ໝູ່ບ້ານເຄື່ອງປັ້ນດິນເຜົາເຄືອບ ບາດຈາງ ນຳໃຊ້ເຕັກໂນໂລຢີ ປະຢັດພະລັງງານໃໝ່
ການຍົກສູງຄວາມສາມາດແກ່ງແຍ້ງໃນໄລຍະເຊື່ອມໂຍງເຂົ້າກັບເສດຖະກິດ ສາ ກົນ ແມ່ນສິ່ງທ້າທາຍສຳລັບບັນດາວິສາຫະກິດຂະໜາດກາງ ແລະ ນ້ອຍ, ໃນນັ້ນມີບັນດາວິສາຫະກິດຜະລິດເຄື່ອງປັ້ນດິນເຜົາ. ຊຸມປີມໍ່ໆມານີ້, ໝູ່ບ້ານເຄື່ອງປັ້ນດິນເຜົາ ບາດຈາງໄດ້ຫັນປ່ຽນ ແລະ ນຳໃຊ້ເຕັກໂນໂລຢີເຕົາເຜົາໃຊ້ແກັດ, ອັນໄດ້ຊ່ວຍປະຢັດພະລັງງານ, ເພີ່ມສະມັດຕະພາບ, ຍົກສູງຄຸນນະພາບ, ຫຼຸດຜ່ອນລາຄ່າ ຜະລິດຕະພັນ ແລະ ຫຼຸດຜ່ອນມົນລະຜິດສິ່ງແວດລ້ອມ
ຖ້າມີໂອກາດມາຢ້ຽມຢາມ ໝູ່ບ້ານເຄື່ອງປັ້ນດິນເຜົາ ບາດຈາງ ທີ່ເມືອງ ຢາເລີມ ຮ່າໂນ້ຍ, ແຂກທ່ອງທ່ຽວຈະໄດ້ເຫັນ ບັນຍາກາດທີ່ສະຫງົບງຽບດ້ວຍອາກາດປອດໂປ່ງຢູ່ທຸກຫົນແຫ່ງ. ຕາມບັນດາຜູ້ເຖົ້າຜູ້ແກ່ໃນໝູ່ບ້ານແລ້ວ, ກ່ອນນີ້ ໝູ່ບ້ານອາຊີບ ບາດຈ່າງຖືກມົນລະຜິດຢ່າງໜັກ ຍ້ອນກິ່ນຖ່ານຈາກເຕົາເຜົານັບຮ້ອຍແຫ່ງກຸ້ມໄປທົ່ວ. ອັດຕາຄົນເຈັບຕິດພະຍາດກ່ຽວກັບລະບົບຫາຍໃຈ ແລະ ຕາແມ່ນສູງທີ່ສຸດ. ມາຮອດປະຈຸບັນ, ໂດຍໄດ້ຮັບການໜູນຊ່ວຍໃຫ້ກູ້ຢືມທຶນ ຈາກໂຄງການປັບປຸງເຕົາເຜົາ ໃຊ້ແກັດ ໂດຍປະຢັດພະລັງງານ ຂອງກອງທຶນສິ່ງແວດລ້ອມທົ່ວໂລກ ທີ່ຂຶ້ນກັບອົງການ ສປຊ ເພື່ອການພັດທະນານັ້ນ, ປະຊາຊົນໃນໝູ່ບ້ານ ໄດ້ປ່ຽນແປງຈິນຕະນາການໃນການຜະລິດ, ຫັນມານຳໃຊ້ເຕັກໂນໂລຢີໃໝ່. ສິ່ງນີ້ ໄດ້ເຮັດໃຫ້ ໂສມໜ້າຂອງ ໝູ່ບ້ານເຄື່ອງປັ້ນດິນເຜົາ ບາດຈາງ ປ່ຽນແປງໄປ, ຊີວິດການເປັນຢູ່ຂອງ ປະຊາຊົນຖືກຍົກສູງຂຶ້ນ, ພິເສດ ຂະແໜງທ່ອງທ່ຽວຂອງໝູ່ບ້ານໄດ້ພັດທະນາແບບຍື່ນຍົງ. ອ້າຍ ຫງວຽນວັນເຫີບ ເຈົ້າຂອງຮາກຖານຜະລິດ ເຫີບໝຸ່ຍ ໃຫ້ຮູ້ວ່າ : “ ກ່ອນນີ້, ເມື່ອຍັງນຳໃຊ້ເຕັກໂນໂລຢີເກົ່າ ຄື ເຕົາເຜົາໃຊ້ຖ່ານຫີນນັ້ນ ໄດ້ກໍ່ມົນລະຜິດສິ່ງແວດລ້ອມຫຼາຍ, ສິນຄ້າບໍ່ໄດ້ຮັບປະກັນ. ນັບແຕ່ມື້ຂ້າພະເຈົ້າຫັນມານຳໃຊ້ ເຕັກໂນໂລຢີໃໝ່ນີ້ ກໍ່ມີຫຼາຍຈຸດດີຄື ອາກາດຖືກຮັກສາປອດໂປ່ງ, ເຮືອນຊານມີຄວາມສະອາດ, ສິນຄ້າກໍ່ໄດ້ຮັບການຮັບປະກັນ, ສ່ວນລາຍຮັບ ກໍ່ໄດ້ຮັບການປົວແປງໃຫ້ດີຂຶ້ນ ”. ການທີ່ບັນດາຮາກຖານຜະລິດເຄື່ອງປັ້ນດິນເຜົາ ບາດຈາງ ກ້າຫານຫັນມາຜະລິດຜະລິດຕະພັນດ້ວຍການນຳໃຊ້ເຕົາເຜົາໂດຍໃຊ້ແກັດດ້ວຍເຕັກໂນໂລຢີປະຢັດພະລັງ ງານກໍ່ແມ່ນຜົນສຳເລັດຢ່າງໃຫຍ່ຫຼວງ ຂອງບໍລິສັດຫຸ້ນສ່ວນ ອອກແບບ ແລະ ຜະລິດ ເຄື່ອງປັ້ນດິນເຜົາ ບາດຈາງ. ປີ 2006 ບໍລິສັດໄດ້ອອກແບບຫ້ອງອົບຜະລິດຕະພັນເຄິ່ງສຳເລັດຮູບ ອັດຕະໂນມັດໂດຍໃຊ້ຄວາມຮ້ອນຂອງຄວັນຈາກເຕົາເຜົາ ອັນໄດ້ຫຼຸດຜ່ອນຄ່າໃຊ້ຈາຍໃນການໃຊ້ພະລັງງານລົງ. ເມື່ອນຳໃຊ້ເຕັກໂນໂລຢີນີ້ໃນການຜະລິດເຄື່ອງປັ້ນດິນເຜົາ, ບັນດາວິສາຫະກິດສາມາດຫຼຸດຜ່ອນທາດເສດເຫຼືອ ທີ່ກໍ່ມົນລະຜິດສິ່ງແວດລ້ອມລົງ 10 ເທົ່າເມື່ອທຽບໃສ່ການນຳໃຊ້ເຕັກໂນໂລຢີເກົ່າ, ອັນໄດ້ປະກອບສ່ວນຢ່າງຕັ້ງໜ້າເຂົ້າໃນການປົກປັກຮັກສາສິ່ງແວດລ້ອມ. ພ້ອມກັນນັ້ນ, ກໍ່ຍັງໃຫ້ອັດຕາຜະລິດຕະພັນສູງ, ຫຼຸດຜ່ອນເວລາທຳການຜະລິດລົງ ແລະ ຍົກສູງຄຸນນະພາບຜະລິດຕະພັນອີກດ້ວຍ. ທ່ານ ເລດຶກຈ້ອງ ຜູ້ອຳນວຍການ ບໍລິສັດຫຸ້ນສ່ວນ ອອກແບບ ແລະ ຜະລິດ ເຄື່ອງປັ້ນດິນເຜົາ ບາດຈາງ ໃຫ້ຮູ້ວ່າ : “ ໃນສົກປີ 2011-2012 ພວກຂ້າພະເຈົ້າໄດ້ອອກແບບເຕົາເຜົາປະຢັດພະລັງງານ ທຳອິດ ດ້ວຍການໃຊ້ເຊື້ອໄຟຫຼຸດລົງແຕ່ 35 ຫາ 40% ເມື່ອທຽບໃສ່ເຕັກໂນໂລຢີນຳເຂົ້າຈາກຕ່າງປະເທດ. ເວລາເຜົາກໍ່ຫຼຸດລົງແຕ່ 20 ຫາ 25%. ຜະລິດຕະພັນໄດ້ເພີ່ມຂຶ້ນຈາກ 70% ຂຶ້ນເປັນ 98%. ຍ້ອນເຫດນີ້, ໄດ້ນຳມາຊຶ່ງໝາກຜົນອັນໃຫ່ຍຫຼວງ ”
ຕາມທ່ານຫງວຽນບ້າວິງຜູ້ອຳນວຍການບໍລິຫານໂຄງການຍົກສູງປະສິດທິຜົນການນຳໃຊ້ພະລັງງານໃນບັນວິສາຫະກິດຂະໜາດກາງ ແລະ ນ້ອຍແລ້ວ, ນັບແຕ່ເຂົ້າຮ່ວມໂຄງການ, ຈຳນວນຄອບຄົວນຳໃຊ້ເຕັກໂນໂລຢີປະຢັດພະລັງງານ ໃນໝູ່ບ້ານ ບາດຈ່າງໄດ້ເພີ່ມຂຶ້ນຫຼາຍພໍສົມຄວນ. ຈາກບ່ອນທີ່ມີພຽງຮາກຖານ 1 ແຫ່ງນຳໃຊ້ ເຕົາເຜົາໃຊ້ແກັດໃນປີ 2007ເທົ່ານັ້ນ, ມາຮອດປະຈຸບັນ ໄດ້ມີຮາກຖານ 131 ແຫ່ງນຳໃຊ້ ເຕົາເຜົາໃຊ້ແກັດແລ້ວ, ອັນໄດ້ເປັນການທົດແທນເຕົາເຜົາໃຊ້ທ່ານຫີນແລະເຕົາເຜົາໃຊ້ແກັດລຸ່ນເກົ່າ. ທ່ານວິງ ຍັງຢືນຢັນວ່າ ການນຳໃຊ້ເຕັກໂນໂລຢີໃໝ່ ໄດ້ເພີ່ມອັດຕາຜະລິດຕະພັນ ບັນລຸແຕ່ 95 ຫາ 98% ເມື່ອທຽບໃສ່ ການນຳໃຊ້ເຕັກໂນໂລຢີເກົ່າ, ສ່ວນລາຍໄດ້ກໍ່ເພີ່ມຂຶ້ນທົບ 2-3 ເທົ່າ ແລະ ຊາວຜູ້ອອກແຮງງານກໍ່ບໍ່ສຳພັດກັບອາຍຜິດ, ອຸນຫະພູມສູງອີກແລ້ວ. ທ່ານເວົ້າວ່າ : “ ເລື່ອງໝູ່ບ້ານ ບາດຈາງ ຫັນປ່ຽນຈາກເຕັກໂນໂລຢີເຕົາເຜົາໃຊ້ຖ່ານຫີນມາ ນຳໃຊ້ເຕົາເຜົາໃຊ້ແກັດ ແມ່ນເຫື່ອແຮງຂອງທັງໝູ່ບ້ານ, ພວກຂ້າພະເຈົ້າກໍ່ໄດ້ປະກອບສ່ວນຢ່າງຕັ້ງໜ້າ, ໂດຍໄດ້ແນະນຳ ກອງທຶນປົກປັກຮັກສາສິ່ງແວດລ້ອມຫວຽດນາມມາຊວ່ຍເຫຼືອ ໃຫ້ກູ້ຢືມທຶນດ້ວຍຄ່າດອກເບັ້ຍຕ່ຳ. ພ້ອມກັນນັ້ນ ກໍ່ສົມທົບກັບສະຫະສະມາຄົມ ເຄື່ອງປັ້ນດິນເຜົາ ບາດຈາງ ຈັດບັນດາຊຸດອົບຮົມ ໂຄສະນາໃຫ້ພໍ່ແມ່ປະຊາຊົນເພື່ອມີຄວາມຮັບຮູ້ ”
ອາດຈະເຫັນໄດ້ວ່າ ການຜະລິດເຄື່ອງປັ້ນດິນເຜົາເຄືອບຢູ່ບາງທ້ອງຖິ່ນໃນປະເທດຫວຽດນາມໄດ້ຮັບການຍູ້ແຮງ ແມ່ນຍ້ອນບັນດາວິສາຫະກິດມີຄວາມກ້າຫານ ແລະເປັນເຈົ້າການນຳໃຊ້ເຕັກໂນໂລຢີໃໝ່. ການນຳໃຊ້ເຕັກໂນໂລຢີໃໝ່ນີ້ ຍັງເປັນການຢັ້ງຢືນຄວາມຕັດສິນໃຈ ຂອງບັນດາວິສາກະກິດ ເຄື່ອງປັ້ນດິນເຜົາຫວຍດນາມໃນການຍົກສູງຄວາມສາມາດເພື່ອເປັນເຈົ້າການເຊື່ອມໂຍງເຂົ້າກັບສາກົນ.