ເພື່ອແນໃສ່ຍົກສູງທາງດ້ານສຸຂະພາບຮ່າງກາຍ, ພູມປັນຍາໃຫ້ແກ່ເດັກອະນຸບານ, ແຂວງບັກນິງໄດ້ລົງທຶນເກືອບ 180 ຕື້ດົງໃຫ້ແກ່ໂຄງການນ້ຳນົມໃນໂຮງຮຽນ. ພາຍຫຼັງຜັນຂະຫຍາຍເປັນເວລາ 3 ປີ, ໂຄງການນ້ຳນົມໃນໂຮງຮຽນໄດ້ປະກອບສ່ວນຍົກສູງສຸຂະພາບຮ່າງກາຍໃຫ້ແກ່ເດັກ, ສາມາດຫຼຸດອັດຕາການຂາດສານອາຫານ, ຮ່າງກາຍເຕ້ຍ, ຈ່ອຍຜອມ ແລະ ນ້ຳໜັກຕ່ຳໃນໄວເດັກ.
ພວກນັກຮຽນອະນຸບານໄດ້ກິນນ້ຳນົມໃນໂຮງຮຽນ |
ໂຄງການນ້ຳນົມໃນໂຮງຮຽນຢູ່ແຂວງບັກນິງໄດ້ຮັບການຜັນຂະຫຍາຍນັບແຕ່ເດືອນກັນຍາປີ 2013 ຢູ່ໂຮງຮຽນອະນຸບານ 24 ແຫ່ງໃນບໍລິເວນແຂວງ. ພາຍຫຼັງຜັນຂະຫຍາຍທົດລອງມາເປັນເວລາ 1 ປີ, ໄດ້ນຳມາເຊິ່ງປະສິດທິຜົນຫຼາຍຢ່າງ. ໃນສົກຮຽນ 2014-2015, ທາງແຂວງໄດ້ຜົນຂະຫຍາຍສູ່ໂຮງຮຽນອະນຸບານທຸກແຫ່ງໃນທົ່ວແຂວງ. ເອື້ອຍຄູ ໂງທິທູເຮືອງ ຮອງຫົວໜ້າອຳນວຍການໂຮງຮຽນອະນຸບານ ຊາວມາຍ ນະຄອນບັກນິງ ໃຫ້ຮູ້ວ່າ :
“ ສົກຮຽນ 2016-2017 ແມ່ນສົກຮຽນທີ 3 ເຊິ່ງ ໂຮງຮຽນອະນຸບານ ຊາວມາຍໄດ້ເຂົ້າສູ່ການເຄຶ່ອນໄຫວ ແລະ ກໍແມ່ນປີທີ 3 ທີ່ໂຮງຮຽນໄດ້ຮັບຜົນປະໂຫຍດຈາກໂຄງການນ້ຳນົມໃນໂຮງຮຽນ. ນັບແຕ່ເມື່ອ ໂຄງການນ້ຳນົມໃນໂຮງຮຽນໄດ້ຜັນຂະຫຍາຍນັ້ນ, ກໍໄດ້ຮັບການສະໜັບສະໜູນຈາກພໍ່ແມ່ນັກຮຽນຢ່າງສຸດໃຈ. ພວກເດັກໄດ້ກິນນ້ຳນົມ ກໍສາມາດພັດທະນາຢ່າງຮອບດ້ານກ່ວາເກົ່ານັບທັງສຸຂະພາບຮ່າງກາຍກໍຄືສະຕິປັນຍາ ແລະ ພວກເດັກໄດ້ຂະຫຍາຍລວງສູງຂອງຕົນຢ່າງຮອບດ້ານ ”
ພ້ອມກັບໂຮງຮຽນອະນຸບານ ຊາວມາຍ, ໂຮງຮຽນອະນຸບານ ແທງເຄືອງ, ເມືອງຖ້ວນແທ່ງ ກໍແມ່ນໜຶ່ງໃນບັນດາໂຮງຮຽນໄດ້ຜັນຂະຫຍາຍ ໂຄງການນ້ຳນົມໃນໂຮງຮຽນເປັນຊຸດທຳອິດ. ຍ້ອນວ່ານີ້ແມ່ນການເຄື່ອນໄຫວທີ່ມີລັກສະນະວັດທະນະທຳມະນຸດຢ່າງເລິກເຊິ່ງ, ປະກອບສ່ວນບໍ່ໜ້ອຍເຂົ້າໃນການຍົກສູງສຸຂະພາບຮ່າງກາຍຂອງເດັກ, ດັ່ງນັ້ນກໍໄດ້ຮັບການສະໜັບສະໜູນຈາກພໍ່ແມ່ນັກຮຽນທັງຫຼາຍ. ເອື້ອຍຄູ ກາວທິແຮ່ ຫົວໜ້າອຳນວຍການໂຮງຮຽນອະນຸບານ ແທງເຄືອງ, ເມືອງຖ້ວນແທ່ງໃຫ້ຮູ້ວ່າ :
“ ເມື່ອໂຄງການນ້ຳນົມໃນໂຮງຮຽນໄດ້ຮັບການປະຕິບັດ, ພວກຫຼານນັກຮຽນກໍດີໃຈຫຼາຍ. ໂຄງການນີ້ແມ່ນມີຄວາມໝາຍທີ່ສຸດ, ຊຶ່ງສາມາດປົວແປງລວງສູງຂອງເດັກ. ພໍ່ແມ່ນັກຮຽນ ປະກອບສ່ວນໜ້ອຍໜຶ່ງ ພຽງ 25% ເທົ່ານັ້ນ, ແຕ່ພວກເດັກນັກຮຽນອາທິດໜຶ່ງໄດ້ດື່ມນ້ຳນົມ 3 ຄາບ, ສິ່ງນີ້ໄດ້ພາໃຫ້ພໍ່ແມ່ນັກຮຽນມີຄວາມເຊື່ອໝັ້ນ ແລະສະໜັບສະໜູນໂຄງການນີ້. ”
ລຸງ ຫງວຽນຢາງລອງ ຢູ່ແຂວງບັກນິງ ເປັນພໍ່ຂອງນັກຮຽນ ຖືວ່າ : ໂຄງການນ້ຳນົມໃນໂຮງຮຽນແມ່ນໂຄງການທີ່ມີລັກສະນະວັດທະນະທຳມະນຸດ, ມີປະສິດທິຜົນສູງໃນການປົວແປງສະພາບໂພສະນາການ ແລະ ສານອາຫານໃຫ້ແກ່ເດັກ. ລຸງ ຫງວຽນຢາງລອງ ເວົ້າວ່າ :
“ ພວກຂ້າພະເຈົ້າແມ່ນພໍ່ແມ່ນັກຮຽນ ຕ່າງກໍຄິດວ່າ ໂຄງການນ້ຳນົມໃນໂຮງຮຽນແມ່ນດີຫຼາຍ. ພວກຫຼານນັກຮຽນໄປໂຮງຮຽນ ໄດ້ກິນນ້ຳນົມເຊັ່ນນີ້ແມ່ນດີທີ່ສຸດ. ຢູ່ບັນດາປະເທດເອີລົບ, ເຂົາເຈົ້າກໍໃຫ້ນັກຮຽນກິນນ້ຳນົມເພື່ອຍົກສູງສຸຂະພາບຮ່າງກາຍ. ພວກຂ້າພະເຈົ້າມີຄວາມອຸ່ນອຽນໃຈທີ່ສຸດເມື່ອເຫັນລູກເຕົ້າໄດ້ຮັບຄວາມເອົາໃຈໃສ່ທີ່ສຸດ ”
ເພື່ອຕອບສະໜອງຄວາມມຸ່ງມາດປາດຖະໜາຂອງນັກຮຽນ ແລະ ພໍ່ແມ່ນັກຮຽນໃນບໍລິເວນແຂວງ, ປະຈຸບັນ, ຂະແໜງສຶກສາ ແລະ ກໍ່ສ້າງແຂວງບັກນິງສືບຕໍ່ຜັນຂະຫຍາຍ ໂຄງການນ້ຳນົມໃນໂຮງຮຽນຢູ່ບັນດາໂຮງຮຽນອະນຸບານ ແລະ ເປີດກ້ວາງເປົ້າໝາຍໄດ້ຮັບຜົນປະໂຫຍດຈາກໂຄງການໃຫ້ແກ່ບັນດານັກຮຽນຊັ້ນປະຖົມໃນບໍລິເວນແຂວງ. ທ່ານຈິ້ງໂຄ, ຮອງຫົວໜ້າພະແນກສຶກສາ ແລະ ກໍ່ສ້າງແຂວງບັກນິງໃຫ້ຮູ້ວ່າ :
“ ໃນສົກຮຽນ 2016-2017, ມີນັກຮຽນຊັ້ນອະນຸບານຈຳນວນກວ່າ 86.000 ຄົນ. ຈຳນວນເດັກໄປໂຮງຮຽນແມ່ນນັບມື້ນັບຫຼາຍຂື້ນ ຊຶ່ງສະແດງໃຫ້ເຫັນປະສິດທິຜົນໃນວຽກງານສຶກສາ, ສົ່ງເສີມເດັກໄປໂຮງຮຽນຖືກກັບເກັ່ນອາຍຸຫຼາຍຂຶ້ນ. ເມື່ອນຳໃຊ້ໂຄງການນ້ຳນົມໃນໂຮງຮຽນຢ່າງມີປະສິດທິຜົນນັ້ນ, ຈຳນວນເດັກຂາດສານອາຫານ ໄດ້ຫຼຸດຜ່ອນຄິດສະເລ່ຍແຕ່ 2,1% ຫາ 2,5% ໃນແຕ່ລະປີ, ຈຳນວນເດັກຈ່ອຍຜອມໄດ້ຫຼຸດແຕ່ 1,2 ຫາ 1,65% ໃນແຕ່ລະປີ. ພວກຂ້າພະເຈົ້າເປັນເສນາທິການໃຫ້ແກ່ແຂວງສືບຕໍ່ຜັນຂະຫຍາຍໂຄງການນ້ຳນົມໃນໂຮງຮຽນຢູ່ຕາມໂຮງຮຽນອະນຸບານ ແລະ ໂຮງຮຽນປະຖົມ ”
ຄວາມຈິງຢູ່ແຂວງບັກນິງໄດ້ສະແດງໃຫ້ເຫັນວ່າ ການປະຕິບັດໂຄງການນ້ຳນົມໃນໂຮງຮຽນຢ່າງມີປະສິດທິຜົນ ໄດ້ປະກອບສ່ວນຍົກສູງສຸຂະພາບຮ່າງກາຍ, ສະຕິປັນຍາໃຫ້ແກ່ພວກນັກຮຽນ, ພ້ອມກັນນັ້ນ ກໍຍົກສູງຄຸນນະພາບການສຶກສາຢູ່ຕາມໂຮງຮຽນ.