ໜັງສືພິມລາວໃຫ້ຂ່າວກ່ຽວກັບການຢ້ຽມຢາມອາເມລິກາຂອງທ່ານເລຂາທິການໃຫຍ່ຫງວຽນຟຸ໋ຈ້ອງ
(vovworld) – ວັນທີ 9/7, ບັນດາໜັງສືພິມໃຫຍ່ຂອງລາວ ໄດ້ໃຫ້ຫຼາຍຂ່າວ, ບົດກ່ຽວກັບການຢ້ຽມຢາມເອເມລິກາ ຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸ໋ຈ້ອງ. ໜັງສືພິມປະຊາຊົນ, ກະບອກສຽງຂອງພັກປະຊາຊົນປະຕິວັດລາວ, ໃຫ້ຂ່າວໃນວັນທີ 07/07 ວ່າ: ໃນການຢ້ຽມຢາມອາເມລິກາ ຢ່າງເປັນທາງການຂອງທ່ານເລຂາທິການໃຫຍ່ ຫງວຽໜຟຸ໋ຈ້ອງ ຄັ້ງນີ້, ຫວຽດນາມ ແລະ ອາເມລິກາ ໄດ້ເຊັນເອກະສານຮ່ວມມື 4 ສະບັບໃນບັນດາຂົງເຂດ: ການເງິນ, ການບິນພົນລະເຮືອນ, ພາສີອາກອນ ແລະ ການຮ່ວມມືຮັກສາສັນຕິພາບສະຫະປະຊາຊາດ. ແລະກໍໃນວັນດຽວກັນ, ໜັງສືພິມວຽງຈັນໃໝ່, ກະບອກສຽງຂອງອຳນາດການປົກຄອງ ແລະ ປະຊາຊົນນະຄອນຫຼວງວຽງຈັນ, ໄດ້ມີບົດຂຽນດ້ວຍຫົວຂໍ້ວ່າ: “ຫວຽດນາມ ແລະ ອາເມລິກາ ໄດ້ລົງນາມໃນຂໍ້ຕົກລົງຮ່ວມມືຫຼາຍສະບັບ” ປະກາດເລື່ອງການນຳ ຫວຽດນາມ ແລະ ອາເມລິກາ ເຫັນດີເປັນເອກະສັນສ້າງຕັ້ງການພົວພັນຮ່ວມມືຮອບດ້ານຢ່າງໝັ້ນຄົງ, ມີປະສິດທິຜົນ, ຕ່າງຝ່າຍຕ່າງມີຜົນປະໂຫຍດ. ໜັງສືພິມ KPL ຂອງສຳນັກຂ່າວສານລາວ ໄດ້ລົງພິມຖະແຫຼງການ ກ່ຽວກັບວິໄສທັດລວມໃນການພົວພັນ ຫວຽດນາມ-ອາເມລິກາ ແລະ ຢືນຢັນວ່າ ບັນດາໝາກຜົນໃນການພົວພັນ ຫວຽດນາມ-ອາເມລິກາ ແມ່ນຍ້ອນສອງຝ່າຍໄດ້ມີຄວາມມານະພະຍາຍາມທີ່ມີລັກສະນະສ້າງສັນ ເພື່ອຜ່ານຜ່າອະດີດຕະການ, ແກ້ໄຂສິ່ງທີ່ຍັງມີຄວາມແຕກຕ່າງກັນແລະ ຊຸກຍູ້ບັນດາຜົນປະໂຫຍດລວມ ເພື່ອມຸ່ງໄປສູ່ອະນາຄົດ.
ກ່ອນໜ້ານັ້ນ, ວັນທີ 08/7, ໜັງສືພິມເສດຖະກິດ-ສັງຄົມລາວ ໃຫ້ຂໍ້ສັງເກດວ່າ: ປີ 2015 ແມ່ນປີທີ່ມີຄວາມໝາຍປະຫວັດສາດໃນການເພີ່ມທະວີສາຍພົວພັນ ຫວຽດນາມ-ອາເມລິກາ. ແລະກໍໃນວັນດຽວກັນ, ໜັງສືພິມລາວພັດທະນາຖືວ່າ: ການຢ້ຽມຢາມອາເມລິກາ ຄັ້ງນີ້ຂອງທ່ານເລຂາທິການໃຫຍ່ ຫງວຽນຟຸຈ້ອງ ຈະປະກອບສ່ວນເພີ່ມທະວີຄວາມເຂົ້າອົກເຂົ້າໃຈ, ຄວາມໄວ້ເນື້ອເຊື່ອໃຈ ລະຫວ່າງ 2 ປະເທດ ເພື່ອຍົກສູງການພົວພັນ ຫວຽດນາມ-ອາເມລິກາ ຂຶ້ນສູ່ລະດັບສູງໃໝ່. ໃນຂະນະນັ້ນ, ໜັງສືພິມປະເທດລາວ ຢືນຢັນວ່າ: ການຢ້ຽມຢາມປະຫວັດສາດນີ້ສະແດງໃຫ້ເຫັນການພົວພັນ ລະຫວ່າງ ຫວຽດນາມ-ອາເມລິກາ ພວມນັບມື້ນັບເລິກເຊິ່ງກວ່າ ແລະ ອາເມລິກາ ມີບົດບາດສຳຄັນສຳລັບ ຫວຽດນາມ ໃນພາກພື້ນ ອາຊີ-ປາຊີຟິກ.