ໄຂວາລະປະຊຸມຄັ້ງທີ44ຄະນະປະຈຳສະພາແຫ່ງຊາດ
ວາລະປະຊຸມຄັ້ງທີ 44 ຂອງຄະນະປະຈຳສະພາແຫ່ງຊາດ
(ພາບ:cafef.vn)
|
(vovworld) - ຕອນເຊົ້າວັນທີ 14/1, ພາຍໃຕ້ການເປັນປະທານຂອງທ່ານປະທານສະພາແຫ່ງຊາດ ຫງວຽນຊິງຮຸ່ງ, ຄະນະປະຈຳສະພາແຫ່ງຊາດໄດ້ໄຂວາລະປະຊຸມຄັ້ງທີ 44 ດ້ວຍຫຼາຍເນື້ອໃນສຳຄັນ, ໃນນັ້ນມີເລື່ອງກະກຽມໃຫ້ການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນ, ອາຍຸການ 2016-2021, ເຊິ່ງຈະຈັດຕັ້ງໃນວັນທີ 22/5. ກ່າວຄວາມເຫັນໄຂວາລະປະຊຸມ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຊີ້ແຈ້ງວ່າ, ທີ່ວາລະປະຊຸມຄັ້ງນີ້, ຄະນະປະຈຳສະພາແຫ່ງຊາດຈະພິຈາລະນາ, ຮັບຮອງເອົາມະຕິກ່ຽວກັບການປະກາດວັນເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນ ອາຍຸການ 2016-2021; ໃຫ້ຄຳເຫັນກ່ຽວກັບຮ່າງມະຕິທີ່ແນະນຳກ່ຽວກັບການກຳນົດອົງປະກອບ, ພາກສ່ວນ, ການຈັດແບ່ງຈຳນວນຜູ້ໄດ້ຮັບສະເໜີອອກສະໝັກເລືອກຕັ້ງເປັນສະມາຊິກສະພາປະຊາຊົນທຸກຂັ້ນ. ພິຈາລະນາ, ຮັບຮອງເອົາມະຕິກຳນົດລະອຽດ ແລະ ແນະນຳກ່ຽວກັບການປະຕິບັດບາງມາດຕາຂອງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ກໍ່ໃສ່ໃຈບັນດາອົງການທີ່ກ່ຽວຂ້ອງຄວນສົມທົບກັນຢ່າງແໜ້ນແຟ້ນ, ຮັບປະກັນຊີ້ນຳ, ແນະນຳຢ່າງຊັດເຈນ ເພື່ອໃຫ້ການເລືອກຕັ້ງໄດ້ຮັບຜົນສຳເລັດ. ພາຍຫຼັງວາລະໄຂ, ຄະນະປະຈຳສະພາແຫ່ງຊາດ ໄດ້ໃຫ້ຄຳເຫັນກ່ຽວກັບການຮັບເອົາ, ປັບປຸງຮ່າງກົດໝາຍວ່າດ້ວຍການລົງນາມ, ການເຂົ້າເປັນສະມາຊິກ ແລະ ປະຕິບັດສົນທິສັນຍາສາກົນ (ສະບັບປັບປຸງ) ແລະ ກົດໝາຍວ່າດ້ວຍການສຳຜັດຂໍ້ມູນຂ່າວ, ໃຫ້ຄຳເຫັນໃສ່ຮ່າງດຳລັດໂດຍກຳນົດລະອຽດບາງຂໍ້ມາດຕາຂອງກົດໝາຍອຳນາດການປົກຄອງທ້ອງຖິ່ນ ແລະ ຮັບຮອງເອົາມະຕິກ່ຽວກັບການປະກາດວັນເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນອາຍຸການ 2016-2021.
ແລະກໍ່ຢູ່ທີ່ວາລະປະຊຸມ, ຄະນະປະຈຳສະພາແຫ່ງຊາດກໍ່ໃຫ້ຄຳເຫັນໃສ່ຮ່າງກົດໝາຍ 4 ສະບັບ ທີ່ຈະຍື່ນຕໍ່ສະພາແຫ່ງຊາດທີ່ກອງປະຊຸມສະໄໝສາມັນເທື່ອທີ 11 ອີກເຊັ່ນ: ຮ່າງກົດໝາຍວ່າດ້ວຍການລົງນາມ, ການເຂົ້າເປັນສະມາຊິກ ແລະ ປະຕິບັດສົນທິສັນຍາສາກົນ (ສະບັບປັບປຸງ); ກົດໝາຍວ່າດ້ວຍການສຳຜັດກັບຂໍ້ມູນ; ກົດໝາຍວ່າດ້ວຍພາສີສົ່ງອອກ, ພາສີນຳເຂົ້າ (ສະບັບປັບປຸງ); ກົດໝາຍປັບປຸງ, ເພີ່ມເຕີມບາງມາດຕາຂອງກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍຈຳໜ່າຍພິເສດ, ກົດໝາຍວ່າດ້ວຍການຄຸ້ມຄອງພາສີອາກອນ ແລະ ບາງເນື້ອໃນອື່ນໆອີກ.