(vovworld)- ທ່ານຢາກຕາກແດດ, ພັກຜ່ອນຢ່ອນອາລົມຢູ່ຫາດຊາຍທະເລທີ່ສວຍງາມ, ອາບນ້ຳທະເລຂຽວສະອາດ, ລ່ອຍນ້ຳພ້ອມກັບປາສະຫລາມໃນທະເລ, ຫລືຢ້ຽມຊົມປະເທດແອດສະປາຍ ຫຍໍ້ເຂົ້າຢູ່ອາຊີຕາເວັນອອກສ່ຽງໃຕ້ ຈົ່ງມາເກາະ Cebu ທາງພາກໃຕ້ປະເທດ ຟິລີບປີນ ເພື່ອຄົ້ນຫາສິ່ງທີ່ສ້າງຄວາມປະທັບໃຈດັ່ງກ່າວ.
ໂດຍຫ່າງຈາກນະຄອນຫລວງ ມານີລາ ໄປທາງທິດໃຕ້ປະມານ 587 ກິໂລແມດ, Cebu ແມ່ນເກາະແຫ່ງຫນຶ່ງນອນໃນໝູ່ເກາະ ຟິລີບປີນ ດ້ວຍຄວາມຍາວ ແຕ່ເຫນືອລົງໃຕ້ແມ່ນ 225 ກິໂລແມັດ, ຢູ່ອ້ອມຍັງມີເກາະນ້ອຍ 167 ແຫ່ງ. ເກາະ Cebu ໄດ້ຮັບການຄົ້ນພົບເມື່ອນັກພະຈົນໄພ Ferdinand Megellan ທີ່ມີຊື່ສຽງ ມາເກາະແຫ່ງນີ້ເມື່ອປີ 1521 ເພື່ອເຜີຍແຜ່ສາສະຫນາກາໂຕລິກ ແລະ ສ້າງຂີດໝາຍມາຮອດປະຈຸບັນນັ້ນແມ່ນ ໄມ້ກາງເຂນ. ດ້ວຍເຫດນັ້ນ ຢູ່ແຫ່ງນີ້ໄດ້ເຕົ້າໂຮມໂບດບູຮານຫລາຍແຫ່ງ ແລະ ຫນຶ່ງໃນຈຳນວນໂບດເຫລົ່ານັ້ນ ແມ່ນໂບດ Cebu Metropolitian Cathedral ຢູ່ໃຈກາງນະຄອນ Cebu ຊື່ງໄດ້ຮັບການກໍ່ສ້າງເມື່ອປີ 1836 ດ້ວຍສະຖາປັດຕະຍະກຳທີ່ເປັນເອກະລັກສະເພາະຂອງ ແອດສະປາຍ. ໃນວັນອາທິດ, ປະຊາຊົນເປັນຈຳນວນຫລວງຫຼາຍເຄີຍມາໂບດນີ້ເພື່ອສວດມົນ.
ເກາະ cebu
ພາບ:phunu.vn
|
ອອກຈາກໂບດແຫ່ງນີ້, ຍ່າງໄປສະຫນາມຫລວງໃຫຍ່ ຕາມຖະຫນົນ Colon ທີ່ເກົ່າແກ່ຢູ່ເກາະ Cebu, ທ່ານຈະພົບເຫັນໄມ້ກາງເຂັນບູຮານ Megellan. ນີ້ແມ່ນຫນຶ່ງໃນບັນດາປູຊະນີຍະສະຖານປະຫວັດສາດທີ່ດຶງດູດນັກທ່ອງທ່ຽວມາຢ້ຽມຊົມເປັນຈຳນວນຫລວງຫລາຍ. ນອກຈາກບັນດາກິດຈະກຳສະຖາປັດຕະຍະກຳທີ່ເຂັ້ມຂົ້ມໄປດ້ວຍສີສັນຂອງເອີລົບຄື: ປ້ອມປືນໃຫຍ່ Fort San Pedro ຖືກກໍ່ສ້າງດ້ວຍໄມ້ ແຕ່ສັດຕະວັດທີ 18, ພ້ອມກັບປືນໂຄກໃຫຍ່ປ້ອງກັນເກາະ Cebu ທີ່ສວຍງາມ, ໂບດ Del Sto Nino ໄດ້ຮັບການກໍ່ສ້າງດ້ວຍຫີນໃຫຍ່ທີ່ຖາວອນໂດຍນັກພະຈົນໄພຊາວ ແອດສະປາຍ Miguel Lopez de Legazpi ກໍ່ສ້າງເມື່ອປີ 1565. ມະຫາວິທະຍາໄລ San Carlos ຊື່ງແມ່ນມະຫາວິທະຍາໄລແຫ່ງທຳອິດຂອງ ຟິລີບປີນ… ນອກນັ້ນ ນັກທ່ອງທ່ຽວຈະພົບເຫັນ ວິຫານແຫ່ງຫນຶ່ງຊຶ່ງໄດ້ຮັບການກໍ່ສ້າງຕາມການອອກແບບຂອງຈີນ ຕັ້ງຢູ່ເນີນພູ Beverly Hill, ທາງທິດເຫນືອນະຄອນ Cebu. ສິ່ງດັ່ງກ່າວໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວ, ອ້າຍ Steve Jeffrson, ນັກທ່ອງທ່ຽວມາຈາກ ອາເມລິກາ ໃຫ້ຮູ້ວ່າ:
“ຂ້າພະເຈົ້າມັກເກາະ cebu ທີ່ສຸດ. ກ່ອນນີ້ ຂ້າພະເຈົ້າພຽງແຕ່ຮູ້ຈັກເຖິງ Cebu ຜ່ານ ອິນເຕີແນັດ, ແຕ່ເມື່ອມາແຫ່ງນີ້ ຂ້າພະເຈົ້າຈຶ່ງຮູ້ສຶກແປກປະຫລາດຕໍ່ວັດທະນະທຳຫລາຍຮູບຫລາຍແບບຢູ່ເກາະແຫ່ງນີ້.”
ອາກາດຢູ່ Cebu ບໍ່ຕ່ຳກວ່າ 33 ອົງສາ, ເຖິງວ່າ ອາກາດຮ້ອນຄືແນວນັ້ນ ແຕ່ນັກທ່ອງທ່ຽວເຄີຍເລືອກເຟັ້ນລົດ Jeepney ເພື່ອຄົ້ນຫາເກາະ Cebu.
ນັກທ່ອງທ່ຽວລ່ອຍນ້ຳກັບປາ
ພາບ:internet
|
ຊາວ Cebu ຜູ້ໃດກໍນິຍົມງານບຸນ ແລະ ຖືວ່າ ນີ້ແມ່ນການສະແດງຄວາມເຄົາລົບນັບຖືຂອງຕົນທີ່ມີຕໍ່ອໍລະຫັນ. ນັກທ່ອງທ່ຽວມາຢ້ຽມຢາມ Cebu ໃນບໍ່ວ່າຍາມໃດກໍສາມາດເຂົ້າຮ່ວມງານບຸນໃດຫນຶ່ງຢູ່ແຫ່ງນີ້ໄດ້ຄື: ງານບຸນ Paskushan, ງານບຸນ Kadaguan sa Mactan, ພິເສດ ງານບຸນ Sinulog ແມ່ນງານບຸນຕົ້ນຕໍ ເຄີຍຖືກຈັດຂຶ້ນໃນວັນອາທິດ, ສັບປະດາທີ 3 ຂອງເດືອນຈຽງແຕ່ລະປີ.
ອ້າຍ Rob Steward, ນັກທ່ອງທ່ຽວມາຈາກ ການາດາ ຮູ້ສຶກສະຫວາດສະເຫວີຍທີ່ສຸດເມື່ອໄດ້ອາບນ້ຳທະເລຂຽວສະອາດ, ໄດ້ລອຍນ້ຳພ້ອມກັບປາວານໃຫຍ່ໂຕຢູ່ທີ່ນີ້. ອ້າຍ Rob Steward ແບ່ງປັນວ່າ:
“ນີ້ແມ່ນມື້ທີ 4 ທີ່ຂ້າພະເຈົ້າມາຢ້ຽມຢາມເກາະ Cebu. ເກາະແຫ່ງນີ້ງາມຫລາຍ, ຂ້າພະເຈົ້າຍາດເວລາ 3 ມື້ເພື່ອລອຍນ້ຳ. ປີຫນ້າ ຂ້າພະເຈົ້າຈະກັບຄືນຢ້ຽມຢາມເກາະແຫ່ງນີ້ອີກເທື່ອຫນຶ່ງ.”
ມີບາງຄົນຖືວ່າ Cebu ແມ່ນຫນຶ່ງໃນບັນດາສະຖານທີ່ທ່ອງທ່ຽວທີ່ດູດດື່ມຢູ່ ຟີລີບປີນ ດ້ວຍທິວທັດທຳມະຊາດສວຍງາມ ແລະ ເປັນຕົວເມືອງທັນສະໄຫມ, ພື້ນຖານວັດທະນະທຳເປັນຫລາຍຮູບຫລາຍແບບ, ຊາວ Cebu ກໍແມ່ນຜູ້ຮັກແພງແຂກຄົນ. ເອື້ອຍ Celine ນັກທ່ອງທ່ຽວມາຈາກ ອັງກິດ ໃຫ້ຮູ້ວ່າ:
“ສິ່ງທີ່ເຮັດໃຫ້ຂ້າພະເຈົ້າມາຢ້ຽມຢາມ ຟິລິບປີນ ນັ້ນແມ່ນຢາກຄົ້ນຫາພື້ນຖານວັດທະນະທຳ ອາຊີຕາເວັນອອກທີ່ແຕກຕ່າງກັນ. ຂ້າພະເຈົ້າໄປທ່ອງທ່ຽວແຕ່ຜູ້ດຽວ. ທຳອິດ ຂ້າພະເຈົ້າຄິດວ່າ ຍາກທີ່ໂອ້ລົມກັບທຸກຄົນຢູ່ເກາະແຫ່ງນີ້ໄດ້, ແຕ່ເມື່ອມາແຫ່ງນີ້ ຂ້າພະເຈົ້າພັດເຫັນວ່າ ຊາວ Cebu ແມ່ນຜູ້ສະຫນິດສະຫນົມ ແລະ ຮັກແພງແຂກຄົນ. ຊຳ້ບໍ່ໜຳ ຂ້າພະເຈົ້າ ຍັງມີໝູ່ເພື່ອນໃຫມ່ຫລາຍຄົນອີກ. ຂ້າພະເຈົ້າບໍ່ຢາກລາຈາກເກາະແຫ່ງນີ້ເທື່ອ.”
ດ້ວຍທິວທັດທຳມະຊາດທີ່ສວຍງາມ, ປະຊາຊົນແມ່ນຜູ້ສະຫນິດສະຫນົມ ແລະ ຮັກແພງແຂກຄົນ, ພ້ອມກັບວັດທະນະທຳເປັນຫລາຍຮູບຫລາຍແບບ ແລະ ການບໍລິການທ່ອງທ່ຽວອຸດົມສົມບູນນັ້ນ, ຈະແມ່ນສິ່ງທີ່ດຶງດູດນັກທ່ອງທ່ຽວມາຢ້ຽມຢາມເກາະ Cebu ນັບມື້ນັບຫລາຍ.