(vovworld) - ໂດຍຫ່າງຈາກໃຈກາງແຂວງ Kampot ປະເທດກຳປູເຈຍ ໄປທາງທິດຕາເວັນຕົກສ່ຽງໃຕ້ ປະມານ 10 ກິໂລແມັດ. ປະຈຸບັນ, ພູ Bokor ແມ່ນສະຖານທີ່ທ່ອງທ່ຽວທີ່ຂາດບໍ່ໄດ້ສຳລັບນັກທ່ອງທ່ຽວຕ່າງປະເທດເມື່ອ,ມາຢ້ຽມຢາມ ກຳປູເຈຍ. ພູ Bokor ຕັ້ງໃນບໍລິເວນສວນສາທາລະນະແຫ່ງຊາດ Preah Monivong Bokor ໃນຄວາມສູງ 1.080 ແມັດ ເມື່ອທຽບໃສ່ຫນ້ານ້ຳທະເລ. ສະນັ້ນຍາມໃດພູ Bokor ກໍ່ຖືກປົກຄຸມໄປດ້ວຍເມກຂາວຕະຫລອດປີ ອັນໄດ້ສ້າງຄວາມງາມແບບມະຫັດສະຈັນທີ່ສຸດ.
ໂບດເກົ່າແກ່ຢູ Bokor
ພາບ:ivivu
|
ຍັງມີເວລາບໍ່ຮອດ 4 ສັບປະດາອີກ ກໍ່ຈະຮອດບຸນປີໃຫມ່ Chol Chnam Thmay ຂອງຊາວ ກຳປູເຈຍ. ນີ້ກໍແມ່ນຊ່ວງເວລາ ທີ່ອາກາດສະດວກທີ່ສຸດໃຫ້ແກ່ການທ່ອງທ່ຽວພະຈົນໄພຢູ່ ພູ Kokor. ຈາກຈອມພູ, ນັກທ່ອງທ່ຽວສາມາດຊົມເຫັນທ້ອງຟ້າທີ່ຜ່ອງໃສຢູ່ Kampot ແລະ ທັດສະນີຍະພາບທີ່ສວຍງາມຢູ່ອ້ອມຮອບເຊັ່ນ: ໂບດ, ໂຮງແຮມບູຮານຕະຫລອດຮອດອະນຸສາວາລີເທວະດາ Khmau ໃນຄວາມສູງ 20 ແມັດ ພ້ອມກັບນ້ຳຕົກຕາດ Popokvil ທີ່ໃຫຍ່ໂຕມະໂຫຖານ.
ສຽງນັກທ່ອງທ່ຽວ
“ທິວທັດທຳມະຊາດຢູ່ທີ່ນີ້ງາມຫລາຍ. ເມກເຝື້ອ ແລະ ນ້ຳໝອກປົກຄຸມໄປທົ່ວຈອມພູຄືດັ່ງຢູ່ແດນສະຫວັນແທ້ໆ”
“ທິວທັດທຳມະຊາດຢູ່ທີ່ນີ້ຄືວ່າກວ່າ ສາຍພູ Grand Caynon ນໍ”
ຕົ້ນປີ 1920, ເມື່ອມາຄອບຄອງ ກຳປູເຈຍ, ຄົນຝລັ່ງ ໄດ້ພົບເຫັນເຂດພູພຽງ Bokor ມີອາກາດເຢັນສະບາຍຕະຫລອດປີ, ມີທີ່ຕັ້ງພູມສາດສະດວກສະບາຍທີ່ສຸດ. ແລະຫ່າງຈາກທະເລພຽງປະມານ 12 ກິໂລແມັດເທົ່ານັ້ນ, ເຂົາເຈົ້າຈຶ່ງກໍ່ສ້າງເຂດຜັກຜ່ອນບຳລຸງສຸຂະພາບໃຫ້ພົນທະຫານ ແລະ ພວກເຈົ້າຂຸນມຸນນາຍ. ມີກິດຈະກຳຫລາຍແຫ່ງຮັບໃຊ້ຄວາມຕ້ອງການດ້ານວັດທະນະທຳ, ການບັນເທິງໄດ້ຮັບການກໍ່ສ້າງຄື: ໂບດ, ໄປຊະນີ, ໂຮງຮຽນ, ໂຮມແຮມ ແລະ ກາຊີໂນ. ນີ້ໄດ້ຮັບຖືວ່າ ແມ່ນຊ່ວງເວລາຈະເລີນຮຸ່ງເຮືອງທີ່ສຸດ ຂອງ Bokor ກ່ອນທີ່ຖືກຊຸດໂຊມ ແລະ ຖືກທຳລາຍຈາກສົງຄາມ. ຕາມການເວລາ, ແຕ່ແຫ່ງນີ້ຍັງຄົງຮັກສາໄດ້ຮ່ອງຮອຍບັນດາກິດຈະກຳທີ່ຍັງເຫລືອຂອງ Bokor ເຖິງປະຈຸບັນ. ອ້າຍ ຟ້າມບັງ, ນັກທ່ອງທ່ຽວ ມາຈາກ ຫວຽດນາມ ເປັນຄັ້ງທຳອິດໄປຢ້ຽມຢາມ Bokor ຮູ້ສຶກແປກປະຫລາດໃຈທີ່ສຸດຕໍ່ຄວາມງາມ ແລະ ຄວາມເລິກລັບຂອງ Bokor.
“ໄປຢ້ຽມຢາມ Bokor ຂ້າພະເຈົ້າຮູ້ສຶກຄືດັ່ງໄດ້ໄປທ່ອງທ່ຽວພະຈົນໄພ. ເມື່ອໄປ ຮອດ Bokor Hill Station, ເຫັນນ້ຳໝອກປົກຄຸມໄປທົ່ວຂ້າພະເຈົ້າຮູ້ສຶກຢ້ານກົວຫຼາຍ. ບໍ່ຮູ້ໄດ້ວ່າກິດຈະກຳທີ່ໃຫຍ່ໂຕມະໂຫຖານດັ່ງກ່າວໄດ້ຮັບການກໍ່ສ້າງແຕ່ໄລຍະໃດ. ໂບດບູຮານທີ່ເກົ່າແກ່ເຕັມໄປດ້ວຍໄຄນ້ຳ. ທິວທັດຢູ່ທີ່ນີ້ທັງງາມ ແລະ ເລິກລັບທີ່ສຸດ. ຂ້າພະເຈົ້າໄດ້ຖ່າຍຮູບ ແລະ ຖ່າຍວິດີໂອໄດ້ຫຼາຍ.”
ອາດຈະເວົ້າໄດ້ວ່າ ບ່ອນໃດຢູ່ Bokor ກໍຕິດພັນກັບເລື່ອງລາວທີ່ເລິກລັບ ຕ່າງໆກ່ຽວກັບດ້ານຈິດວິນຍານ. ຜ່ານກີ່ວ Peak Nil ປະມານ 16 ກິໂລແມັດ, ທ່ານຈະພົບເຫັນອະນຸສາວາລີ Veang Khmau ທີ່ມີຄວາມສູງປະມານ 20 ແມັດ. ບໍ່ວ່າຜູ້ເຊື່ອຖືສາສະຫນາຄົນໃດເມື່ອມາແຫ່ງນີ້ກໍລ້ວນແຕ່ແວ່ຢາມເພື່ອພາວະນາຂໍໃຫ້ມີຄວາມຢູ່ເຢັນເປັນສຸກ ດ້ວຍຄວາມເຄົາລົບນັບຖື. ນີ້ກໍເປັນຄັ້ງທຳອິດມາຢ້ຽມຢາມ Bokor, ແຕ່ເອື້ອຍ ຮ່ວາງໝີເຟືອງ, ນັກທ່ອງທ່ຽວມາຈາກຫວຽດນາມ ພັດມີຄວາມຮູ້ສຶກແຕກຕ່າງກັນ.
“ອາກາດຢູ່ເທິງພູປອດໂປ່ງທີ່ສຸດ. ຂ້າພະເຈົ້າໄດ້ຍິນເລື່ອງລາວທີ່ວ່າ ຍ້ອນເທວະດາ Khmau ໄດ້ສອນໃຫ້ຊາວ ຂະແມ ຮູ້ຈັກການປຸກເຂົ້ານາທາມ, ຊີວິດການເປັນຢູ່ຂອງເຂົາເຈົ້າຈຶ່ງມີຄວາມອີ່ມໜຳສຳລານ ແລະ ສົມບູນພູນສຸກ. ແຕ່ສິ່ງທີ່ສ້າງຄວາມປະທັບໃຈທີ່ສຸດນັ້ນແມ່ນວັດ Sampov Pram ເພາະວ່າຂ້າພະເຈົ້າແມ່ນຄົນເຊື່ອຖືສາສະຫນາພຸດ ສະນັ້ນເມື່ອຂຶ້ນຮອດຈອມພູ Bokor ແລະ ເຂົ້າວັດແຫ່ງນີ້ກໍ່ຮູ້ສຶກຄືວ່າຕົນເອງພວມຢູ່ໃນແດນແຫ່ງສາສະຫນາພຸດແທ້.”
ນ້ຳຕົກຕາດpopokvil
ພາບ:ivivu
|
ຕາມການເລົ່າຂານສືບກັນມາວ່າ: ວັດ Sampov Pram ແມ່ນບ່ອນຮັກສາຄວາມລັບຫລາຍຢ່າງທີ່ກ່ຽວຂ້ອງເຖິງເລື່ອງຄວາມຮັກຂອງລາຊະທິດາ Nagani ແລະ ລາຊະກຸມມານ Preah Thong, ປູ່ຍ່າຕາຍາຍຊົນເຜົ່າ ຂະແມ. ວັດແຫ່ງນີ້ໄດ້ສ້າງເປັນຄວາມງາມທີ່ເປັນເອກະລັກສະເພາະ. ຍ້ອນວ່າ ຢູ່ທີ່ນີ້ທ່ານສາມາດຊົມເຫັນທິວທັດທີ່ຂຽວອຸ່ມທູ່ມຂອງປ່າໄມ້ ແລະຫາດຊາຍທະເລທີ່ຍາວຢຽດ. ເຂົ້າໃນວັດ ທ່ານຍັງຈະເຫັນບັນດາຮູບພາບສາສະຫນາສວຍງາມມີມານັບ 100 ປີ.
ເມື່ອເດີນທາງຈາກຈອມພູ Bokor Hill Station ໄປຕາມທາງທິດຕາເວັນອອກສ່ຽງເຫນືອປະມານ 5 ກິໂລແມັດ ທ່ານຈະພົບເຫັນນ້ຳຕົກຕາດ popokvil ທີ່ໃຫຍ່ໂຕມະໂຫຖານ. ນ້ຳຕົກຕາດແຫ່ງນີ້ ແມ່ນສະຖານທີ່ທ່ອງທ່ຽວດຶງດູດນັກທ່ອງທ່ຽວມາຢ້ຽມຊົມ ແລະ ອາບນ້ຳໃນຍາມຮ້ອນເປັນຈຳນວນຫລວງຫລາຍ. ນອກນັ້ນ ຢູ່ທີ່ນີ້ ຍັງມີໂງ່ນຫີນດຳຫລາຍກ້ອນທີ່ຕັ້ງສະຫຼັບກັນໃນປ່າໄມ້ຂຽວອຸ່ມທຸ່ມຢູ່ອ້ອມນ້ຳຕົກຕາດ, ພ້ອມກັບສວນພືດທຳມະຊາດນາໆປະເພດ, ອັນໄດ້ພາໃຫ້ນັກທ່ອງທ່ຽວ ແລະ ນັກຊີວະວິທະຍາຜູ້ໃດກໍຮູ້ສຶກແປກປະຫລາດໃຈ ຕໍ່ຄວາມງາມເປົ່າຫວ່າງແບບດັ້ງເດີມຂອງ Bokor ແລະ ພືດພັນຢູທີ່ນີ້.
ທັດສະນີຍະພາບທີ່ສວຍງາມຂອງ Bokor ກໍ່ໄດ້ສ້າງຄວາມດຶງດູດບັນດານັກຜະລິດຮູບເງົາ. ມີຮູບເງົາສອງເລື່ອງໄດ້ຮັບການຖ່າຍທຳຢູ່ທີນີ້ຄື ຮູບເງົາເລື່ອງ: “City of ghosts “ ແລະ “ R- Point”. ແຕ່ປີ 2012 ລັດຖະບານກຳປູເຈຍ ໄດ້ເປີດການບໍລິການຢູ່ເຂດພັກຜ່ອນບຳລຸງສຸຂະພາບ Thansur Bokor Highland ດ້ວຍໂຮງແຮມ, ຮ້ານອາຫານ ແລະ ກາຊີໂນ ບັນລຸມາດຕະຖານສາກົນ ເພື່ອຮັບໃຊ້ນັກທ່ອງທ່ຽວຕະຫລອດ 24 ຊົ່ວໂມງ, ຫວັງວ່າ ແຫ່ງນີ້ຈະດຶງດູດນັກທ່ອງທ່ຽວມາຢ້ຽມຢາມ Bokor ນັບມື້ນັບຫລາຍ.