ຊາວໄຊງ່ອນ ລົງຖະໜົນອວຍພອນໄຊຊະນະ (ພາບເອກະສານ)
(vovwold) - 37 ປີໄດ້ລ່ວງເລີຍໄປແລ້ວ, ນັບແຕ່ວັນພາກໃຕ້ຫວຽດນາມໄດ້ຮັບການປົດປ່ອຍຢ່າງສົມບຸນ, ແຕ່ຄວາມໝາຍປະຫວັດສາດຂອງໄຊຊະນະວັນທີ 30-4-1975 ຍັງຄົງດັງກ້ອງກັງວານໄປທົ່ວເຖິງປະຈຸບັນ. ສຳຫຼັບບັນດາຜູ້ຊ່ຽວຊານ, ນັກການທະຫານ, ນັກຂ່າວທັງພາຍໃນ ແລະ ຕ່າງປະເທດແລ້ວ, ເຫດການປະຫວັດສາດນີ້ສະແດງໃຫ້ເຫັນຄວາມປາຖະ ໜາຢາກໄດ້ຮັບເອກະລາດແຫ່ງຊາດ, ນ້ຳໃຈມະຫາສາມັກຄີ ແລະ ພູມປັນຍາຂອງຊາວຫວຽດນາມ. ເອື້ອຍ Ialien Ecurina, ນັກຂ່າວລັດເຊຍເວົ້າວ່າ:
”ນີ້ແມ່ນຄວາມໝາຍປະຫວັດສາດອັນຍິ່ງໃຫຍ່ ເພາະວ່າມັນແມ່ນໄຊຊະນະຂອງໄລຍະໃໝ່ກັບອະດີດຕະການ, ແມ່ນໄຊຊະນະແຫ່ງຄວາມເສລີກັບການກົດຂີ່ຂູດຮີດ, ແມ່ນໄຊຊະນະຂອງຊາວຫວຽດນາມ ຕໍ່ຈັກກະພັດອາເມລິກາ. ໄຊຊະນະນັ້ນຍັງສະແດງໃຫ້ເຫັນເຈດຈຳນົງ, ຄວາມອົງອາດກ້າຫານ ແລະ ຈິດໃຈພິລະອາດຫານຂອງຊາວຫວຽດນາມ ອີກດ້ວຍ”.
ໄຊຊະນະຂອງການຕໍ່ຕ້ານ ຕ້ານອາເມລິກາກູ້ຊາດກ່ອນນີ້ 37 ປີ ແມ່ນມາຈາກຫຼາຍປັດໃຈ. ພົນໂທ Phan Trung Kien, ອາດີດລັດຖະມົນຕີຊ່ວຍວ່າການກະຊວງປ້ອງກັນປະເທດ, ໃຫ້ຂໍ້ສັງເກດວ່າ:
”ປະຕິບັດການປົດປ່ອຍພາກໃຕ້ຢ່າງສົມບຸນ, ທ້ອນໂຮມປະເທດຊາດເປັນເອກະພາບ ແມ່ນກຳລັງແຮງແຫ່ງຄວາມມະຫາສາມັກຄີທົ່ວປວງຊົນທັງຊາດ, ໂດຍບໍ່ຈຳແນກພາກສ່ວນ, ສາສະໜາ, ທົ່ວປວງຊົນທຳການຕໍ່ຕ້ານ, ທົ່ວປວງຊົນຕໍ່ສູ້ຕ້ານສັດຕູ. ຄຽງຂ້າງນັ້ນແມ່ນການຊີ້ນຳນຳພາທີ່ປີຊາສາມາດຂອງປະທານ ໂຮ່ຈີມິນ ແລະ ພັກກອມມູນິດຫວຽດນາມ”.
ນັກຄົ້ນຄ້ວາປະຫວັດສາດຝລັ່ງ Alain Rusci ຖືວ່າ ໄຊຊະນະວັນທີ 30-4-1975 ຂອງຫວຽດນາມແມ່ນເຫດການທີ່ມີຄວາມສຳຄັນຍິ່ງບໍ່ພຽງແຕ່ສຳຫຼັບຫວຽດນາມ ຫາກສຳຫຼັບປະຊາຊົນໃນທົ່ວໂລກອີກດ້ວຍ. ສ່ວນນັກຂ່າວຈີນ ຈາງຢາສາງ, ໃຫ້ຮູ້ວ່າ:
”ການຕໍ່ສູ້ຕ້ານອາເມລິກາ ຂອງປະຊາຊົນຫວຽດນາມ, ພິເສດແມ່ນນ້ຳໃຈສູ້ຮົບອັນພິລະອາດຫານຂອງກອງທັບ ແລະ ປະຊາຊົນຫວຽດນາມ ໄດ້ດຶງດູດຄວາມສົນໃຈຂອງປະຊາຊົນໂລກ, ແລະ ໄດ້ຮັບຄວາມຍ້ອງຍໍຈາກປະຊາຊົນໂລກ. ຈິດໃຈສູ້ຮົບໂດຍບໍ່ຢ້ານຄວາມຫຍຸ້ງຍາກລຳບາກ, ບໍ່ຢ້ານເສຍສະຫຼະ ແລະ ການກະທຳວິລະຊົນຂອງກອງທັບ ແລະ ປະຊາຊົນຫວຽດນາມ ໄດ້ສ້າງຄວາມຕື້ນຕັນໃຈໃຫ້ແກ່ຂ້າພະເຈົ້າ”
ດ້ວຍຄວາມໝາຍປະຫວັດສາດອັນຍິ່ງໃຫຍ່ນັ້ນ, ໄຊຊະນະວັນທີ 30-4-1975 ຈະເປັນຂີດໝາຍອັນສະຫງ່າໃນປະຫວັດສາດຂອງຊາດຫວຽດນາມ ແລະ ຈະສືບຕໍ່ແມ່ນກຳລັງໜູນເພື່ອໃຫ້ປະຊາຊົນຫວຽດນາມ ກ້າວຂຶ້ນຢ່າງໝັ້ນຄົງບົນເສັ້ນທາງສ້າງສາປະເທດຊາດ.
ເນື່ອງໃນໂອກາດນີ້, ໜັງສືພິມຫວຽດນາມ ສະບັບອອກວັນທີ 30/4 ໄດ້ລົງພິມຫຼາຍບົດ, ຂ່າວກ່ຽວກັບໄຊຊະນະວັນທີ 30/4/1975. ໜັງສືພິມ ກວນໂດ້ຍເຍິນເຢີນ (ກອງທັບປະຊາຊົນ) ຫວຽດນາມ ໄດ້ຢືນຢັນວ່າ, ໄຊຊະນະວັນທີ 30/4/1975 ແມ່ນໄຊຊະນະ ຂອງສິລະປະດຳເນີນສົງຄາມປະຊາຊົນຫວຽດນາມ. ໄຊຊະນະນີ້ແມ່ນໜຶ່ງ ໃນບັນດາຂີດໝາຍອັນສະຫງ່າລາສີທີ່ສຸດໃນປະຫວັດສາດແຫ່ງການສ້າງສາ ແລະ ປົກປັກຮັກສາປະເທດຊາດ. ນັ້ນແມ່ນສັນຍາລັກອັນຮຸ່ງເຮືອງເຫຼືອງເຫຼື້ອມຂອງລັດທິວິລະຊົນປະຕິວັດຫວຽດນາມ.
ໜັງສືພິມເຍິນເຢີນ (ປະຊາຊົນ) ສຽງຂອງພັກກອມມູນິດຫວຽດນາມກໍ່ລົງພິມບົດຂຽນ ”ນະຄອນທີ່ໃສ່ຊື່ລຸງ ໂຮ່, ພ້ອມກັບທົ່ວປະເທດກ້າວຂຶ້ນ, ເພື່ອທັງປະເທດ” ບົດຂຽນຢືນຢັນວ່າ, ພາຍຫຼັງ 37 ປີແຫ່ງວັນປົດປ່ອຍ ພາກໃຕ້, ໂຮມປະເທດຊາດເປັນເອກະພາບ, ນະຄອນໂຮ່ຈີມິນໄດ້ຮັກສາລະດັບເຕີບໂຕຢ່າງຕໍ່ເນື່ອງໃນທຸກຂົງເຂດ. ຄິດສະເລ່ຍໄລຍະ 2006 -2010 ລະດັບເຕີບໂຕທາງດ້ານເສດຖະກິດຂອງນະຄອນແມ່ນ 11,2%/ປີ, ເທົ່າກັບ 1,5 ເທົ່າຂອງລະດັບເຕີບໂຕໃນທົ່ວປະເທດ.
ໃນໂອກາດນີ້, ວັນທີ 29/4, ທ່ານປະທານປະເທດ Truong Tan Sang ໄດ້ໄປຢ້ຽມຢາມ ແລະ ກວດກາຄວາມຄືບໜ້າໃນການປະຕິບັດໂຄງການຟື້ນຟູເຂດກັກຂັງ B2 ຢູ່ເຂດປູຊະນີຍະສະຖານປະຫວັດສາດ, ຄຸກກັກຂັງນັກໂທດກອມມູນິດຫວຽດນາມ ຟູ໋ກວົກ (ກຽນຢາງ). ທ່ານປະທານເນັ້ນໜັກວ່າ, ບັນດາຫົວໜ່ວຍປະຕິບັດການກໍ່ສ້າງຄວນຖືວ່າ ນີ້ແມ່ນວຽກງານທີ່ມີຄວາມໝາຍຢ່າງເລິກເຊິ່ງ, ສະແດງໃຫ້ເຫັນຄວາມຮູ້ບຸນຄຸນຕໍ່ບັນດາວິລະຊົນ, ນັກຮົບທີ່ເສຍສະຫຼະຊີວິດເພື່ອຊາດ, ເພື່ອເອກະລາດ, ເສລີພາບຂອງປະເທດຊາດ.
ຕອນເຊົ້າວັນທີ 30/4, ແຂວງກວາງຈີ້ ໄດ້ຈັດຕັ້ງພິທີຊັກທຸງຊາດທ້ອນໂຮມປະເທດຊາດເປັນເອກະພາບ, ເນື່ອງໃນໂອກາດສະເຫຼີມສະຫຼອງ 40 ປີ ແຫ່ງວັນປົດປ່ອຍກວາງຈີ້.
ພິທີຊັກທຸງຊາດຢູ່ກຳເພງເກົ່າກວາງຈີ້
(ພາບ: chinhphu.vn)
ອ່ານສູນທອນພົດນະພິທີຊັກທຸງຊາດທ້ອນໂຮມປະເທດຊາດເປັນເອກະພາບ, ທ່ານ Nguyen Duc Cuong, ຮອງເລຂາຄະນະພັກແຂວງ, ປະທານຄະນະກຳມະການປະຊາຊົນແຂວງກວາງຈີ້, ເນັ້ນໜັກວ່າ.
”ພະນັກງານນັບໝື່ນຄົນທີ່ມາຈາກທຸກແຖບຖີ່ນຂອງປະເທດຊາດໄດ້ມາກວາງຈີ້ ໃນຊຸມເດືອນປີອັນທຸກຍາກກາກກຳ, ແລະ ດຸເດືອດທີ່ສຸດ ເພືອຕໍ່ສູ້, ປົກປັກຮັກສາທຸງຊາດ, ປົກປັກຮັກສາພາກເໜືອສັງຄົມນິຍົມ, ປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບ. ພາຍຫຼັງສົງຄາມ, ກວາງຈີ້ ໄດ້ຮັການຟື້ນຟູເທື່ອລະກ້າວ, ເສດຖະກິດມີບາດກ້າວເຕີບໂຕພໍສົມຄວນ, ບັນດາບັນຫາສັງຄົມມີຄວາມກ້າວໜ້າຫຼາຍຢ່າງ, ຮັບປະກັນປ້ອງກັນຊາດ ປ້ອງກັນຄວາມສະຫງົບ”