ໜູນຊ່ວຍຊາວປະມົງຫາສິນທະເລໄກຝັ່ງ
ພາບປະກອບ
(vovworld) – ວັນທີ 22/12, ຢູ່ ແຂວງ ຟູ໋ອຽນ, ຄະນະປະຈຳສະພາແຫ່ງຊາດ ສົມທົບກັບກະຊວງກະສິກຳ ແລະ ພັດທະນາຊົນນະບົດ, ໜັງສືພິມ ໄຊງ່ອນຢ໊າຍຟ໋ອງ (ໄຊງ່ອນປົດປ່ອຍ) ແລະ ຄະນະພັກແຂວງ ຟູ໋ອຽນ ຈັດຕັ້ງກອງປະຊຸມສຳມະນາ “ບັນດາມາດຕະການໜູນຊ່ວຍຊາວປະມົງພັດທະນາເສດຖະກິດທະເລ”. ຮອດເດືອນ 10/2013, ໃນທົ່ວປະເທດມີກຳປັ່ນຫາປາ 117.000 ລຳ. ເພື່ອຜັນຂະຫຍາຍບັນດາມະຕິຂອງພັກກອມມູນິດ ຫວຽດນາມກ່ຽວກັບເສດຖະກິດທະເລ ແລະ ຍຸດທະສາດທະເລ ຫວຽດນາມ ຮອດປີ 2020, ພື້ນຖານໂຄງລ່າງຫຼາຍແຫ່ງ ທີ່ຮັບໃຊ້ໃຫ້ອາຊີບປະມົງ ໄດ້ຮັບການລົງທຶນນັບແຕ່ແຂວງ ກວາງນິງ ຕະຫຼອດຮອດແຂວງ ກາເມົາ. ອົງການທີ່ກ່ຽວຂ້ອງ ໄດ້ໜູນຊ່ວຍຊາວປະມົງຕໍ່ກຳປັ່ນລຳໃໝ່ 1.400 ລຳທີ່ມີປະສິດທິພາບ 90 CV ຂຶ້ນໄປ ດ້ວຍຍອດຈຳນວນເງິນປະມານ 1.300 ຕື້ດົ່ງ. ແຕ່ເຖິງຢ່າງໃດກໍ່ຕາມ, ຍານພາຫະນະຫາສິນທະເລໄກຝັ່ງຍັງຂາດເຂີນຫຼາຍ. ເພື່ອແກ້ໄຂສິ່ງດັ່ງກ່າວ, ທ່ານຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວູວັນຕ໋າມ, ຖືວ່າ:
“”ກ່ຽວກັບມາດຕະການສິນເຊື່ອໃຫ້ຊາວປະມົງ, ກະຊວງກະສິກຳ ແລະ ພັດທະນາຊົນນະບົດ ພວມຕັ້ງໜ້າພ້ອມກັບທະນາຄານເພື່ອຍື່ນສະເໜີຕໍ່ລັດຖະບານ ລາຍການພິເສດສະເພາະໃຫ້ແກ່ຊາວປະມົງ, ຈາກນັ້ນມີນະໂຍບາຍເພື່ອຫັນກຳປັ່ນຫາສິນທະເລໄກຝັ່ງເປັນທັນສະໄໝໃນໄລຍະຈະມາເຖິງ”
ສະຫລຸບກອງປະຊຸມສຳມະນາ, ທ່ານຫົວໜ້າຄະນະເສດຖະກິດຂອງສະພາແຫ່ງຊາດ ຫງວຽນວັນເຢົ່າ ຖືວ່າ: ຄວນຍົກສູງວຽກງານຄຸ້ມຄອງລັດກ່ຽວກັບເສດຖະກິດທະເລ. ໂດຍລະອຽດແມ່ນມາດຕະການຕ້ອງມີນະໂຍບາຍຊາວປະມົງ, ອາຊີບຫາປາ, ບໍລິເວນຫາປາ, ນະໂຍບາຍຮັບປະກັນຊີວິດສັງຄົມ, ໜູນຊ່ວຍການລົງທຶນຍົກລະດັບກຳປັ່ນ.