສິດເລືອກຕັ້ງ ເຮັດໃຫ້ປະຊາຊົນມີຄວາມໄວ້ເນື້ອເຊື່ອໃຈ. ເພາະສະນັ້ນ, ວຽກງານສ້າງກົດໝາຍ, ປະກາດໃຊ້ມະຕິນັບທັງທາງດ້ານເສດຖະກິດສັງຄົມ ແລະ ກົດໝາຍແມ່ນສຳຄັນທີ່ສຸດ, ນັ້ນແມ່ນເນື້ອໃນຈິດໃຈຂອງກອງປະຊຸມສະໄໝສາມັນເທື່ອທີ 4”.
ກ່ຽວກັບກອງປະຊຸມສະໄໝສາມັນເທື່ອທີ 4, ທ່ານປະທານສະພາແຫ່ງຊາດ Nguyen Sinh Hung ເນັ້ນໜັກວ່າ ຕ້ອງອີ່ງໃສ່ໃນສະພາບການພາຍໃນປະເທດ ແລະ ສາກົນ ເພື່ອມີການຕີລາຄາຢ່າງຊັດເຈັນກ່ຽວກັບໝາກຜົນພາຍຫຼັງສອງປີແຫ່ງການປະຕິບັດແຜນການພັດທະນາເສດຖະກິດ, ສັງຄົມຂອງປະເທດຊາດ ໄລຍະ 2010 – 2015. ກອງປະຊຸມຄັ້ງນີ້ ກໍມີບັນດາໂຄງການ, ຮ່າງກົດໝາຍໃຫຍ່ທີ່ຈຳເປັນຕ້ອງປັບປຸງໃຫ້ສຳເລັດ, ພິເສດແມ່ນປະກອບຄຳເຫັນໃສ່ຮ່າງກົດໝາຍວ່າດ້ວຍທີ່ດິນເປັນຄັ້ງທຳອິດ.