(vovworld)- ຍັງເຫລືອພຽງອີກກວ່າ 1 ປີ ແມ່ນກຳນົດເວລາສຸດທ້າຍໃຫ້ແກ່ການສ້າງປະຊາຄົມລວມ ອາຊຽນ. ໃນວິວັດທະນາການມຸ່ງໄປເຖິງການສ້າງປະຊາຄົມລວມ ອາຊຽນ, ປະຊາຄົມເສດຖະກິດ ອາຊຽນ ແມ່ນເສົາຄ້ຳຕົ້ນຕໍ,ບໍ່ອາດຕັດແຍກອອກຈາກວິວັດການພັດທະນາເສດຖະກິດທົ່ວໂລກໄດ້. ສະນັ້ນ ປະຈຸບັນ ອາຊຽນ ພວມປັບປຸງ ແລະ ຊຸກຍູ້ການເຊື່ອມຈອດແບບຍືນຍົງລະຫວ່າງວິສາຫະກິດບັນດາປະເທດພາຍໃນກຸ່ມ, ໃນນັ້ນ ມີບັນດານັກທຸລະກິດຍິງ. ນັ້ນກໍແມ່ນຈຸດໝາຍຂອງເຄືອຂ່າຍນັກທຸລະກິດຍິງ ອາຊຽນ(AWEN) ທີ່ຫາກໍ່ຖືກສະເຫນີຕົວໃນວັນທີ 22/4 ຜ່ານມາ.
ກອງປະຊຸມສ້າງ AWEN
|
AWEN ແມ່ນເຄືອຂ່າຍຂອງບັນດາແມ່ຍິງເປັນເຈົ້າຂອງວິສາຫະກິດໃນພາກພື້ນ, ການເຄື່ອນໄຫວນີ້ດ້ວຍຈຸດປະສົງເພີ່ມທະວີການພົບປະແລກປ່ຽນ, ແບ່ງປັນບົດຮຽນ, ສ້າງ ແລະ ສະເຫນີບັນດາຂໍ້ລິເລີ່ມ ເພື່ອປະກອບສ່ວນຊຸກຍູ້ບັນດາການເຄື່ອນໄຫວເສດຖະກິດ ແລະ ການຄ້າ ມຸ່ງໄປເຖິງຄວາມສະເໝີພາບລະຫວ່ງຍິງຊາຍ, ເພີ່ມທະວີສິດ ແລະ ຄວາມຊຳນານງານໃນການດຳເນີນທຸລະກິດໃຫ້ແກ່ແມ່ຍິງໃນວົງຄະນາຍາດ, ສ້າງສະພາບແວດລ້ອມແຫ່ງການດຳເນີນທຸລະກິດຢ່າງສະດວກໃຫ້ແກ່ບັນດາວິສາຫະກິດ ໂດຍແມ່ຍິງເປັນເຈົ້າຂອງ, ຍົກສູງຄວາມຮັບຮູ້ ແລະ ການສະຫນັບສະຫນູນຂອງບັນດາຝ່າຍ ສຳລັບບັນຫາແມ່ຍິງດຳເນີນທຸລະກິດໃນພາກພື້ນ. ສິ່ງດັ່ງກ່າວ ໂດຍແມ່ນທ່ານນາງ Alicia dela Rosa Bala, ຮອງເລຂາທິການໃຫຍ່ ອາຊຽນ, ຮັບຜິດຊອບປະຊາຄົມວັດທະນະທຳ-ສັງຄົມ ເນັ້ນຫນັກຕໍ່ຫນ້າບັນດາຜູ້ແທນເຂົ້າຮ່ວມພິທີສ້າງຕັ້ງ AWEN.
“ເລື່ອງສ້າງຕັ້ງເຄືອຂ່າຍນັກທຸລະກິດຍິງ ເປັນຂີດໝາຍຂໍ້ລິເລີ່ມຮ່ວມໃນອາຊຽນ ເພື່ອຍົກສູງທີ່ຕັ້ງບົດບາດຂອງແມ່ຍິງເປັນເຈົ້າຂອງວິສາຫະກິດໃນພາກພື້ນ, ຊຸກຍູ້ການສຳພັດກັບຕະຫລາດ ແລະ ສ້າງກາລະໂອກາດພັດທະນາໃຫ້ແກ່ບັນດານັກທຸລະກິດຍິງໃນພາກພື້ນ. ບັນດານັກທຸລະກິດຍິງ ທັງແມ່ນປັດໄຈສຳຄັນໃນການສ້າງປະຊາຄົມອາຊຽນ ໃນປີ 2015. ນອກນັ້ນ ເຂົາເຈົ້າ ຈະໄດ້ຮັບຜົນປະໂຫຍດຈາກຕະຫລາດເສດຖະກິດ ແລະ ບັນດາກາລະໂອກາດດຳເນີນທຸລະກິດໃນ ອາຊຽນ ”
ໂດຍມີທັດສະນະເຊັ່ນດຽວກັນກັບທ່ານນາງ Alicia, ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ທ່ານນາງຟ້າມທິຫາຍຈວ່ຽນ ໃຫ້ຮູ້ວ່າ: ເລ່ືອງສ້າງຕັ້ງ ເຄືອຂ່າຍ AWEN ແມ່ນການເຄື່ອນໄຫວຕາມຂໍ້ລິເລີ່ມຂອງ ຫວຽດນາມ. ຫວຽດນາມ ຈະປະຕິບັດບົດບາດເປັນປະເທດປະສານງານເປັນຢ່າງດີໃນອາຍຸການທຳອິດ, ຄຽງຄູ່ກັນນັ້ນ ຈະມານະພະຍາຍາມຊຸກຍູ້ການຮ່ວມມືລະຫວ່າງນັກທຸລະກິດຍິງ ແລະ ເພີ່ມທະວີການປົກປັກຮັກສາບັນດາສິດຂອງແມ່ຍິງຫວຽດນາມ ເວົ້າສະເພາະ ແລະ ແມ່ຍິງບັນດາປະເທດ ອາຊຽນ ເວົ້າລວມ.
“ໃນສະພາບເຊື່ອມໂຍງເຂົ້າກັບພາກພື້ນຢ່າງແຂງແຮງ ແລະ ກະກຽມສ້າງປະຊາຄົມລວມອາຊຽນ ໃນປີ 2015, ເລື່ອງສ້າງຕັ້ງ AWEN ຈະປະກອບສ່ວນບໍ່ແມ່ນຫນ້ອຍເຂົ້າໃນການຊຸກຍູ້ບັນດາການເຄື່ອນໄຫວດ້ານການຄ້າ ແລະ ເສດຖະກິດພາຍໃນກຸ່ມ ແລະ ບັນດາປະເທດນອກກຸ່ມ, ເພີ່ມທະວີຄວາມສະເຫມີພາບລະຫວ່າງຍິງຊາຍ ແລະ ມອບສິດໃຫ້ແກ່ແມ່ຍິງ ແລະ ປະກອບສ່ວນສ້າງພາກພື້ນ ອາຊຽນ ສັນຕິພາບ ແລະ ວັດທະນາຖາວອນ.”
ບັນດາຜູ້ແທນເຂົ້າຮ່ວມກອງປະຊຸມ
|
ດ້ວຍຖານະເປັນປະທານທຳອິດຂອງ AWEN, ທ່ານນາງ ຟ້າມທິຕວຽດມີງ, ປະທານສະພານັກທຸລະກິດຍິງ ຫວຽດນາມ-ສັງກັດຫ້ອງການການຄ້າ ແລະ ອຸດສາຫະກຳ ຫວຽດນາມ ໄດ້ວາງອອກບັນດາບຸລິມະສິດໄລຍະສັ້ນ ແລະ ຍາວ, ບັນດາລາຍການເຄື່ອນໄຫວລວມ ເພື່ອຮັບປະກັນໃຫ້ແກ່ປະສິດທິຜົນຂອງ AWEN ໃນອະນາຄົດ.
“ເຄືອຂ່າຍ AWEN ມຸ່ງໄປເຖິງການຊຸກຍູ້ບົດບາດ ແລະ ສຽງເວົ້າຂອງບັນດານັກທຸລະກິດຍິງ ອາຊຽນ, ສ້າງບັນດາກາລະໂອກາດພັດທະນາຂອງເຂົາເຈົ້າ. ນີ້ກໍແມ່ນເວທີປາໄສ ເພື່ອໃຫ້ບັນດານັກທຸລະກິດຍິງ ສາມາດແບ່ງປັນບັນດາຂໍ້ມູນຂ່າວສານ, ບົດຮຽນໃນການດຳເນີນທຸລະກິດ ຕົວຢ່າງຄື: ບັນຫາຮ່ວມມືດ້ານການຄ້າ, ທຶນຮອນ, ຫລື ບັນດາບໍລິການ marketting. ເວທີປາໄສນີ້ ຈະເພີ່ມທະວີຄວາມສາມາດຂອງນັກທຸລະກິດຍິງ, ພ້ອມທັງຫນູນຊ່ວຍ, ເຊື່ອມຕໍ່ບັນດານັກທຸລະກິດຍິງໃນພາກພື້ນ.”
ທ່ານນາງ Moudy Lintuuran, ເລຂາທິການໃຫຍ່ສະຫະສະມາຄົມນັກທຸລະກິດຍິງ ຂອງ ອິນໂດເນເຊຍ ຢືນຢັນວ່າ: ອິນໂດເນເຊຍ ຈະຍາດໄດ້ຜົນປະໂຫຍດຫລາຍຢ່າງຈາກການເຄື່ອນໄຫວຂອງ AWEN ໃນໄລຍະຈະມາເຖິງ. ທ່ານນາງ ໃຫ້ຮູ້ວ່າ: ປະຈຸບັນ ສະຫະສະມາຄົມ ມີສະມາຊິກ 30.000 ຄົນ, ໃນນັ້ນ ມີປະມານ 27% - 30% ແມ່ນວິສາຫະກິດສົ່ງອອກ. ສະນັ້ນ ເພື່ອຮັບປະກັນວິວັດການຮ່ວມມືກັບບັນດາວິສາຫະກິດຕ່າງປະເທດຢ່າງສະດວກ, ບັນດາອົງການຄື AWEN ມີລັກສະນະຕັດສິນຊີ້ຂາດ.
“ເຄືອຂ່າຍ AWEN ແມ່ນສຳຄັນທີ່ສຸດສຳລັບພວກຂ້າພະເຈົ້າ. AWEN ບໍ່ພຽງແຕ່ສາມາດສະຫນອງໃຫ້ພວກຂ້າພະເຈົ້າຂໍ້ມູນຂ່າວສານເທົ່ານັ້ນ ຫາກຍັງແມ່ນກຳລັງຫນູນໃຫ້ແກ່ບັນດານັກທຸລະກິດຍິງຢູ່ ອິນໂດເນເຊຍ ກຳໄດ້ສະພາບການນັກທຸລະກິດຍິງ ຢູ່ ບັນດາປະເທດອື່ນ ແລະ ເມື່ອກັບຄືນເມືອອິນໂດເນເຊຍ ຂ້າພະເຈົ້າຈະເຜີຍແຜ່ໃຫ້ເຂົາເຈົ້າກ່ຽວກັບບັນດາຂໍ້ມູນຂ່າວສານທີ່ເກັບກຳມາໄດ້ໃນບັນດາການປຶກສາຫາລືຈາກເຫດການນີ້.”
ເປັນທີ່ຈະແຈ້ງແລ້ວວ່າ, ເຄືອຂ່າຍ AWEN ຈະຕອບສະຫນອງບັນດາຄວາມຮຽກຮ້ອງຕ້ອງການກ່ຽວກັບຂໍ້ມູນຂ່າວສານສຳລັບນັກທຸລະກິດຍິງ ເມື່ອເຮັດວຽກກັບຄູ່ຮ່ວມມືພາຍໃນກຸ່ມ. ນີ້ກໍແມ່ນອົງການຮັບຜິດຊອບສິດຜົນປະໂຫຍດໃຫ້ແກ່ບັນດານັກທຸລະກິດຍິງ, ແມ່ນບ່ອນອີງຂອງບັນດານັກທຸລະກິດຍິງ ອາຊຽນ ເມື່ອປະຊາຄົມອາຊຽນ ພວມໄດ້ຮັບການສ້າງຕັ້ງຂຶ້ນເທື່ອລະກ້າວ ແລະ ເຊື່ອມໂຍງເຂົ້າກັບສາກົນ.