ໄທຖືການຮ່ວມມືກັບຫວຽດນາມແມ່ນບຸລິມະສິດແຖວໜ້າ
ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ
ຕ້ອນຮັບທ່ານ ດອນ ພຣະມັດວິໃນ
(ພາບສຳນັກຂ່າວສານຫວຽດນາມ)
(vovworld) - ວັນທີ 08/07, ທີ່ການຕ້ອນຮັບທ່ານ ດອນ ພຣະມັດວິໃນ ລັດຖະມົນຕີກະຊວງການຕ່າງປະເທດ ໄທ, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ຢືນຢັນວ່າ: ນະໂຍບາຍສະເໝີຕົ້ນສະເໝີປາຍຂອງ ຫວຽດນາມ ປາດຖະໜາຢາກປັບປຸງ ແລະ ເພີ່ມທະວີການພົວພັນກັບ ໄທ ໃນຫລາຍຂົງເຂດ, ປາດຖະໜາວ່າ ໄທ ມີສະຖຽນລະພາບ ແລະ ພັດທະນາ. ທ່ານນາຍົກລັດຖະມົນຕີ ເນັ້ນໜັກວ່າ: ລັດຖະບານ ຫວຽດນາມ ໃຫ້ຄຳໝັ້ນສັນຍາ ຍາມໃດກໍ່ສ້າງເງື່ອນໄຂສະດວກໃຫ້ບັນດານັກລົງທຶນ ແລະ ວິສາຫະກິດ ໄທ ເຄື່ອນໄຫວຢ່າງສະດວກຢູ່ ຫວຽດນາມ; ສົ່ງເສີມວິສາຫະກິດ ໄທ ລົງທຶນເຂົ້າໃນບັນດາຂົງເຂດຄື: ນ້ຳມັນອາຍແກສ, ໄຟຟ້າ, ກໍ່ສ້າງເຂດອຸດສາຫະກຳ, ຕ່ຳແຜ່ນຕັດຫຍິບ…ທີ່ການຕ້ອນຮັບ, ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີ ໄທ ສະໜັບສະໜູນ ແລະ ສືບຕໍ່ເພີ່ມທະວີການຮ່ວມມືໃນ ອາຊຽນ ເພື່ອຮັບປະກັນຮັກສາຫຼັກໝັ້ນລວມຂອງ ອາຊຽນ ກ່ຽວກັບບັນຫາທະເລຕາເວັນອອກ, ຊຸກຍູ້ບັນລຸໄດ້ປະມວນຂໍ້ກຳນົດການປະພຶດຢູ່ທະເລຕາເວັນອອກ (COC) ໂດຍໄວ. ທ່ານນາຍົກລັດຖະມົນຕີກໍ່ສະເໜີ 2 ຝ່າຍສົມທົບກັບບັນດາປະເທດ, ອົງການຈັດຕັ້ງສາກົນໃນການພັດທະນາ, ຄຸ້ມຄອງ ແລະ ນຳໃຊ້ແຫຼ່ງນ້ຳແມ່ນ້ຳຂອງໃຫ້ໝັ້ນຄົງ ແລະ ມີປະສິດທິຜົນ.
ສ່ວນທ່ານລັດຖະມົນຕີກະຊວງການຕ່າງປະເທດ ໄທ ດອນ ພຣະມັດວິໃນ ປາດຖະໜາຢາກພັດທະນາການພົວພັນກັບ ຫວຽດນາມ ໃນທຸກຂົງເຂດ, ຖືການຮ່ວມມືກັບ ຫວຽດນາມ ແມ່ນໜຶ່ງໃນບັນດາບຸລິມະສິດແຖວໜ້າຂອງປະເທດນີ້; ພ້ອມທັງ ສະແດງຄວາມປາດຖະໜາວ່າ ໃນໄລຍະຈະມາເຖິງ ຈະຕ້ອນຮັບວິສາຫະກິດ ຫວຽດນາມ ຫລາຍແຫ່ງ ມາລົງທຶນຢູ່ ໄທ. ລັດຖະບານ ໄທ ໃຫ້ຄຳໝັ້ນສັນຍາສ້າງທຸກເງື່ອນໄຂສະດວກໃຫ້ບັນດາວິສາຫະກິດ ຫວຽດນາມ ລົງທຶນທຳມາຫາກິນ. ກ່ຽວກັບບັນຫາທະເລຕາເວັນອອກ, ທ່ານ ດອນ ພຣະມັດວິໃນ ຢືນຢັນວ່າ ທັດສະນະຂອງ ໄທ ນັ້ນແມ່ນບັນດາຝ່າຍຕ້ອງມານະພະຍາຍາມ ເພື່ອແກ້ໄຂບັນດາການຂັດແຍ້ງ ກັນ; ມານະພະຍາຍາມສາມັກຄີ ແລະ ຮ່ວມມື ເພື່ອເຮັດໃຫ້ນຳທະເລຕາເວັນອອກກາຍເປັນເຂດສັນຕິພາບ, ສະຖຽນລະພາບ ແລະ ພັດທະນາ.