ທ່ານນາຍົກລັດຖະມົນຕີ ຫງວຽນຊວັນຟຸກ ກ່າວຄຳເຫັນທີ່ພິທີ (ພາບ: TTXVN)

ຕອນເຊົ້າວັນທີ 11 ມີນາ, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນຊວັນຟຸກ ໄດ້ເຂົ້າຮ່ວມພິທີສະເຫຼີມສະຫຼອງວັນ ໜັງສືພິມ ເຍິນເຢິນ (ກະບອກສຽງຂອງພັກ) ອອກສະບັບທຳອິດ (11/3/1951 – 11/3/2021). ກ່າວຄຳເຫັນຢູ່ທີ່ນີ້, ທ່ານນາຍົກລັດຖະມົນຕີ ຫງວຽນຊວັນຟຸກ ໃຫ້ຮູ້ວ່າ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກກອມມູນິດ ຫວຽດນາມ ກຳນົດໄດ້ເປົ້າໝາຍ, ກຳນົດທິດພັດທະນາ ແລະ ໜ້າທີ່ຈຸດສຸມ, ຍຸດທະສາດບຸກທະລຸ ເພື່ອພັດທະນາປະເທດຊາດໃນໄລຍະຈະມາເຖິງ. ເພື່ອປະຕິບັດມະຕິກອງປະຊຸມໃຫຍ່ຂອງພັກໄດ້ຢ່າງມີໄຊ, ທ່ານນາຍົກລັດຖະມົນຕີ ຊີ້ແຈ້ງວ່າ ຕ້ອງມີຄວາມມານະພະຍາຍາມຂອງທົ່ວພັກ, ທົ່ວປວງຊົນ, ທົ່ວກອງທັບ ໃນນັ້ນ ມີບົດບາດຂອງກຳລັງສື່ມວນຊົນປະຕິວັດຂອງທົ່ວປະເທດເວົ້າລວມ ແລະ ໜັງສືພິມ ເຍິນເຢິນ ເວົ້າສະເພາະ. ສະນັ້ນ, ທ່ານສະເໜີໃຫ້ໜັງສືພິມ ເຍິນເຢິນ ສຸມໃສ່ການເຜີຍແຜ່ໂຄສະນາການປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງ ພັກ ຢ່າງເລິກເຊິ່ງກວ້າງຂວາງ.  ພ້ອມທັງປາດຖະໜາວ່າ, ກຳລັງນັກຂ່າວ ໜັງສືພິມ ເຍິນເຢິນ ຈະເສີມຂະຫຍາຍມູນເຊື້ອຂອງສື່ມວນຊົນປະຕິວັດ ຫວຽດນາມ ໃນ 95 ປີຜ່ານມາ, ມູນເຊື້ອຂອງໜັງສືພິມເຍິນເຢິນ ໃນ 70 ປີຜ່ານມາ ແລະ ອອກເຫື່ອເທແຮງຝຶກຝົນຫຼໍ່ຫຼອມຄຸນນະທາດ, ຈັນຍາບັນວິຊາສະເພາະ, ຄຸນສົມບັດ, ປະດິດຄິດສ້າງ, ອັບເດດວິທີເຮັດຂ່າວແບບທັນສະໄໝ ເພື່ອໃຫ້ໜັງສືພິມ ເຍິນເຢິນ ຍາມໃດກໍສົມເປັນຄັນທຸງປະຕິວັດ, ແນວຄິດຂອງພັກ ໃນແນວຮົບສື່ມວນຊົນຂອງປະເທດ ຫວຽດນາມ.