(vovworld)- ແລວເສດຖະກິດ ຕາເວັນອອກ ຕາເວັນຕົກ (EWEC) ໄດ້ຮັບການເຊື່ອມຕໍ່ຢ່າງເປັນທາງການເມື່ອປີ 2006, ໃນໄລຍະກວ່າ 10 ປີຜ່ານມາ, “ແລວເສດຖະກິດ ຕາເວັນອອກ ຕາເວັນຕົກ ໄດ້ປະກອບສ່ວນບໍ່ແມ່ນຫນ້ອຍເຂົ້າໃນການພັດທະນາຂອງແຕ່ລະປະເທດສະມາຊິກ. ດ້ວຍທ່າໄດ້ປຽບແມ່ນແຂວງທີ່ຕັ້ງຢູ່ຈຸດເລີ່ມຕົ້ນຂອງແລວເສດຖະກິດ ແລະ ຕິດກັບບັນດາແຂວງພາກກາງຫວຽດນາມ, ແຂວງ ກວ໋າງຈີ້ ແມ່ນຫນຶ່ງໃນ 3 ແຂວງພາກກາງຫວຽດນາມ ໄດ້ຊົມໃຊ້ຜົນປະໂຫຍດຫລາຍສຸດຈາກແລວເສດຖະກິດນີ້.
ແຜນທີ່ແລວເສດຖະກິດຕາເວັນອອກຕາເວັນຕົກ
|
ໂດຍນອນໃນທີ່ຕັ້ງເຊື່ອມຕໍ່ກັບລາວ - ໄທ - ມຽນມາ ຜ່ານດ່ານຊາຍແດນສາກົນ ລາວບ໋າວ ຮອດທ່າກຳປັ່ນພາກກາງຄື: ເກື໋ອຫວຽດ, ເຈີນເມີຍ, ດາຫນັງ, ຫວູງອາງ.. ແຂວງ ກວ໋າງຈີ້ມີເງື່ອນໄຂສະດວກເພື່ອເປີດກວ້າງການຮ່ວມມືດ້ານເສດຖະກິດ, ການພົວພັນແລກປ່ຽນການຄ້າ, ຂົນສົ່ງສິນຄ້າສາກົນ, ພັດທະນາການຄ້າ, ການບໍລິການ ແລະ ການທ່ອງທ່ຽວ ໃນພາກພື້ນ. ທ່ານ ດີງງອກແທງ, ຮອງຫົວຫນ້າພະແນກພາສີແຂວງ ກວ໋າງຈີ້ ໃຫ້ຮູ້ວ່າ: ພາຍຫລັງເຊື່ອມຕໍ່ແລວເສດຖະກິດດັ່ງກ່າວແລ້ວ, ປະລິມານສິນຄ້າຜ່ານແລວເສດຖະກິດນີ້ໄດ້ເພີ່ມຂຶ້ນຫລາຍສົມຄວນ, ປີນີ້ສູງກວ່າປີກ່ອນແມ່ນແຕ່ 10% - 30%.
“ຕົ້ນປີ 2016, ພວກຂ້າພະເຈົ້າໄດ້ສົມທົບກັບພາສີດ່ານຊາຍແດນສາກົນ ແດນສະຫວັນ (ລາວ) ຜັນຂະຫຍາຍຮູບແບບ “ປະຕູດຽວ - ຢຸດເທື່ອຫນຶ່ງ” ຢູ່ ດ່ານຊາຍແດນພາສາສາກົນ ລາວບ໋າວ - ແດນສະຫວັນ. ນີ້ແມ່ນຮູບແບບປະຕິຮູບມີລັກສະນະກະໂດດຂັ້ນໃນ ແລວເສດຖະກິດ ຕາເວັນອອກ ຕາເວັນຕົກ ຊ່ວຍໃຫ້ການເຮັດລະບຽບການພາສີຢ່າງວ່ອງໄວ, ສະດວກກວ່າ. ລະບຽບການບໍລິຫານມີຄວາມໂປ່ງໃສ, ຫລຸດຜ່ອນການຫຍໍ້ທໍ້ ແລະ ການສູນເສຍເກັບ ພາສີອາກອນໃຫ້ແກ່ງົບປະມານແຫ່ງລັດ.”
“ແລວເສດຖະກິດ ຕາເວັນອອກ ຕາເວັນຕົກ” ແມ່ນຫນຶ່ງໃນ 5 ແລວເສດຖະກິດຂຶ້ນກັບອະນຸພາກພື້ນແມ່ນ້ຳຂອງເປີດກວ້າງ GMS ຊື່ງໄດ້ຮັບການເຊື່ອມຕໍ່ຢ່າງເປັນທາງການເມື່ອວັນທີ 20/12/2006. ນີ້ແມ່ນໂຄງການໃຫຍ່ໄປຜ່ານ 13 ແຂວງ ຂອງ 4 ປະເທດຄື: ຫວຽດນາມ, ລາວ, ໄທ, ມຽນມາ ດ້ວຍຄວາມຍາວ 1.450 ກິໂລແມັດ, ກ້ຳຕາເວັນຕົກ ແມ່ນນະຄອນທ່າກຳປັ່ນ Mawlamyine ປະເທດ ມຽນມາ ຜ່ານລັດ Kayin (ມຽນມາ) ຜ່ານບັນດາແຂວງປະໂສທອນ, ມຸກດາຫານ(ໄທ), ແຂວງ ສະຫວັນນະເຂດຂອງລາວ, ແຂວງ ກວ໋າງຈີ້, ເທື່ອທຽນເຫ້ວ ແລະ ນະຄອນດາຫນັງຂອງຫວຽດນາມ”.
ດ່ານຊາຍແດນສາກົນ ລາວບ໋າວ
ພາບ:baochinhphu.vn
|
ດ້ວຍລັກສະນະແມ່ນຜ່ານຫລາຍປະເທດຄືແນວນັ້ນ, ແລວເສດຖະກິດ ຕາເວັນອອກ ຕາເວັນຕົກ ໄດ້ຊ່ວຍຊຸກຍູ້ການຮ່ວມມືກັບບັນດາທ້ອງຖິ່ນຂອງບັນດາປະເທດລຽບຕາມແລວເສດຖະກິດນີ້, ຫລຸດຜ່ອນຄ່າຂົນສົ່ງ, ຊ່ວຍໃຫ້ການຂົນສົ່ງສິນຄ້າ ແລະ ຜູ້ໂດຍສານບັນລຸປະສິດທິຜົນກວ່າ. ແລວເສດຖະກິດ ຕາເວັນອອກ ຕາເວັນຕົກ ເຊື່ອມຕໍ່ກັບບັນດາສາຍທາງຕົ້ນຕໍທາງທິດເຫນືອກັບທາງທິດໃຕ້ຄື: Yangon – Dawei, ຊຽງໃຫມ່ - ບາງກອກ, ເສັ້ນທາງ 13 ຂອງລາວ ແລະ ທາງຫລວງ 1 A ຫວຽດນາມ, ຍ້ອນເຫດນັ້ນ ແຂວງ ກວ໋າງຈີ້ ກໍຄືບັນດາແຂວງ ລຽບຕາມແລວເສດຖະກິດນີ້ ມີເງື່ອນໄຂສະດວກເພື່ອພັດທະນາການຄ້າຕາມທິດເຫນືອ ຫລື ທິດໃຕ້ ໄປເຖິງບັນດາສູນການຄ້າໃຫຍ່ຄື: ບາງກອກ, ນະຄອນ ໂຮ່ຈິມີນ.. ດ້ວຍຄວາມສະດວກດັ່ງກ່າວ, ປະຈຸບັນ ຢູ່ບໍລິເວນແຂວງ ກວ໋າງຈີ້ ໄດ້ສ້າງຕັ້ງ 15 ກຸ່ມອຸດສາຫະກຳ ເພື່ອດຶງດູດບັນດານັກລົງທຶນ. ແຂວງກໍນຳໃຊ້ບັນດາກອບນະໂຍບາຍບຸລິມະສິດຂອງລັດຄື: ຄ່າເຊົ່າທີ່ດິນໄດ້ຮັບການດັດປັບຢູ່ໃນລະດັບຕ່ຳສຸດໂດຍໄດ້ຮັບການອະນຸຍາດຈາກລັດ, ນະໂຍບາຍກ່ຽວກັບອາກອນລາຍຮັບ, ຫນູນຊ່ວຍບຳລຸງສ້າງແຫລ່ງຊັບພະຍາກອນມະນຸດ, ກໍ່ສ້າງໂຮງຮຽນສອນວິຊາຊີບເທື່ອລະກ້າວເພື່ອຮັບໃຊ້ການພັດທະນາລວມ. ທ່ານຫງວຽນວັນບີງ ຜູ້ອຳນວຍການສູນຄຸ້ມຄອງການນຳເຂົ້າສິນຄ້າແຂວງ ກວ໋າງຈີ້ ຕີລາຄາວ່າ:
“ປະຈຸບັນ ແຂວງ ກວ໋າງຈີ້ ພວມສ້າງຕັ້ງເຂດເສດຖະກິດຕາເວັນອອກຕາສ່ຽງໃຕ້, ຫ່າງຈາກນະຄອນ ດົງຮ່າໄປທາງທິດໃຕ້ ປະມານ 35 ກິໂລແມັດ. ເມື່ອເຂດເສດຖະກິດຕາເວັນອອກສ່ຽງໃຕ້ໄດ້ຮັບການສ້າງຕັ້ງແມ່ນຕິດພັນກັບທ່າກຳປັ່ນນ້ຳເລິກ ໝີຖູຍ, ແລວເສດຖະກິດຕາເວັນອອກ ຕາເວັນຕົກ ຈະຫລຸດຜ່ອນໄລຍາທາງລົງປະມານ 150 ກິໂລແມັດ.”
ດ້ວຍຄວາມມານະພະຍາຍາມດັ່ງກ່າວ, ເບື້ອງຕົ້ນ ແຂວງໄດ້ດຶງດູດບັນດານັກລົງທຶນຢູ່ພາຍໃນ ແລະ ຕ່າງປະເທດ ຄື: CAMEL (ຜະລິດຢາງລົດຖີບ, ລົດຈັກ), ນ້ຳຊູກຳລັງ Super horse, ກຸ່ມບໍລິສັດ CP ລ້ຽງສັດຂອງ ໄທ, ບັນດາກຸ່ມບໍລິສັດ ສິງກະໂປ. ທ່ານ ຫງວຽນກວກຕວນ, ຮອງຫົວຫນ້າພະແນກແຜນການ ແລະ ການລົງທຶນແຂວງ ກວ໋າງຈີ້ ໃຫ້ຮູ້ວ່າ:
“ໄລຍະມໍ່ມານີ້ ແຂວງ ກວ໋າງຈີ້ ໄດ້ຮັບຄວາມເອົາໃຈໃສ່ຈາກບັນດາກຸ່ມບໍລິສັດໃຫຍ່ຄື: ໂຄງການກໍ່ສ້າງໂຮງງານໄຟຟ້າໃຊ້ພະລັງຄວາມຮ້ອນ ດ້ວຍເຈົ້າຂອງການລົງທຶນແມ່ນກຸ່ມບໍລິສັດໄຟຟ້າແຫ່ງຊາດໄທ EGAT, ສ້າງຕັ້ງວິສາຫະກິດລູກຢູ່ ຫວຽດນາມ ແມ່ນ EGATi, ຄາດວ່າ ປະລິມານໄຟຟ້າຈະຜະລິດມາໄດ້ປະມານ 1200 MW, ດ້ວຍຈຳນວນເງິນລົງທຶນປະມານ 2 ຕື້ໂດລາສະຫະລັດ. ສ່ວນ ແຂວງ ກວ໋າງຈີ້ ໄດ້ວາງແຜນຜັງເຂດແຄມທ່າກຳປັ່ນ ໝີຖູຍ ດ້ວຍເນື້ອທີ່ປະມານ 400 ເຮັກຕາ ສະຫງວນໃຫ້ແກ່ໂຄງການນີ້. ໄລຍະມໍ່ໆມານີ້ ແມ່ນກຸ່ມບໍລິສັດ Kinder World ໄດ້ເຄື່ອນໄຫວໃນຂົງເຂດການສຶກສາບຳລຸງສ້າງຂອງ ສິງກະໂປ ໄດ້ຊອກຮູ້, ສຳຫລວດຢູ່ເຂດທ່ອງທ່ຽວ ເກືອຕູງ, ເກືອຫວຽດ, ເກາະກົນກໍ໋ ເພື່ອຜັນຂະຫຍາຍໂຄງການກໍ່ສ້າງກຸ່ມທ່ອງທ່ຽວສຶກສາບຳລຸງສ້າງຢູ່ແຂວງ ກວ໋າງຈີ້. ຄຽງຄູ່ກັນນັ້ນ ຍັງມີກຸ່ມບໍລິສັດ AMATA ຂອງໄທ ແລະ VSIP ຂອງສິງກະໂປ ກໍພວມຄົ້ນຄ້ວາເພື່ອລົງທຶນໃນບໍລິເວນ.”
ນອກນັ້ນ, ຢູ່ ແຂວງ ກວ໋າງຈີ້, ລັດຖະບານຫວຽດນາມ ພວມສົ່ງເສີມການສ້າງຕັ້ງເຂດເສດຖະກິດ ລາໄລ ເຊື່ອມຕໍ່ແຂວງ ກວ໋າງຈີ້ ກັບແຂວງ ສາລາວັນຂອງລາວ ແລະ ແຂວງສາລາວັນກັບແຂວງ ອຸດອນທານີ ຂອງໄທ, ຫລັງຈາກນັ້ນຈະກໍ່ສ້າງຂົວມິດຕະພາບ 4 ຂ້າມແມ່ນ້ຳຂອງ ລະຫວ່າງ ລາວ ແລະໄທ. ນີ້ຈະແມ່ນແລວທາງຫນູນຊ່ວຍໃຫ້ແລວເສດຖະກິດຕາເວັນອອກ ຕາເວັນຕົກ. ເປັນອັນວ່າ ໃນອະນາຄົດການເຊື່ອມຕໍ່ລະຫວ່າງບັນດາເຂດຈາກຕາເວັນອອກໄປຍັງຕາເວັນຕົກ ແລະ ກົງກັນຂ້າມ ຈະເປັນຫລາຍຮູບຫລາຍແບບ ແລະ ມີຄວາມສະດວກກວ່າ.